இந்திய செய்திகள்

“உச்ச நீதிமன்றம், தலைமை நீதிபதி மற்றும் நீதித்துறை மீது எங்களுக்கு மிகுந்த நம்பிக்கை உள்ளது. மக்களிடம் ‘வாக்குத் திருட்டில்’ ஈடுபட்ட பிரதமர் மோடி, உள்துறை அமைச்சர் அமித்ஷா மற்றும் தலைமைத் தேர்தல் ஆணையர் ஞானேஷ்குமார் ஆகியோர் நீதியின் முன் நிறுத்தப்படவேண்டும் என்பதே எதிர்க்கட்சிகளின் உறுதிப்பாடு. இந்த விவகாரத்தில் உச்ச நீதிமன்றம் முக்கியப் பங்காற்றும் என நம்புகிறோம். நாட்டின் அரசமைப்புச் சட்டத்தைச் சிலர் சிதைத்துவிட்டுத் தப்புவதை எளிதாக விட்டுவிட முடியாது. என்ன நடந்தாலும் சரி, அரசியல் ரீதியான எதிர்ப்பும் மக்களின் எதிர்ப்பும் தொடரும். இந்த விவகாரத்தில் மோடி, அமித்ஷா, ஞானேஷ்குமார் உள்ளிட்டோர் மீதான பிடி இறுகி வருகிறது என்பதை அவர்கள் உணர்ந்துகொள்ள வேண்டும்.”

திருமிகு. இராகுல் காந்தி, மக்களவை எதிர்க்கட்சித் தலைவர்

“தமது நாட்டு எல்லைக்குள் அல்லது தங்கள் நாட்டைச் சேர்ந்த குடிமக்களால் நிகழ்த் தப்படும் கடுமையான மனித உரிமை மீறல்கள் மற்றும் பெரும் தாக்குதல்களுக்குச் சம்பந்தப்பட்ட நாடுகள் பொறுப்பேற்று, தேசியச் சட்டங்களின் கீழ் பாதிக்கப்பட்டவர்களுக்கு நீதியைப் பெற்றுத் தரவேண்டும். மனிதகுலத்திற்கு எதிரான குற்றங்களைத் தடுக்கவும், அதற்கான தண்டனைகள் வழங்கவும் நடைமுறையில் உள்ள உலகளாவியச் சட்டங்களே போதுமானவை. இருப்பினும், இதற்குப் புதிய சட்டங்கள் இயற்றும் பட்சத்தில், அவை ஏற்கெனவே உள்ள சட்டங்களுக்கு உறுதுணையாக இருக்கவேண்டுமே தவிர, அதை அப்படியே பிரதிபலிக்கும் மற்றொரு நகலாக இருக்கக்கூடாது. பயங்கரவாதிகள் நடத்தும் தாக்குதல்களின் பாதிப்பை உணர்ந்து, அது மனிதகுலத்திற்கு எதிரான குற்றமாகச் சேர்க்கப்படவேண்டும். இத்தகைய குற்றங்களை விசாரித்து நடவடிக்கை எடுக்க மண்டல அதிகார வரம்போ அல்லது தேசிய அதிகார வரம்போ எடுத்துக்கொள்ளப்படவேண்டும்.”

திருமிகு. ஆர். மைதிலி, ஐ.நா.வுக்கான நிரந்தர இந்தியத் தூதர்

“சமுதாயத்தில் அதிக மரியாதை கொண்ட மருத்துவத் தொழிலை அர்ப்பணிப்பு உணர்வுடன் மருத்துவக் கல்லூரி மாணவர்கள் கற்கவேண்டும். கல்வி சார்ந்த புத்தகங்களைப் படிக்கும் அதேநேரம் இலக்கியம், சமூகம் சார்ந்த நூல்களையும் விரும்பிப் படிக்கவேண்டும். நாட்டு நடப்பு குறித்த அறிவைப் பெருக்குவதற்குச் செய்தித்தாள்களைக் கட்டாயம் வாசிக்கவேண்டும். படிக்கும் காலத்திலேயே விளையாட்டு, உடற்பயிற்சி உள்ளிட்டவற்றில் ஈடுபட்டு உடல் நலத்தையும் பேணிக்கொள்வதில் கவனம் செலுத்தவேண்டும்.”

