சிறப்புக்கட்டுரை

எங்கும் ஓயாத இரைச்சல் மிகுந்த ஓர் உலகத்தில் நாம் வாழ்ந்து கொண்டிருக்கிறோம். ஒவ்வொரு விநாடியும் கோடிக்கணக்கான எண்மத் தொழில்நுட்ப (டிஜிட்டல்) அறிவிப்புகள் நமது அலைப்பேசித் திரைகளில் மின்னுகின்றன. திடுக்கிடும் செய்திகளும், வைரல் காணொளிகளும், அவசரச் செய்தி எச்சரிக்கைகளும் சமூக ஊடகப் பக்கங்களில் தொடர்ச்சியாகச் சுருண்டோடிக் கொண்டே இருக்கின்றன. இந்த நவீனத் தகவல் பெருவெள்ளத்தில், இளைய தலைமுறை மட்டுமல்ல; ஒட்டுமொத்த சமூகமும் திசைமாறித் திகைத்து நிற்கிறது. ஆழிப்பேரலையில் அடித்துச் செல்லப்பட்டு எங்கோ கரை ஒதுங்கி, விழிபிதுங்கி நிற்கும் சூழ்நிலைபோல இருக்கிறது.

இணையத் தொடர்பு கொண்ட(டு) ஒவ்வொருவராலும் தங்களின் கருத்துகளை அகிலமெங்கும் பரப்ப முடிகிறது. ஆனால், இத்தனை இரைச்சல்களுக்கும் மத்தியில், எது உண்மை? எது போலி? நமக்கு உண்மையை உரைப்பது யார்? என்ற அடிப்படைக் கேள்விகள் எழுகின்றன.

இத்தகைய சூழலில்தான், இவ்வினாக்களுக்குச் சரியான விடையளிக்க, அச்சு ஊடகவியலின் உண்மையான தன்மையும் நோக்கமும் ஒளியை நோக்கித் தன் பாதங்களை எடுத்து வைக்கிறது. இன்று, செய்தி அறைகள், நிர்ணயக் கணக்கீடுகளால் (Algorithms) இயக்கப்படும் ஒரு நிலப் பரப்புகளாக உருமாறி வருகின்றன. செயற்கை நுண்ணறிவு (AI) ஒருசில விநாடிகளிலேயே கட்டுரைகளைத் தருகிறது; ஈர்ப்பு மிகுந்த அதிகக் கவனம் பெரும் தலைப்புகளைச் செய்திகளை, உள்ளடக்கங்களை (Content) உருவாக்குகிறது. மேலும், எந்தவொரு மனித நிருபராலும் ஈடு கொடுக்க முடியாத அளவிற்குத் தரவுகளை ஒருங்கிணைத்துத் தொகுக்கிறது. ஆயினும்கூட, இந்தத் திறன்மிகு பகட்டான போர்வையின்கீழ், ஓர் ஆழமான நெருக்கடிநிலை மறைந்துள்ளது என்பதும் மறுப்பதற்கில்லை.

பொதுமக்களுக்கான பொறுப்புக்கூறலின் காவலன் என்றும், குடிமக்கள் சமூகத்தின் ‘நான்காம் தூண்’ என்றும் அழைக்கப்படும் ஊடகம், இன்று ஓர் ஆபத்தான இருதலைக் கொள்ளி நோயில் சிக்கியுள்ளது. ஒன்று, எண்மத் தொழில்நுட்ப சந்தையின் வேகம்; மற்றொன்று, போலியான செய்திகள் மற்றும் காணொளிகளின் அதிவேகப் பரவல். எண்மத் தொழில்நுட்பத்தில் செயற்கை நுண்ணறிவு அதை அதிவேகமாக வழங்குகிறது; அது பல வேளைகளில் பேரதிர்ச்சியையும் தருகிறது. எந்தத் தகவல் முன்னிலைப்படுத்தப்பட வேண்டும், எது புதைக்கப்படவேண்டும் என்பதை நிர்ணயக் கணக்கீடுகள் தீர்மானிக்கும்போது, ஊடகத்துறை எவ்வாறு தனது மேன்மையான அழைப்பிற்கு உண்மையாக இருக்க முடியும்? என்ற கேள்வியும் தவிர்க்க இயலாததே. இதற்கான விடை மிகவும் எளிமையானது; எவ்விதச் சமரசத்திற்கும் இடமில்லாதது. அதாவது, மனிதநேயம், மானுட மாண்பு மற்றும் உண்மை ஆகிய மாறாத முக்கூறுகளை அது உறுதியாகப் பற்றிக்கொள்வதே அதன் முக்கியக் காரணமாகும்.

உண்மை நம்மை விடுவிக்கும்

ஊடகவியலின் உண்மையான உள்ளுணர்வை நாம் புரிந்துகொள்ள வேண்டுமாயின், ஒரு சமூக ஊடகவியலாளரிடமிருந்தோ (Influencer) அல்லது மக்கள் தொடர்பு அதிகாரியிடமிருந்தோ (PRO - Spokesperson) ஓர் உண்மையான செய்தியாளரை வேறுபடுத்துவது எது? என்பதை நாம் கண்டுணர வேண்டும். ஒரு சமூக ஊடகவியலாளர் உங்களின் கவனத்தை ஈர்க்க விழைகிறார்; ஒரு மக்கள் தொடர்பு அதிகாரி ஒரு குறிப்பிட்ட பிம்பத்தைப் பாதுகாக்க முனைகிறார்; ஆனால், ஒரு செய்தியாளர் எவ்விதப் பூச்சும் சமரசமும் இல்லாத உண்மைத் தரவுகளை வழங்க விரும்புகிறார்.

குடிமக்கள் சுதந்திரமாகவும், தங்களைத் தாங்களே ஆளக்கூடிய தகுதியோடும் வாழ்வதற்குத் தேவையான துல்லியமான, சரியான தரவுகளை வழங்குவதே ஊடகவியலின் முதன்மைக் குறிக்கோளாகும். முகப்பு விளக்குகள் (Headlights) ஏதுமின்றி, காரிருள் சூழ்ந்த இரவில் வளைந்து நெளிந்து செல்லும் ஒரு மலைப்பாதையில் காரைச் செலுத்த முயல்வதைக் கற்பனை செய்து பாருங்கள்; ஊடகமும் இதழியலும் இல்லாத வாழ்க்கை அத்தகையதாகவே இருக்கும். நாம் வாழும் பகுதியின் குடிநீர் பாதுகாப்பானதா? நமது வரிப் பணம் எவ்வாறு செலவிடப்படுகிறது? அல்லது நமது பெயரால் என்ன சட்டங்கள் இயற்றப்படுகின்றன? என்பது நமக்குத் தெரியாமலேயே போய்விடும். ஊடகங்களே அந்த முகப்பு விளக்குகளை நமக்கு வழங்குகிறது. அது சமுதாயத்தின் இருண்ட மூலைகளை வெளிச்சமிட்டுக் காட்டுகிறது.

உலகத்தின் கண்ணாகவும் செவியாகவும் திகழ்தல்

“இந்த உலகத்திலேயே மிக சக்தி வாய்ந்த அமைப்பு ஊடகம்தான். நிரபராதியைக் குற்றவாளியாக்கவும், குற்றவாளியைப் புனிதனாக்கவும் கூடிய வல்லமை ஊடகத்திற்கு உண்டு. ஏனெனில், மக்கள் திரளின் சிந்தனையைத் தீர்மானிக்கும் அதிகாரம் அவற்றிடமே உள்ளது” என்கிறார் அமெரிக்காவில் கறுப்பின மக்களின் உரிமைகளுக்காகத் துணிந்து குரல் கொடுத்த மனித உரிமை செயற்பாட்டாளர் மால்கம் எக்ஸ் (Malcolm X). ஆகவே, அதிகார வர்க்கத்தின் பக்கம் நிற்பது பத்திரிகைத் தர்மம் அல்ல; உண்மையின் பக்கம் நிற்பது மட்டுமே ஊடகத்துறையின் கடமை. உண்மை செத்துப்போனால் பத்திரிகைத் துறையும் மடிந்துவிடும்.

இதழியலின் (ஊடகவியலின்) மிக அழகிய மற்றும் துணிச்சலான தன்மை ‘சான்று பகர்தல்’ (Bearing witness) என்னும் செயலாகும். ஓர் இயற்கைப்பேரிடர் தாக்கும்போதோ, போர் மூளும்போதோ அல்லது ஒரு சமூகம் பேரழிவால் நிலைகுலையும்போதோ, பாதுகாப்பான இடத்தை நோக்கி ஓடுவதே மனிதனின் இயல்பான உள்ளுணர்வாகும். ஆனால், செய்தியாளர்கள் அதற்கு நேர்மாறாகச் செய்பவர்கள். அவர்கள் தங்கள் பைகளைத் தயாரித்து, குறிப்பேடுகளையும் கேமராக்களையும் கையில் ஏந்தி, இடையூறுகளை நோக்கி ஓடுகிறார்கள். ஏன்? ஏனெனில், அங்கு நடப்பவற்றைத் தடம்பதிக்க அவர்கள் இல்லை என்றால், எளிய மனிதர்களின் கதைகள் வரலாற்றிலிருந்து முற்றிலும் துடைத்தழிக்கப்பட்டுவிடும் என்பதை அவர்கள் அறிவார்கள்.

பெரும் முதலாளிகளின் வணிக மோசடிகளையோ அல்லது அரசியல் ஊழல்களையோ வெளிக்கொண்டு வருவதற்காக, தூசு படிந்த பொது ஆவணங்களை மாதக்கணக்கில் தோண்டித் துருவி, உள்விவரம் தெரிவிப்போரை நேர்காணல் செய்து, தனிப்பட்ட அச்சுறுத்தல்களை எதிர்கொள்ளும் புலனாய்வு நிருபர்களைச் சற்று சிந்தித்துப் பாருங்கள். அவர்கள் இதைப் புகழுக்காகவோ அல்லது செல்வத்திற்காகவோ செய்வதில்லை; ஏனெனில், பெரும்பாலான செய்தியாளர்களுக்கு மிகக் சொற்பமான ஊதியமே வழங்கப்படுகிறது. அவர்கள் இதைச் செய்வதற்குக் காரணம், ‘இந்தக் கதை முக்கியமானது, இதை உலகம் அறியவேண்டும்’ என்று அவர்களின் உள்ளத்தில் எரியும் ஒரு நெருப்புதான்.

வறுமையோடு போராடும் விளிம்புநிலைச் சமூகத்தைப் பற்றியோ அல்லது தவறான தண்டனையை எதிர்த்துப் போராடும் ஒரு தனிநபரைப் பற்றியோ ஒரு செய்தியாளர் எழுதும்போது, அவர் ஒரு புனிதமான செயலைச் செய்கிறார் என்றே எண்ணத் தோன்றுகிறது. அவர் மனித வாழ்க்கையின் மாண்பை மீட்டெடுக்கிறார். எளியவர்களை அதிகார வர்க்கத்தினர் தங்களுக்குச் சாதகமாக நசுக்கிவிடாமல் இருப்பதை அவர் உறுதி செய்கிறார்.

(தொடரும்)

நமது அன்பை வெளிப்படுத்தும் அடையாளமாக இதயத்தைச் சொல்கிறோம். மனிதனின் இதயம் உணர்வுகளின் இல்லமாகவும், மனம் எண்ணங்களின் பிறப்பிடமாகவும் கருதப்படுகிறது. இரண்டும் வெவ்வேறு பணிகளைச் செய்தாலும், ஒன்றோடொன்று பிரிக்கமுடியாத அளவிற்கு இணைந்துள்ளன.

மகிழ்ச்சியில் துள்ளும்போது, ‘என் இதயம் அகமகிழ்கிறது’ என்று நாம் சொல்வதன் பொருள் என்ன? உணர்வின் உடனடித் தொடர்பாக நாம் சொல்வது இதயத்தைத்தான். மகிழ்ச்சி, நம்பிக்கை, அல்லது அன்பு காரணமாக இதயம் துள்ளும்போதும், பயம் மற்றும் பதற்றம் காரணமாக இதயம் படபடக்கும்போதும், அதன் பின்னால் ஓர் எண்ணம் இருப்பது உறுதி.

நாம் அனுபவிக்கும் ஒவ்வோர் உணர்விற்கும் அடிப்படையாக இருப்பது நமது சிந்தனை, பார்வை மற்றும் நம்பிக்கைகளே. இதை ஒட்டுமொத்தமாகச் சொல்லப்போனால், எண்ணங்கள் பின்னால் இருந்து இயக்கும் ஆற்றலாக இருப்பதை நாம் அறியலாம். எண்ணங்களுக்கு நமது உணர்வுகளை வடிவமைக்கும் அற்புதமான ஆற்றல் உள்ளது. ஒரு நல்ல எண்ணம் இதயத்தை மகிழ்ச்சியாலும் துணிச்சலாலும் நிரப்பும். ஓர் எதிர்மறை எண்ணம் கவலையையும் துயரத்தையும் உருவாக்கும்.

இந்தக் கண்ணுக்குப் புலப்படாத தொடர்பே நாம் எடுக்கும் ஒவ்வொரு முடிவையும் உருவாக்கும். ஒவ்வோர் உறவையும் அடைய விரும்பும். ஒவ்வொரு கனவையும் பாதிக்கும். இதில் நாம் கவனம் வைக்கும்போது, எண்ணம் நல்வழிப்பட்டு, மனம் நம் வயப்பட்டு துள்ளும் மனநிலைக்கு மாறுகிறோம். ‘இதயத்தையும் மனத்தையும் தொடர்புபடுத்தி எழுதுவதன் நோக்கம் என்ன?’ எனும் கேள்வி உங்களுக்குள் எழலாம். மனமும் (Mind) இதய மும் (Heart) ஒன்றல்ல; ஆனால், அவை ஒன்றோடொன்று நெருங்கிய தொடர்புடையவை. இதயம் என்பது உடலின் ஓர் உறுப்பு. அதன் பணி உடல் முழுவதும் குருதியைப் பாய்ச்சுவது. மனம் என்பது உடல் உறுப்பு அல்ல; அது சிந்தனை, நினைவு, கற்பனை, உணர்வுகள், முடிவெடுத்தல் போன்ற மனச்செயல்பாடுகளைக் குறிக்கும். இவை மூளையின் செயல்பாடுகளுடன் தொடர்பு உடையவை.

இதயம் என்பது அன்பு, கருணை, பாசம், உணர்வு போன்றவற்றின் இருப்பிடத்தின் உவமையாகக் கூறப்படுகிறது. மனம் என்பது எண்ணங்கள், ஆசைகள், விருப்பங்கள், குழப்பங்கள், தீர்மானங்கள் ஆகியவற்றின் பிறப்பிடமாகக் கருதப்படுகிறது. மனம் என்பது எண்ணங்களை உருவாக்கும் கருவி.

இதயம் என்பது அன்பு அல்லது ஆன்ம அனுபவத்தின் மையம் என்று விளக்கப்படுகிறது. இரண்டும் வேறுபட்டவை என்றாலும், ஒன்றையொன்று ஆழமாகப் பாதிக்கின்றன. அதனால் இவை இரண்டும் மனித அனுபவத்தில் பிரிக்க முடியாத இரு முக்கியப் பரிமாணங்கள். எளிமையாகக் கூறினால், மனம் = எண்ணங்களின் உலகம். இதயம் = உணர்வுகளின் உலகம்.

நமது எண்ணங்கள் ஓர் உயர்ந்த நோக்கமும், மிகுந்த நம்பிக்கையும் கொண்டு இருக்கும்போது, நமது இதயம் உற்சாகம் பெறுகிறது. அது நம்மைத் தன்னம்பிக்கையுடனும் கருணையுடனும் செயல்படத் தூண்டுகிறது. பிறரை ஈர்க்கும் இதயம் என்பது பிரச்சினைகளே இல்லாத இதயம் அல்ல; மாறாக, சவால்கள் இருந்தாலும், வாழ்க்கையின் அர்த்தத்தைத் தொடர்ந்து தேடிக்கொண்டிருக்கும் இதயமே உண்மையில் ஈர்க்கும் இதயம். அத்தகைய இதயம் அவசர உணர்ச்சிகளால் அல்ல; ஆழ்ந்த சிந்தனையால் வழிநடத்தப்படுகிறது. அது குறைகளைச் சொல்வதைவிட, நன்றியுணர்வைத் தேர்ந்தெடுக்கிறது; பயத்தை விட நம்பிக்கையைத் தேர்ந்தெடுக்கிறது. வெறுப்பைவிட அன்பையும் கருணையையும் தேர்ந்தெடுக்கிறது. இந்தத் தேர்வுகள் அனைத்தும் முதலில் எண்ணங்களாகவே தோன்றி, பின்னர் செயல்களாக வெளிப்படுகின்றன.