திருமிகு. அருண்ராஜ், மக்கள் நல்வாழ்வுத் துறை அமைச்சர் - தமிழ்நாடு அரசு

“மத்தியிலும் மாநிலங்களிலும் மக்களின் நலனைக் காப்பதற்கு நல்லாட்சி அவசியமாகும். தற்சார்பு மிகுந்த, வளர்ந்த தேசமாக முன்னேற இந்தியா இலக்கு நிர்ணயித்துள்ள சூழலில், உலகின் தனிப்பெரும் பொருளாதாரச் சக்தியாக நம் நாடு உருவெடுக்கும் என்று நான் நம்புகிறேன். மற்றவர்களுக்குக் கட்டளையிடுவதற்காக அல்லாமல், நமக்கு யாரும் கட்டளையிடாமல் இருப்பதற்காக இந்த நிலையை நாம் எட்ட வேண்டும். வளர்ந்த இந்தியாவை உருவாக்குவதற்கு வலுவான அமைப்புகளும் சிறந்த ஆட்சி முறையும் அவசியம்.”

மேமிகு. சி.பி. இராதாகிருஷ்ணன், குடியரசு துணைத் தலைவர்

“நாட்டின் நிதிச்சூழலில் ஆர்.பி.ஐ. எவ்வாறு முக்கியப் பங்காற்றியது என்பதையும், காலப்போக்கில் ஏற்பட்ட மாற்றங்களையும் நாம் அறிவோம். UPI வருவதற்கு முன்பு நிதி உள்ளடக்கம் மிகப்பெரிய சவாலாக இருந்தது. இன்றைய சூழலில் நாம் எதிர்கொள்ளும் ‘சைபர் மோசடிகள்’ பல்வேறு அச்சுறுத்தல்களை ஏற்படுத்துகிறது. UPI-களைச் சிலர் மோசடிகளுக்குப் பயன்படுத்த முயற்சிக்கின்றனர். எனவே, இந்தியாவிற்கு உண்மையில் AI பாதுகாப்பு நிறுவனம் கட்டாயம் தேவை.”

திருமிகு. சௌமியா சுவாமிநாதன், எம்.எஸ். சுவாமிநாதன் ஆராய்ச்சி நிறுவனத் தலைவர்

“தேர்தலில் வெற்றி பெற்ற மக்களவை, சட்டப்பேரவை உறுப்பினர்களை விலை பேசும் கலாச்சாரத்தை, பா.ச.க. தொடங்கி வைத்தது. அது இன்று தமிழ்நாடு வரை பரவி விட்டது. இத்தகைய நிலை ஏற்படும்போது சம்பந்தப்பட்ட சட்டப்பேரவை உறுப்பினரைத் திரும்பப் பெறும் அதிகாரம் மக்களுக்கு அளிக்கப்படவேண்டும். 13 கோடி மக்களின் வாக்குரிமை இன்று பறிக்கப்பட்டிருக்கிறது. அதற்குக் காரணமான ஒன்றிய முதன்மை அமைச்சர் மோடி, உள்துறை அமைச்சர், தேர்தல் ஆணையரைப் பற்றி யாரும் இடைத்தேர்தல் பிரச்சாரத்தில் பேசவில்லை. வாக்குரிமை பறிப்பு நாடாளுமன்ற சனநாயகத்தின் மீது நடத்தப்பட்ட படுகொலை. தமிழ்நாடு முதல்வர் இதற்கு எதிராகக் குரல் எழுப்பவேண்டும்.”