சிறந்த தலைவர்கள், கலைஞர்கள், விஞ்ஞானிகள் மற்றும் சமூக மாற்றத்தை ஏற்படுத்திய அனைவருக்கும் ஒரு பொதுவான பண்பு உள்ளது. அவர்கள் முதலில் வலிமையான எண்ணங்களை வளர்த்தனர். அந்த எண்ணங்களை வளர்த்தெடுக்கச் சிறந்த பழக்கங்களை உருவாக்கினர். மற்றவர்களுக்கு முடியாததாகத் தோன்றிய எண்ணங்களே அவர்களின் இதயத்தைத் துள்ளச் செய்தன. நம்பும் மனமும், கற்பனைத் திறனும், விடாமுயற்சியும் அந்த எண்ணங்களை உண்மைக்கு அருகில் கொண்டு சென்று அவர்களது வாழ்வை மாற்றின.

சரியான மற்றும் முறையான எண்ணங்களால் ஊக்கமடைந்த இதயம், ஒருவரின் வாழ்க்கையை மட்டுமல்ல; எண்ணற்ற மனிதர்களின் வாழ்க்கையையும் மாற்றும் ஆற்றல் கொண்டது. அதேநேரத்தில், எதிர்மறை எண்ணங்கள் கட்டுப்படுத்தப்படாவிட்டால், அவை இதயத்தைச் சின்னாபின்னமாக்கிச் சிறையடைத்துவிடும். சந்தேகம், கோபம், பொறாமை மற்றும் பயம் போன்ற எண்ணங்கள் மகிழ்ச்சியை மறைத்து, வாய்ப்புகளைக் காணவிடாமல் தடுக்கின்றன. அதனால்தான் நல்ல சிந்தனையை வளர்ப்பது மிகவும் அவசியம்.

பிறரை ஈர்க்கும் மனமும் இதயமும் என்பது உயர்ந்த நோக்கமுள்ள எண்ணங்களால் நிரம்பிய மனத்தின் வெளிப்பாடுதான். நமது எண்ணங்கள் (மனம்) விதைகள், நமது இதயம் வளமான மண்; நமது செயல்கள் உலகம் காணும் கனிகள். நேர்மறை, துணிச்சல் மற்றும் கருணை நிறைந்த எண்ணங்களை வளர்த்தால், நமது மனமும் இதயமும் நம்மை மட்டுமல்ல; நம்மைச் சந்திக்கும் ஒவ்வொருவரையும் ஊக்குவிக்கும் ஆற்றலாக மாற்றித் துள்ளும் மனநிலையைத் தரும்.

நிறைவாகக் கூறவேண்டுமென்றால், மனம் எண்ணுகிறது; இதயம் உணர்கிறது. எண்ணுவதும் உணர்வதும் உருப்பெறும்போது எண்ணற்ற ஏற்றங்களை நாம் கண்டு துள்ளும் மனநிலையில் இருப்போம். துள்ளும் மனமே அனைத்துத் தோல்விகளையும் கொல்லும், வெற்றிகளை வெல்லும்.

“ஒரு மனிதன் அவன் எண்ணங்களின் உருவமே; அவனுடைய குணநலன் என்பது அவன் சிந்தித்த அனைத்து எண்ணங்களின் மொத்தத் தொகுப்பாகும்” என்கிறார் ஜேம்ஸ் ஆலன். தொடர்ந்து பயணிப்போம்.

இயற்கை, தன்னைத் தானே தகவமைக்கும் வல்லமை கொண்டது. மரம், செடி, கொடிகள் இயற்கையின் இறைப்படைப்பின் ஆச்சரியங்கள். உதாரணமாக, நாவல் மரங்களின் வேர்கள் பூமியின் வறட்சியை உள்ளுணரும். தண்ணீர் பஞ்சத்தின் அறிகுறிகளை அடையாளம் காணும். ‘தன் மரம் அழியும்; தன் வம்சங்கள் தொடராது’ என நாவல் மரம் அறியும். அதுபோன்ற ஆண்டுகளில், வறட்சிக்கு முன் இயற்கையில் இலை, கிளை வளர்ச்சி நிறுத்தப்பட்டு, நாவல் பழங்களை விதைக்காக அதிக அளவில்  உற்பத்தி செய்யும். பழங்கள் கொத்து கொத்தாய் அளவுக்கு அதிகமாகக்  காய்க்கும்.

2026-ஆம் ஆண்டில் நாவல் பழங்கள் தெருக்களில் குவியல் குவியலாக விற்பனைக்கு வந்தன. நாமும் நடைப்பயிற்சியின்போது கவனித்தோம். பருவம் தவறியும் நாவல் பழங்கள் மண்ணில் உதிர்ந்து கிடக்கின்றன; யாரும் கவனியாத ஒன்றையும் கவனித்தோம். பாதாம் மர சிவப்புக் கொட்டைகளும் அதிக அளவில் தரையில் கொட்டிக் கிடக்கின்றன. நதிகள் கூட ஆயிரம் ஆண்டுகளில் தங்கள் ஓட்டப் பாதையைப் புதிதாக மாற்றும் எனும் அறிவியல் அதிசயம் நம் கற்பனைக்கு எட்டாத ஒன்றாகும்.

திருவிவிலியத்தின் தொடக்க நூல் 41:6-7 வறட்சியின் அடையாளத்தை, ஒரு கனவு வழி இவ்வாறாக முன்னிறுத்துகிறது. “கீழைக்காற்றினால் தீய்ந்துபோன கதிர்கள் தோன்றின; அந்தப் பதரான கதிர்கள் ஏழும், செழுமையான முற்றிய கதிர்களை விழுங்கிவிட்டது.”

ஆம், வறட்சியும் செழுமையும் இயற்கையின் இரு பக்கங்கள். தென்னிந்தியாவின் நெற்களஞ்சியம் என்பது காவிரிப் படுகை சார்ந்த நெல் விவசாயமாகும். இது தஞ்சாவூர், திருவாரூர், நாகப்பட்டினம் ஆகிய மாவட்டங்களை உள்ளடக்கிய காவிரி நதிநீர் பாசனப் பகுதிகளாகும். தமிழர்கள் உலகிற்கே ஆண்டு முழுவதும் விவசாயம் செய்ய முடியும் எனக் கற்பித்தார்கள். தெற்காசிய நாடுகளை விவசாயமயமாக்கியதில் தமிழரின் பங்கு வரலாற்றுச் சிறப்பானதாகும்.

காவிரி நீரை நம்பிய டெல்டா பகுதி விவசாயம் 50 விழுக்காட்டிற்கும் மேற்பட்ட தமிழ்நாட்டு நெல் விளைச்சல் உற்பத்தியை உள்ளடக்கிய ஒன்றாகும். டெல்டா  நெல் விவசாயம் குறுவை, சம்பா, தாளடி என்ற முப்போக விவசாயமாகும். ஜூன் மாதம் முதல் செப்டம்பர் வரை 105 நாள்கள் முதல் 120 நாள்கள் வரை, நடைபெறும் முதல் போக விவசாயம் ‘குறுவை’ விவசாயமாகும். குறுவை நெல் விவசாயம் செய்யவேண்டுமெனில், மேட்டூர் அணைக் கட்டிலிருந்து ஜூன் 12-ஆம் தேதி பாசனத்திற்காகத் தண்ணீர் திறந்துவிடப்படவேண்டும். 2026 ஜூன் 11-ஆம் தேதி நிலவரப்படி மேட்டூர் அணையில் 120 அடி கொள்ளளவில் 80 அடி அளவே நீர் இருந்தது. மழைப் பொழிவும் சரியாக இல்லாத நிலை உள்ளது. பாசனம் தவிர பல கூட்டுக் குடிநீர் திட்டங்களுக்கும் அணை நீர் மிகத் தேவையான ஒன்றாகும். இன்று ஜூலை 25 அன்று 75 அடியாக உள்ளது. மேட்டூர் அணை கர்நாடகாவில் திறந்துவிடும் நீரின் அளவைப் பொறுத்தே  நிறையும். மழைப்பொழிவு இருந்து, அதிக நீரும் இருந்தால் மேட்டூர் அணைக்கு கர்நாடகா அரசு நீர் திறந்துவிடும். இல்லையெனில் ‘எங்களிடமே குடிநீருக்குத்தான் தண்ணீர் உள்ளது’ எனக் கூறி மறுத்துவிடும்.

2026 ஜூலை 22-ஆம் தேதி நடைபெற்ற காவிரி நீர் மேலாண்மை ஆணையக் கூட்டத்தில் தமிழ்நாட்டுப் பிரதிநிதிகள் நடப்பாண்டு ஜூன், ஜூலை மாதங்களுக்கான தமிழ்நாட்டுப் பங்கீட்டு நீரை கர்நாடக அரசு திறந்துவிடவேண்டும் என வலியுறுத்தினர். வழக்கம்போல் கர்நாடக அரசு ‘எங்களுக்கே வறட்சி’ எனக்கூறி மறுத்துவிட்டது. 2026, ஜூலை 28-ஆம் தேதி அடுத்த காவிரி நீர் மேலாண்மை ஆணையக் கூட்டம் என அறிவித்து விட்டார்கள்.