திருமிகு. மு. வீரபாண்டியன், இந்திய கம்யூனிஸ்ட் கட்சியின் மாநிலச் செயலர்

தமிழ் மொழிக்கும், உலக இலக்கியக் களத்திற்கும் தன் வாழ்நாள் முழுவதையும் அர்ப்பணித்த ஒப்பற்ற சான்றோர் முனைவர் ஆ. டொமினிக் ராஜ் M.A., M.Phil., Ph.D.  ஆவார். கல்வி, ஆய்வு மற்றும் மொழிபெயர்ப்புத் துறைகளில் இவர் ஆற்றிய தமிழ்ப்பணி என்றும் போற்றத்தக்கது. 1942, சனவரி 6 அன்று திருச்சிராப்பள்ளியில் பிறந்த முனைவர் டொமினிக் ராஜ், கேம்பியன் மேல்நிலைப் பள்ளி மற்றும் புனித வளனார் (St. Joseph’s) கல்லூரியில் தொடக்கக் கல்வியைப் பயின்றார். சலேசியன் கல்லூரியில் இலத்தின் மொழியில் தத்துவவியல் பயின்ற இவர், சென்னைப் பல்கலைக்கழகத்தில் ஆங்கில இலக்கியத்தில் 3-ஆம் இடம்பிடித்து முதுகலைப் பட்டம் பெற்றார். ஹைதராபாத் CIEFL நிறுவனத்தில் முதுகலை டிப்ளமோ முடித்து, 1989-இல் மதுரை காமராசர் பல்கலைக்கழகத்தில் முனைவர் பட்டம் பெற்றார்.

1975-இல் விருதுநகர் VHNSN கல்லூரியில் ஆங்கிலத் துறை உதவிப் பேராசிரியராகத் தன் பணியைத் தொடங்கி, 2000-ஆம் ஆண்டு அத்துறையின் தலைவராகப் பணியாற்றி ஓய்வு பெற்றார். 2009 முதல் 2013 வரை செம்மொழித் தமிழாய்வு மத்திய நிறுவனத்தில் (CICT) மொழிபெயர்ப்புத் துறையின் முதன்மையாளராகச் செயல்பட்டார். A.K. இராமானுஜன், பிரேமா நந்தகுமார் போன்றோரின் உலகப் படைப்புகளைச் செப்பனிட்டபோது தமிழ் செவ்விலக்கியங்கள் மீது இவருக்கு ஆழமான ஈடுபாடு ஏற்பட்டது.

வீரமாமுனிவர் இயற்றிய ‘தேம்பாவணி’ உலகளவில் தகுந்த கவனம் பெறவில்லை என்பதை உணர்ந்த இவர், ஆறு ஆண்டுகள் அயராது உழைத்து, தேம்பாவணியின் 3,615 பாடல்களையும் முதன்முதலாக முழுமையாக ஆங்கிலத்தில் மொழிபெயர்த்தார். இம்மாபெரும் படைப்பு 2019, மே 24 அன்று நூலாக வெளியாகி, உலகளாவிய  ஆய்வாளர்களுக்கு ஒரு புதிய கதவைத் திறந்து வைத்தது. தமிழின் பெருமையை உலக அரங்கிற்கு எடுத்துச் சென்ற அறிஞர் டொமினிக் ராஜ், 2026, ஆகஸ்டு 30 அன்று இயற்கை எய்தினார். வீரமாமுனிவரின் காவியத்தை ஆங்கில உலகிற்கு அளித்த இவரது தேம்பாவணி மொழிபெயர்ப்புச் சாதனை, தமிழ் இலக்கிய வரலாற்றில் இவரது பெயரை என்றும் நிலைத்திருக்கச் செய்யும்.           

“உலகில் எந்த ஒரு பிரச்சினையும் பொதுவானதாகக் கருதப்படவேண்டும்; ‘உனது பிரச்சினை உன்னுடையது; எனது பிரச்சினை என்னுடையது’ என நாடுகள் கூறிவிட முடியாது. எந்த ஒரு நாட்டின் தனிப்பட்ட ஆதாயத்தையும்விட ஒட்டுமொத்த மனிதகுல அமைதி முக்கியமானது.”