காவிரி நீர் குறித்துப் பேசவேண்டிய அரசியல் நிறைய உள்ளது; ஆனால், பேச வாய்ப்பில்லை. தமிழ்நாட்டில் டெல்டா பகுதிகளில் குறுவைப் பாசனம் இல்லை என்றாகிவிட்டது. நிலத்தடி நீரும் 300 அடிக்குக் கீழ் சென்று உப்பு நீராகிவிட்டது. ஆடி மாதங்களில் கரைபுரண்டு ஓடும் காவிரி நதி இல்லை. டெல்டா மாவட்டங்கள் பாலைவனமாக மாறிவிட்டன. கால்நடைகளுக்குக் குடிக்க நீர் தேடும் அவலம் விவசாயிகளின் பெரும் சோகமாகும். வயல்வெளிகள் பாளம் பாளமாக வெடித்து, வறட்சியின் தீவிரம் பேசுகிறது. அரிசி விலை ஜூலை 25 அன்றைய நிலவரப்படி கிலோ ஒன்றுக்கு ரூபாய் 15 உயர்ந்துள்ளது. இவ்வளவு நெருக்கடிகள் இருந்தும், டெல்டாவின் நெல் கொள்முதல் நிலையங்களில், கொள்முதல் செய்யப்பட்ட நெல் மூடைகள் (சிப்ப அளவிலானது) அரவைக்குச் செல்லாமல் பல இடங்களில் திறந்தவெளியில் பாதுகாக்கப்படுகின்றன.

உலகளாவிய ‘உணவுப் பஞ்சம்’ என்ற வல்லுநர்களின் எச்சரிக்கையைக் கவனத்தில் கொள்ள வேண்டியது காலத்தின் கட்டாயமாகும். மாற்றாக ‘பூச்சி உணவுகள்’ என்ற கருத்து உருவாக்கம் உலக அளவில் பேசப்படுகிறது. இது குறித்த கட்டுரைகளும் கருத்தரங்குகளும் உலகின் பெரும் கவனம் பெற்றுள்ளது. தேசங்களின் விவசாயமும், மக்களின் உணவுப் பாதுகாப்பும் கேள்விக்குறியாகி உள்ளது. உலகளாவிய பருவநிலை மாற்றம் என்ற ‘எல் நினோ’ என்பதே இதன் முக்கியக் காரணியாகும். இது ஐந்து ஆண்டுகள் முதல் 12 ஆண்டுகள் பருவநிலையைப் பாதிப்படையச் செய்வதாகும். புவி வெப்பமயமாதலின் பிரதிபலிப்பே ‘எல் நினோ’ என்பதாகும்.

இயற்கையாகவே கடல், வளி மண்டலச் சுழற்சியில் ஏற்படும் வெப்பம், காற்றின் மாறுதல், உலகின் ஒரு பகுதியில் வெள்ளப்பெருக்காகவும், மறு பகுதியில் வறட்சியாகவும் மாறும். கடல் மட்டமும், பூமியின் வெப்பமும் உயரும். வெப்பமயமாதலால் மனிதர்களுக்கு வித்தியாசமான நோய்களும் புதிதாக ஏற்பட வாய்ப்புள்ளதாகத் தெரிய வருகிறது.

இந்தியா போன்ற நாடுகளில் பல்வேறு பூமி அமைப்புகளும் தட்ப வெப்ப நிலைகளும் காணப்படுகின்றன. வறட்சியும் வெள்ளப்பெருக்கும் ஒரே நாளில் இந்தியத் தேசத்தின் தலைப்புச் செய்திகளாக உள்ளன. பாரதி காலம் முதல் ‘கங்கையையும் காவிரியையும் இணைப்போம்’ என்ற வெற்று முழக்கங்கள் அரசியலில் காணப்படுகிறது. விவசாயத்தின் அடிப்படையே நீர் என்ற உண்மையும் அரசுகளால் மறுக்கப்படுகிறது.

நம் தேசம் ‘எல் நினோ’வால் பாதிக்கப்படும் ஐந்தாண்டு அபாயம் உள்ளதால், அரசுகள் மக்களின் உணவுப் பாதுகாப்பை உறுதிசெய்ய வேண்டும். உணவுப் பதுக்கலையும், கள்ளச்  சந்தையையும் இரும்புக்கரம் கொண்டு ஒடுக்கவேண்டும். அரசு உணவுப்பொருள் விலையைக் கட்டுப்பாட்டில் வைத்திருக்க, தானிய சேமிப்பில் உறுதித்தன்மை கொண்டிருக்கவேண்டும். அதற்கேற்ப, தன் ஏற்றுமதி, இறக்குமதியில் தேவையான கணக்கீடுகளில், புள்ளி விவரங்களில் தெளிவுவேண்டும். அடிப்படை நேர்மைவேண்டும். தேசத்தில் கையறு நிலையில் உள்ள மக்கள் என்ன செய்ய முடியும்? வாருங்கள், அனைவரும் ஒருங்கிணைந்து, நல்ல பருவங்களுக்காக, நல்ல காலநிலைகளுக்காக, நல்ல பருவமழைக்காக இறைவேண்டல் செய்வோம்.

தமிழ்நாடு கத்தோலிக்கத் திரு அவையில்  ஆகஸ்டு 10 அன்று தலித் கிறித்தவர்களின் நீண்டகால உரிமை கோரிக்கைகளை வலியுறுத்தும் வகையில் கறுப்பு நாள் கடைப்பிடிக்கப்படுகிறது.

இது ஒருநாள் அடையாள நிகழ்வாக மட்டும் முடிவடைந்துவிடக் கூடாது. இந்திய அரசமைப்பு உறுதி செய்துள்ள சமத்துவம், சமூகநீதி, மனித மாண்பு மற்றும் சமமான வாய்ப்புக்கான உரிமையை நடைமுறைப்படுத்தும் நீண்டகால மக்கள் இயக்கமாக இது வளரவேண்டும்.

கடந்த பல ஆண்டுகளாகத் தலித் கிறித்தவர்கள் எதிர்கொள்ளும் இடஒதுக்கீட்டு மறுப்பு, கல்வி வாய்ப்புகளில் உள்ள ஏற்றத்தாழ்வு, வேலை வாய்ப்புப் பின்தங்கல் மற்றும் சமூக அநீதிகள் குறித்து எண்ணற்ற கருத்தரங்குகள், தீர்மானங்கள், உண்ணாவிரதங்கள், ஆர்ப்பாட்டங்கள் நடைபெற்றுள்ளன. ஆனால், அவை பெரும்பாலும் ஒருநாள் நிகழ்வுகளாகவே முடிந்துவிட்டன. இனி அந்த அணுகுமுறை மாறவேண்டும். இந்தப் போராட்டம் ‘ஒருநாள் கண்டனம்’ என்பதிலிருந்து ‘தொடர்ச்சியான கொள்கை மாற்ற இயக்கம்’ என்ற புதிய கட்டத்திற்கு நகரவேண்டும்.

கடந்த பத்து ஆண்டுகளில் தமிழ்நாட்டில் மருத்துவக் கல்வியில் குறிப்பிடத்தக்க வளர்ச்சி ஏற்பட்டுள்ளது. 2014-ஆம் ஆண்டு மாநிலத்தில் மொத்த MBBS இடங்கள் சுமார் 5,850 மட்டுமே இருந்த நிலையில், புதிய அரசு மருத்துவக் கல்லூரிகள் தொடங்கப்பட்டதன் மூலம் இன்று சுமார் 14,000 MBBS இடங்கள் உள்ளன. ஒரே கட்டமாக 11 புதிய அரசு மருத்துவக் கல்லூரிகள் தொடங்கப்பட்டிருப்பது இந்திய அளவிலும் குறிப்பிடத்தக்க சாதனையாகும். இதன் காரணமாக மருத்துவக் கல்வி வாய்ப்புகள் பல மடங்கு அதிகரித்துள்ளன.

தமிழ்நாட்டில் நடைமுறையில் உள்ள 69% இடஒதுக்கீட்டுக் கொள்கை காரணமாக ஆதிதிராவிடர் (SC/SCA) மாணவர்களுக்கு ஆண்டுதோறும் குறிப்பிடத்தக்க அளவில் மருத்துவக் கல்வி வாய்ப்புகள் கிடைத்து வருகின்றன. அரசு மருத்துவக் கல்லூரிகளின் மாநில ஒதுக்கீட்டு இடங்களில் மட்டுமே ஆண்டுதோறும் 850-க்கும் மேற்பட்ட MBBS இடங்கள் SC/SCA மாணவர்களுக்குக் கிடைக்கின்றன. இதனுடன், தனியார் மருத்துவக் கல்லூரிகளின் அரசு ஒதுக்கீட்டு இடங்களும் அவர்களுக்குக் கூடுதல் வாய்ப்புகளை வழங்குகின்றன. மேலும், அரசுப் பள்ளிகளில் 6 முதல் 12-ஆம் வகுப்பு வரை படித்த மாணவர்களுக்காக தமிழ்நாடு அரசு அறிமுகப்படுத்திய 7.5% உள் ஒதுக்கீடு கல்வி வரலாற்றில் மிக முக்கியமான சமூகநீதித் திட்டமாக மாறியுள்ளது. 2025-26 கல்வியாண்டில் இந்த உள் ஒதுக்கீட்டின் மூலம் சுமார் 650 அரசுப் பள்ளி மாணவர்கள் மருத்துவக் கல்வியில் சேரும் வாய்ப்பைப் பெற்றுள்ளனர். இந்தத் திட்டம் முதல் தலைமுறை பட்டதாரிகள் உருவாகவும், கிராமப்புற மற்றும் பொருளாதார ரீதியாகப் பின்தங்கிய குடும்பங்களின் வாழ்க்கைத் தரம் உயரவும் முக்கியக் காரணமாக அமைந்துள்ளது.

ஆனால், இந்த வளர்ச்சியின் முழுப் பலனும் மதம் மாறிய தலித் கிறித்தவர்களுக்குக் கிடைப்பதில்லை. சமூக, பொருளாதார மற்றும் கல்வி ரீதியாக ஆதிதிராவிட இந்து மாணவர்களுக்கு ஒப்பான நிலையிலேயே வாழ்ந்தாலும், கிறித்தவ மதத்திற்கு மாறிய தலித் சமூகத்தினர் தற்போதைய 1950 குடியரசுத்தலைவர் ஆணையின் காரணமாக ஆதி திராவிடர் (SC)   இடஒதுக்கீட்டைப் பெற முடியாத நிலை தொடர்கிறது. இதன் விளைவாக அவர்கள் மத்திய அரசின் SC இடஒதுக்கீடு, பல்வேறு கல்விச் சலுகைகள் மற்றும் வேலைவாய்ப்புகளில் இருந்து விலக்கப்படுகின்றனர். இதுவே சமூகநீதிக்கான மிகப்பெரிய முரண்பாடாகும்.

அது மட்டுமல்லாமல், தமிழ்நாட்டில் பெரும்பாலான தலித் கிறித்தவ மாணவர்கள் அரசு உதவி பெறும் கிறித்தவப் பள்ளிகளில் கல்வி பயில்கின்றனர். ஆனால், தற்போது அரசுப் பள்ளி மாணவர்களுக்கு மட்டுமே வழங்கப்படும் 7.5% உள் ஒதுக்கீட்டின் பயன், அதே பொருளாதார மற்றும் சமூகப் பின்னணியைக் கொண்ட அரசு உதவி பெறும் பள்ளி மாணவர்களுக்குக் கிடைப்பதில்லை. இதன் விளைவாக, ஒரே கிராமத்தில் வாழும், ஒரே குடும்ப வருமானம் கொண்ட, ஒரே சமூகத்தைச் சேர்ந்த இரண்டு மாணவர்களில் ஒருவர் அரசுப் பள்ளியில் படித்ததால் மருத்துவக் கல்வி வாய்ப்பைப் பெறுகிறார்; மற்றொருவர் அரசு உதவி பெறும் பள்ளியில் படித்ததால் அந்த வாய்ப்பை இழக்கிறார். இந்த வேறுபாடு சமூக நீதியின் அடிப்படை நோக்கத்தையே கேள்விக்குள்ளாக்குகிறது.

ஒரு குடும்பத்தில் முதல் தலைமுறை மருத்துவர், பொறியாளர், ஆசிரியர் அல்லது அரசு அதிகாரி உருவாகும்போது, அந்த மாற்றம் அந்த ஒரே நபரிடம் முடிவதில்லை. அந்தக் குடும்பத்தின் பொருளாதார நிலை, அடுத்த தலைமுறையின் கல்வி, பெண்களின் முன்னேற்றம், சுகாதார விழிப்புணர்வு மற்றும் சமூக மரியாதை ஆகிய அனைத்திலும் அதன் தாக்கம் பிரதிபலிக்கிறது. எனவே, தலித் கிறித்தவர்களின் இடஒதுக்கீட்டு உரிமை என்பது வேலை வாய்ப்பிற்கான கோரிக்கை மட்டுமல்ல; அது பல தலைமுறைகளை முன்னேற்றும் சமூக முதலீடு.

இந்திய அரசமைப்பின் 14-வது பிரிவு, சட்டத்தின் முன் சமத்துவத்தை உறுதி செய்கிறது. 15-வது பிரிவு, சமூக மற்றும் கல்வி ரீதியாக பின்தங்கிய மக்களின் முன்னேற்றத்திற்கான சிறப்பு நடவடிக்கைகளை அனுமதிக்கிறது. 16-வது பிரிவு, அரசு வேலை வாய்ப்புகளில் சமமான வாய்ப்பை உறுதி செய்கிறது. பிரிவு 21A, கல்வி உரிமையை வலியுறுத்துகிறது. பிரிவு 46, வழிகாட்டும் கொள்கை சமூக மற்றும் கல்வி ரீதியாகப் பின்தங்கிய மக்களின் கல்வி மற்றும் பொருளாதார முன்னேற்றத்தை ஊக்குவிப்பது அரசின் கடமை என்று தெளிவாகக் கூறுகிறது. எனவே, தலித் கிறித்தவர்களின் உரிமை கோரிக்கை அரசமைப்பின் அடிப்படை நோக்கங்களோடு ஒத்துப்போகும் ஒரு சமூகநீதி கோரிக்கையாகும்.

இன்றைய காலகட்டத்தில் எந்த உரிமைப் போராட்டமும் உணர்ச்சியின் அடிப்படையில் மட்டும் வெற்றிபெற முடியாது. மக்கள்தொகை, கல்வி நிலை, பள்ளி இடைநிற்றல், உயர்கல்வி சேர்க்கை, மருத்துவக் கல்வி வாய்ப்புகள், வேலைவாய்ப்பு, வறுமை, நிலமின்மை மற்றும் அரசின் நலத்திட்டங்களைப் பெறும் நிலை போன்ற அனைத்துத் தரவுகளையும் அறிவியல் முறையில் சேகரித்து வெள்ளை அறிக்கையாக வெளியிட வேண்டும். இத்தகைய தரவுகள் நீதிமன்றங்களிலும், நாடாளுமன்ற விவாதங்களிலும் மற்றும் அரசின் கொள்கை முடிவுகளிலும் வலுவான ஆதாரங்களாக அமையும்.

எனவே, ஆகஸ்ட் 10 கறுப்பு நாள் வெறும் கறுப்பு ஆடை அணியும் நிகழ்வாக இருக்கக்கூடாது. தமிழ்நாட்டின் 39 மக்களவை உறுப்பினர்கள் மற்றும் 18 மாநிலங்களவை உறுப்பினர்களைச் சந்தித்து, மதம் மாறிய தலித் கிறித்தவர்களின் இடஒதுக்கீட்டு உரிமை குறித்து நாடாளுமன்றத்தில் சிறப்புக் கவன ஈர்ப்பு தீர்மானம் கொண்டுவர வலியுறுத்தவேண்டும். தமிழ்நாடு முதலமைச்சர், உயர்கல்வித் துறை அமைச்சர், பள்ளிக்கல்வித் துறை அமைச்சர் மற்றும் அனைத்து அரசியல் கட்சித் தலைவர்களையும் சந்தித்து, அரசுப் பள்ளி மாணவர்களுக்கு வழங்கப்படும் 7.5ரூ உள் ஒதுக்கீட்டை அதே சமூக மற்றும் பொருளாதார சூழ்நிலையில் கல்வி பயிலும் அரசு உதவி பெறும் பள்ளி மாணவர்களுக்கும் விரிவுபடுத்துவதற்கான சாத்தியத்தை தமிழ்நாடு அரசு பரிசீலிக்கவேண்டும் என்று வலியுறுத்தவேண்டும். உச்ச நீதிமன்றத்தில் நிலுவையில் உள்ள வழக்குகள் விரைவாக விசாரணைக்கு வருவதற்கான சட்ட நடவடிக்கைகளை ஒருங்கிணைக்க வேண்டும். நீதியரசர் கே. ஜி. பாலகிருஷ்ணன் தலைமையிலான ஆணையத்திற்குத் தலித் கிறித்தவர்களின் சமூக, பொருளாதார மற்றும் கல்வி நிலையை வெளிப்படுத்தும் ஆதாரப்பூர்வமான தரவுகளைச் சமர்ப்பிக்க வேண்டும்.

இதனுடன், ஒவ்வொரு மறைமாவட்டத்திலும் தலித் கிறித்தவர்களின் கல்வி, வேலைவாய்ப்பு, சமூக முன்னேற்றம் மற்றும் அரசின் நலத்திட்டங்களைப் பெறும் நிலை குறித்து ஆண்டுதோறும் ஆய்வு அறிக்கை வெளியிட வேண்டும். சட்ட நிபுணர்கள், கல்வியாளர்கள், சமூக ஆராய்ச்சியாளர்கள், பொருளாதார வல்லுநர்கள், மருத்துவர்கள் மற்றும் இளைஞர் பிரதிநிதிகள் இணைந்த நிரந்தர செயற்குழுவை உருவாக்கி, மாநில மற்றும் தேசிய அரசுகளிடம் தொடர்ச்சியான கொள்கைப் பரிந்துரைகளை முன்வைக்கவேண்டும்.

இந்தப் போராட்டம் தலித் கிறித்தவர்களின் போராட்டமாக மட்டும் இருக்கக்கூடாது. கிறிஸ்துவின் நற்செய்தி மனித சமத்துவம், சகோதரத்துவம் மற்றும் மனித மாண்பை வலியுறுத்துகிறது. “நீங்கள் அனைவரும் கிறிஸ்து இயேசுவுக்குள் ஒன்றாயிருக்கிறீர்கள்” (கலா 3:28) என்ற இறைவார்த்தை, இந்தப் போராட்டத்தின் ஆன்மிக அடித்தளமாக இருக்கவேண்டும். எனவே, கத்தோலிக்கத் திரு அவையின் அனைத்துப் பணிக்குழுக்கள், மறைமாவட்டங்கள், பங்குகள், துறவற சபைகள், கல்வி நிறுவனங்கள், இளைஞர் இயக்கங்கள், பெண்கள் இயக்கங்கள் மற்றும் பொதுநிலையினர் இந்த இயக்கத்தில் பொறுப்புடன் பங்கேற்க வேண்டும். இது ஒரு குறிப்பிட்ட சமூகத்தின் உரிமைப் போராட்டமாக அல்லாமல், சமூகநீதிக்காகக் கிறித்தவச் சமூகம் ஒன்றிணையும் இயக்கமாக மாற வேண்டும்.

இன்று நாம் கேட்பது சலுகை அல்ல; சமூக நீதியின் அடிப்படையில் கிடைக்கவேண்டிய சமமான வாய்ப்பையே. கல்வி என்பது ஒரு சமூகத்தின் எதிர்காலத்தை மாற்றும் சக்தி. அந்தக் கல்விக்கான கதவு, ஒரே சமூகப் பின்னணியைக் கொண்ட இரண்டு குழந்தைகளுக்கு, அவர்கள் எந்த மதத்தைச் சார்ந்தவர்கள் என்பதற்காக வெவ்வேறு விதமாகத் திறக்கப்படக்கூடாது.

ஆகஸ்ட் 10 கறுப்பு நாள் என்பது வெறும் கறுப்பு ஆடை அணியும் நாளாகவோ, கண்டன முழக்கங்கள் எழுப்பும் நாளாகவோ இருக்கக்கூடாது. அது தலித் கிறித்தவர்களின் உரிமைக் குரலை இந்திய நாடாளுமன்றத்திற்கும், தமிழ்நாடு சட்ட மன்றத்திற்கும், நீதித்துறைக்கும், நாட்டின் மனசாட்சிக்கும் கொண்டு செல்லும் வரலாற்றுச் சிறப்புமிக்க நாளாக மாறவேண்டும். இந்தப் போராட்டத்தின் வெற்றி ஒருநாள் நிகழ்வில் இல்லை; ஒரு தலைமுறையின் கல்வி வாய்ப்பை மாற்றும் சட்ட மற்றும் கொள்கை மாற்றங்களை உருவாக்குவதில்தான் உள்ளது. சமூகநீதி என்பது ஒரு கோஷமல்ல; அது ஒவ்வொரு குழந்தைக்கும் சமமான எதிர்காலத்தை உறுதி செய்யும் அரசமைப்பின் வாக்குறுதியாகும். ஆகஸ்டு 10 கறுப்பு நாள், அந்த வாக்குறுதியை நனவாக்கும் புதிய வரலாற்றின் தொடக்கமாக அமையட்டும்.

தமிழ்நாடு சிறைப்பணி அமைப்பானது சிறைக்கைதிகளுக்கும், அவர்களின் குடும்பம் மற்றும் பாதிக்கப்பட்டவர்களின் குடும்பத்தினருக்கும் மறுவாழ்வு மற்றும் அவர்களின் நலனுக்காக உழைக்கும் தேசியத் தன்னார்வ இயக்கமாகும். இது இந்தியக் கத்தோலிக்க ஆயர் பேரவையால் யூபிலி 2000-ஆம் ஆண்டில் இந்தியச் சிறைப்பணியாக அங்கீகரிக்கப்பட்டது.

நமது தன்னார்வத் தொண்டர்கள் ஏறக்குறைய நாடு முழுவதும் 850 பிரிவுகளில் வெவ்வேறு நிகழ்வுகளின் மூலம் குறிப்பாக, ஆற்றுப்படுத்துதல், மருத்துவ முகாம், இலவசச் சட்ட உதவிகள், வேலை சம்பந்தமான பயிற்சி முகாம்கள் மூலமாக இந்தியாவில் உள்ள சிறைகளில் மிகவும் தியாக உள்ளத்தோடு சிறப்பாகப் பணியாற்றி வருகிறார்கள். குறிப்பாக, வெளிநாட்டுச் சிறைவாசிகள் நமது இந்தியச் சிறைகளில் மொழி அறியாது வாடி வருகின்றனர். அவர்களது குரலைக் கேட்டு நமது தாயாம் திரு அவை அந்நாட்டுத் தூதர்கள், ஆயர்கள் மற்றும் அருள்பணியாளர்களைத் தொடர்பு கொண்டு அவர்களது குடும்பத்தினரோடு இணைத்து வைப்பது நமது சிறப்புப் பணியாகும்.

புனித மாக்சிமிலியன் கோல்பே தன்னுடைய துணிவான வாழ்வு முறையால் சிறைக்கைதிகளைப் பாதுகாப்பதில் சிறந்த எடுத்துக்காட்டாக விளங்குகிறார். புனித கோல்பே இரண்டாம் உலகப் போரின்போது சிறைபிடிக்கப்பட்டுத் தீவிர கண்காணிப்பு முகாமுக்கு அனுப்பப்பட்டார். இவர் சிறைக்கைதிகளோடு இருந்தபோது தனக்காக அளிக்கப்பட்ட சிறிதளவு உணவையும் மற்றவர்களோடு பகிர்ந்துகொண்டார். பலரைச் சிறப்பானதோர் ஒப்புரவு அருள்சாதனம் பெற ஆயத்தம் செய்து, அவர்களுக்காகச் செபம் செய்தார்.

இறுதியாக, ஒரு சகோதரருக்காகத் தனது உயிரைத் தியாகம் செய்து, இன்றைய உலகில் யாரும் செய்ய இயலாத செயலை அன்று செய்து முடித்தார். இந்தத் தியாக மனநிலை பகிர்தல், தனக்கு முக்கியம் என்று கருதுகின்ற சில பொருள்கள், செபம், நேரம், பணம் மற்றும் நம்வாழ்வுமுறை ஆகியவற்றை இன்று இயேசு நம்மிடமிருந்து எதிர்பார்க்கிறார்.

தமிழ்நாட்டில் 9 மத்தியச் சிறைச்சாலைகள், 5 பெண்கள் தனிச் சிறைச்சாலைகள், 10 மாவட்டச் சிறைச்சாலைகள், 3 திறந்தவெளி சிறைச்சாலைகள் மற்றும் கிளை சிறைச்சாலைகள் உள்பட 120 சிறைச்சாலைகளில் ஏறக்குறைய 22,631 சிறைவாசிகள் நமது வரவுக்காகக் காத்துக் கொண்டிருக்கின்றனர். 18 மறைமாவட்டங்களில் மறைமாவட்ட ஆயர்களது மேற்பார்வையில் சிறைவாசிகளின் குழந்தைகளுக்குக் கல்வி உதவி, சிறைவாசிகளின் குடும்பங்களுக்குப் பொருளாதார உதவி, வாழ்வாதார உதவி, சிறைவாசிகளுக்கு மன ஆற்றுப்படுத்துதல், சிறைப்பணி தன்னார்வத் தொண்டர்கள் வழியாக நடைபெற்று வருகிறது.

சென்னை-மயிலை உயர்மறைமாவட்டப் பேராயரின் உதவியுடன் உற்றார்-உறவினர் இல்லாதவர்களுக்கு மறுவாழ்வு இல்லம் ஒன்று திருத்தணி அருகே கே.ஜி. கண்டிகை கிராமத்தில் ஆரம்பிக்கப்பட்டு, சிறைவாசிகள் தங்களுக்கு ஒருவருமில்லை என்ற மன ஏக்கத்தை மாற்றும் முயற்சியாக இந்த இல்லம் செயல்பட்டு வருகிறது.

மேலும், இம்மடலின் வழியாக, பேராயர்கள், ஆயர்கள், மாநிலக்குழு மற்றும் தமிழ்நாடு சிறைப்பணியின் 18 மறைமாவட்ட ஒருங்கிணைப்பாளர்களுக்கு எங்கள் மனமார்ந்த நன்றியைத் தெரிவித்துக்கொள்கிறோம். தன்னார்வலர்களை ஒருங்கிணைத்தல், சிறைச்சாலை சந்திப்பில் திரு அவையின் பிரசன்னத்தைக் கொண்டுவருதல் போன்ற அவர்களது இடைவிடாத முயற்சிகள் விலைமதிப்பற்றவை.

தமிழ்நாட்டில் உள்ள எங்கள் 18 மறைமாவட்டக் குழுக்களின் அருள்பணியாளர்கள், துறவறத்தார் மற்றும் பொதுநிலையினரின் அசைக்க முடியாத அர்ப்பணிப்பையும் நாங்கள் உளமார அங்கீகரிக்கிறோம். மறக்கப்பட்டவர்களுடன் நடந்து, சட்ட உதவியை எளிதாக்கி, சிறை நண்பர்களின் குடும்பங்களுக்கு மன ஆலோசனை, வாழ்வாதார உதவி மற்றும் அவர்களின் பிள்ளைகளுக்குக் கல்வி உதவி என விடாமுயற்சியுடன் பணிபுரிந்து வருகிறார்கள். அவர்களின் தன்னலமற்ற சேவை நம்பிக்கை இல்லாத இடத்தில் நம்பிக்கையைக் கொண்டு வருகிறது.

இளைஞர் இயேசுவில் அன்பிற்கினிய ஆண் - பெண் இளையோரே, அருள்பணியாளர்களே, ஆண் - பெண் துறவியரே, இளைஞர் பணியில் ஈடுபட்டு உழைக்கும் இயக்குநர்களே, வழிகாட்டிகளே! இளைஞர் இயேசுவின் அருளும், புதுப்பிக்கும் தூய ஆவியாரின் வழிநடத்துதலும், தாயும் தந்தையுமான கடவுளின் உடனிருப்பும் உங்கள் அனைவரோடும் இருப்பதாக!

இவ்வாண்டு முழுவதும் இளையோரை ஆற்றல்படுத்தும் கருப்பொருளாக “துணிவுடன் இருங்கள்! நான் உலகின்மீது வெற்றி கொண்டு விட்டேன்” (யோவா 16:33) எனும் இறைவார்த்தை உலகளாவிய திரு அவையால் தரப்பட்டுள்ளது.

இளைஞர் இயேசுவின் நட்புடன் அவரின் விழுமியங்களை வாழ்வாக்கும் இளைஞர் பலர் துணிவுடன் உண்மைக்குச் சான்று பகர்வதையும், பொதுநலப்பணிகளில் மிளிர்வதையும், சமூக நயன்மையை (நீதியை) நிலைநாட்டுவதையும், கிறித்தவ நம்பிக்கையை வாழ்ந்து காட்டுவதையும், ஏழைகளின் ஏக்கக் குரல் கேட்டு அவர்களுக்காக ஈகம் செய்வதையும், எளியோர் சார்பெடுத்து அவர்களுக்குரிய வாழ்வுரிமைகளை மீட்டெடுக்கப் போராடுவதையும் அவ்வப்போது கண்டு மகிழ்கிறோம். இயேசுவின் அன்புறவில் இணைக்கப்பட்ட இளையோர் தங்கள் தனிப்பட்ட வாழ்வில் நேர்மையுடனும் உண்மையுடனும் துணிவுடனும் நயன்மையுடனும் (நீதியுடனும்) சுதந்திரத்துடனும் பொறுப்புடனும் இலட்சியத் தெளிவுடனும் வாழ்வதையும் நாம் காணத் தவறுவதில்லை.

காங்கோ நாட்டின் தரக் கட்டுப்பாட்டு அலுவலகத்தில் தர ஆய்வாளராகப் பணியாற்றிய 26 வயதான ஃப்ளோரிபெர்ட் பவானா சுய் (Florivert Bwana Chuii) என்ற இளைஞனின் வாழ்வை ஓர் எடுத்துக்காட்டாக உங்களுக்குத் தர விரும்புகிறேன். உங்களைப் போல ஒரு சிறந்த கிறித்தவ இளைஞனாக வாழ்ந்த ஃப்ளோரிபெர்ட், நீங்கள் கிறித்தவக் கடமைகளை ஆற்றுவது போலவே எளிய மக்களுக்கும், தெருவோரக் குழந்தைகளுக்கும் உதவுவதைத் தனது அன்றாடக் கடமையாகக் கொண்டிருந்தார். தான் பணியாற்றிய காங்கோ நாட்டின் கோமா நகருக்குக் கடத்தல் கும்பல், கப்பல் வழியாகத் தரமற்ற, கெட்டுப்போன உணவுப் பொருள்களைக் கடத்த முயற்சித்தபோது அதை நேர்மையுடன் தடுத்தார்.

ஆயிரக்கணக்கான டாலர்களைக் கடத்தல்காரர்கள் வழங்க முன்வந்தபோது, அதை வாங்கத் திட்டவட்டமாக மறுத்தார். “பணத்திற்காக ஆயிரக்கணக்கான ஏழை மக்களின் உயிரை என்னால் பணயம் வைக்க இயலாது; எனது கிறித்தவ மனச்சான்று இதற்கு ஒருபோதும் இடம் தராது” என்று கூறி துணிச்சலுடன் கெட்டுப்போன உணவுகளை அழிப்பதற்கான உத்தரவைப் பிறப்பித்தார்.

ஆத்திரமுற்ற அந்தக் கடத்தல் கும்பல் 2007 சூலை 09 அன்று நேர்மையோடும் துணிவோடும் கிறித்தவ மனச்சான்றோடும் நிலைப்பாடு எடுத்த 26 வயதான இளைஞனைக் கொடும் வதைசெய்து, கொன்று கோமா நகரின் தெருவில் வீசி எறிந்தது. இளைஞர் இயேசுவின் உண்மைக்கான துணிவைத் தன் வாழ்வில் கடைப்பிடித்த அந்த இளைஞனை நினைவில் வாழும் திருத்தந்தை பிரான்சிஸ் மறைச்சாட்சியாக அறிவித்தார். திருத்தந்தை லியோ 2025 சூன் 15 அன்று இவரை அருளாளராக அறிவித்தார். இவர் அன்றாடம் வாசித்து கிறித்தவ மனச்சான்றில் வேரூன்ற வழிகாட்டிய இவரது விவிலியம் உரோமை நகரிலுள்ள புனித பர்த்தலமேயு பெருங்கோவிலில் நினைவுச் சின்னமாக வைக்கப்பட்டுள்ளது.

அன்புமிக்க இளையோரே! நீங்கள் அன்றாடம் இறைவார்த்தையை வாசிக்கிறீர்களா? உங்கள் திருவிவிலியம் உங்களை இறையாட்சி விழுமியங்களின்படி துணிவுடன் செயல்பட அனுமதிக்கின்றதா? இன்று இளைஞர் பலர் அச்சத்திலேயே வாழ்கிறார்கள். தாழ்வு மனப்பான்மையிலும், தம்மை ஏற்க இயலா நிலையிலும், குற்றப்பழி உணர்விலும் தன்னம்பிக்கையின்மையிலும் உழல்கிறார்கள். இணையவழி அச்சுறுத்தல், ஊடக அடிமைத்தனம், பாலுணர்வைத் தூண்டும் படங்கள், இணைய விளையாட்டுகள் போன்றவற்றால் முடமாக்கப்படுகிறார்கள். வேலைவாய்ப்பின்மை, பாதுகாப்பற்ற, நிலைத்தன்மையில்லா வேலை, அச்சுறுத்தும் தகுதித்தேர்வுகள், ஏழைகளின் உயர்கல்வி வாய்ப்பினைப் பறிக்கும் கல்விக் கொள்கைகள், மும்மொழிக் கொள்கைத் திணிப்பு போன்றவைகளால் நிலைகுலைக்கப்படுகிறார்கள்.

ஆணவப் படுகொலை, சாதியப் பாகுபாடு, காவல்நிலையப் படுகொலைகள், பாலியல் வன்கொடுமைகள், கவர்ச்சி அரசியல், நாயக வழிபாடு, சுற்றுச்சூழலைச் சீர்குலைக்கும் திட்டங்கள், வாழும் உரிமையை மறுக்கும் அரசாணைகள் போன்றவற்றால் சிதைக்கப்படுகிறார்கள். அக, புறக் காரணிகளால் அச்சத்தில் வாழும் இளையோருக்காக நம் திரு அவை கண்ணீர் வடிக்கிறது (கிறிஸ்து வாழ்கிறார் எண்:75).

இளைஞர்களின் அச்சங்களை நீக்கித் துணிவூட்டக் காத்துக் கொண்டிருக்கிறார் இளைஞர் இயேசு. “உலகில் உங்களுக்குத் துன்பம்  உண்டு; எனினும் துணிவுடன் இருங்கள்!” என்கிறார். உங்கள் துயரம் மகிழ்ச்சியாக மாறுமென உறுதியூட்டுகிறார். இளைஞர் இயேசு தமது வரலாற்று வாழ்வில் ஒடுக்கப்பட்ட நிலையில், அச்சத்தில் வாழ்ந்த ஏழையர், சமாரியர், நோயுற்றோர், நாடிழந்து அடிமையானோர், பெண்கள், யாருமற்றோர் போன்றோருக்குத் தமது உடனிருப்பால், வார்த்தையால், நலமாக்கும் செயல்களால், வல்ல செயல்களால், விழிப்புணர்வாக்குதலால், விடுதலைச் செயல்களால் துணிவூட்டினார். அதுபோலவே, தந்தை இறைவனோடு கொண்டிருந்த நெருக்கமான உறவால், இறைத் தந்தையின் திருவுளம் அறிந்ததால், தம்மைப் பற்றிய தெளிவான புரிதலால், இறையாட்சி எனும் பொதுமைத் தத்துவத்தால், தமது இலட்சியத் தெளிவால், ஆழ, அகலமான சுதந்திரத்தால், அடிமைத்தனங்களில்லாத் தூய்மையால், பகுத்தாயும் பார்வையால், அளவற்ற அன்பால், ஈடில்லா ஈகத்தால் இவ்வுலகின்மீது வெற்றி கொண்டார்.

இன்று பல்வேறு அச்சங்களால் அலைக்கழிக்கப்படும் இளைஞர்களை வலுவூட்ட இளைஞர் இயேசு நமக்கு ஆழமான அழைப்பு விடுக்கிறார். “கவனச் சிதறல்களிலிருந்து விலகி, கிறிஸ்துவுடன் ஆழமான நட்பை வளர்த்து, பிளவுபட்ட உலகில் அமைதியின் செயலூக்கமுள்ள தூதுவர்களாக வாழுங்கள்” என்று திருத்தந்தை லியோ இளையோருக்கு அழைப்பு விடுக்கிறார். “உங்கள் பாதுகாப்பு வளையங்களைத் தாண்டி அமைதியைக் கட்டி எழுப்புங்கள்” என்ற சிறப்புச் செயல்பாட்டிற்குத் திசைகாட்டுகிறார்.

துணிவுடன் வாழ நாம் இளைஞர் இயேசுவின் ஆழமான நட்பு வளையத்திற்குள் நம்மை இணைப்போம். இளைஞர் இயேசுவோடு நெஞ்சார்ந்து உரையாடுவோம்; உறவாடுவோம். இளைஞர் இயேசு தமது சீடர்களோடு இணைந்து இயக்கமாகச் செயல்பட்டது போன்று எல்லாப் பங்குகளிலும் ஆண்-பெண் இளைஞர் இயக்கங்கள் உருவாக்கப்பட்டு, தமிழ்நாடு திரு அவையின் இளைஞர் பணிக்கான கொள்கையின் அடிப்படையில் செயல்படுவோம்.

உளச்சிக்கல்களில் வாழும் இளையோருக்கு உளநல உதவிகள் வழங்கிட மறைவட்ட, மறைமாவட்ட அளவில் உளநல ஆலோசகர்களை நியமிப்போம். மனநல முகாம்களை நடத்துவோம். இணைய அடிமைத்தனம், போதை நோய் போன்ற அடிமைத்தனங்களிலிருந்து இளையோர் வெளிவர மறுவாழ்வு மையங்களைப் பயன்படுத்துவோம். தொடர் வழிகாட்டுதல்கள், அருள்வாழ்வுப் பயிற்சிகளை வழங்குவோம்.

மாவட்ட அளவில் இளையோருக்கான வேலைவாய்ப்பு முகாம்கள் நடத்துவோம். தொழில் முனைவோர் பயிற்சிகளையும் வழிகாட்டுதல்களை யும் வழங்குவோம். இளைஞர் உருவாக்கத்திற்காக ஆண்டுதோறும் தலைமைத்துவம், சமூகப் பகுப்பாய்வு, அரசியல் பகுப்பாய்வு போன்றவற்றை உள்ளடக்கிய மூன்று கட்டப் பயிற்சிகளை வழங்குவோம்.

இளைஞரின் வாழ்வுரிமையைச் சீர்குலைக்கும் கல்விக்கொள்கை, பொருளாதாரத் திட்டங்கள், கனிமவளக் கொள்ளை, தகுதித் தேர்வுகள் போன்றவற்றிற்கெதிராகச் சட்டப்பூர்வமான நமது எதிர்ப்புகளைப் பதிவு செய்வோம். நம் சிந்தனையொத்த பிற முற்போக்கு இயக்கங்களோடும் கைகளைக் கோர்ப்போம்.

தமிழ்நாடு ஆயர் பேரவையின் சிறப்பு அறிவுறுத்தலின்படி மறைமாவட்ட இளைஞர் இயக்கங்கள் மறைமாவட்டங்களில் செயல்படும் துறவறத் தாரோடு இணைந்து, பன்முனை இளைஞர் உருவாக்கப் பணிகளில் ஈடுபடுவோம். துறவற சபைகளும் மறைமாவட்டங்களும் சிறப்புக் கரிசனையோடு இளையோரை நம் பணியாற்றும் தளங்களில், பங்குகளில், கல்வி நிறுவனங்களில், இயக்கமாக்கி இறையாட்சிப் பணிகளில் ஈடுபட வழி காட்டுவோம்.

‘இளைஞரே, நீங்கள் இறைவனின் இப்பொழுது’ (கி.வா:178). கிறிஸ்து உங்களுக்குள் இருக்கிறார், உங்களுடன் இருக்கிறார், அவர் உங்களை ஒருபோதும் கைவிடமாட்டார். ‘கிறிஸ்து வாழ்கிறார், நீங்களும் உயிர்த்துடிப்புடன் இருக்கவே அவர் விழைகிறார்’ (கி.வா:1).

இளமை ஒரு கொடை! கவலையும் அச்சமும் நம் கனவுகளையும் நம்பிக்கையையும் உடைக்க நேரிடும். எனவே, கவலையையும் அச்சத்தையும் அகற்றிவிட்டுத் துணிவுடன் எழுந்து நில்லுங்கள். உங்களால் புதிதாகத் தொடங்க முடியும். உங்களுடைய நம்பிக்கையைக் கொள்ளையடிப்பதற்கு யாருக்கும் உரிமையில்லை. துணிவுடன் உங்களை உறுதிப்படுத்தும் தூய ஆவியார் உங்களோடு இருப்பாராக! இளமைத் துடிப்போடு அச்சம் அகற்றி “இதோ, ஆண்டருடைய அடிமை” எனத் துணிவுடன் தன்னை இறையழைத்தலுக்குக் கையளித்து, பணி செய்ய விரைந்து சென்ற இளம்பெண் மரியாவின் வழிநடத்துதல் உங்களோடு இருப்பதாக!