மேன்மிகு சி.பி. இராதாகிருஷ்ணன், குடியரசுத் துணைத் தலைவர்

“பொது சிவில் சட்டத்தை நாடாளுமன்றத்தில் நிறைவேற்றும் அளவிற்குப் பா.ச.க.வுக்குப் பலம் உள்ளதா? பா.ச.க. ஆளும் மாநிலங்களில் மட்டும் பொது சிவில் சட்டம் நடைமுறைப்படுத்தப்பட்டால் அது அனைவருக்கும் பொதுவானதா? பா.ச.க. அனைத்து மாநிலங்களிலும் ஆட்சியில் இல்லை; இதுவரை பா.ச.க.-வினர் எந்தெந்தச் சட்டங்களைப் பற்றிப் பெரிதும் பேசி வந்தார்களோ, அதாவது ஒரே நாடு, ஒரே தேர்தல், இடஒதுக்கீடு போன்றவற்றை நாடாளுமன்றத்தில் கொண்டுவரவில்லை. இப்போது இதையும் நாடாளுமன்றத்திற்குக் கொண்டுவராமல் மாநிலங்கள் மூலம் நடைமுறைப்படுத்துகின்றனர்.”

திருமிகு. உமர் அப்துல்லா, முதல்வர், ஜம்மு-காஷ்மீர்

“வாகனங்களில் வேகக்கட்டுப்பாட்டுக் கருவிகளைப் பொருத்துவது தொடர்பான விதிமுறை முறையாகப் பின்பற்றப்படுவதை, சாலைப் போக்குவரத்து மற்றும் நெடுஞ்சாலைகள் அமைச்சகம் உறுதி செய்யவேண்டும். மத்திய மோட்டார் வாகன விதிமுறைகள் 1989-இன் விதிமுறை 125-H-இன்படி அனைத்துப் பொது போக்குவரத்து வாகனங்களிலும் அந்த வாகனங்கள் இருக்கும் இடத்தைக் கண்டறியும் கருவியும் அவசரகாலப் பொத்தானும் இருக்கவேண்டும். இதைப் பின்பற்றச் செய்வது தொடர்பான நிலவர அறிக்கையை அனைத்து மாநில அரசுகளும் உச்ச நீதிமன்றத்தில் தாக்கல் செய்யவேண்டும். கடந்த ஜூன் மாதத்தில் தேசிய சாலைப் பாதுகாப்பு வாரியம் அமைக்கப்பட்டதாக ஒன்றிய அரசு தெரிவித்துள்ளது. அந்த வாரியம் முழுமையாகச் செயல்பாட்டிற்கு வந்துள்ளதா? இல்லையா? என்பது குறித்து உச்ச நீதிமன்றத்திற்கு ஒன்றிய அரசு தெரியப்படுத்த வேண்டும்.”                                                    

உச்ச நீதிமன்றம்

“சமூகத்தின் பிரச்சினைகளுக்குத் தீர்வளிக்கக்கூடிய ஆராய்ச்சியை மாணவர்கள் மேற்கொள்ள வேண்டும். அவர்கள் மனிதச் சமூகத்திற்குப் பணியாற்றுவதுடன், அனைவரையும் உள்ளடக்கிய வளர்ச்சிக்குப் புதுமை வழிகாட்ட அனுமதிக்க வேண்டும். ஒரு பல்கலைக்கழகத்தின் மதிப்பு என்பது, மனிதர்களின் வாழ்க்கையை அது மாற்றுவதிலும், சமூகத்திற்கு அது ஆற்றும் பங்களிப்பிலும் அடங்கியுள்ளது. பல்கலைக்கழகங்கள் வெறுமனே வகுப்பறைகள் அல்ல; அவை மேன்மை, புதுமை படைத்தல், சமூகப் பொறுப்பு ஆகியவற்றின் மையங்கள் ஆகும். தொழில்நுட்பம் வேகமாக மாறிவரும் இந்தக் காலகட்டத்தில், இந்தியாவின் மொழி சார்ந்த வேற்றுமையை செழுமைப்படுத்துவது ஒரு தேசியப் பொறுப்பாகும்!”

மேமிகு. சி.பி. இராதாகிருஷ்ணன், குடியரசுத் துணைத் தலைவர்

“வரும் அக்டோபர் 2-ஆம் தேதி கிராம சபைக் கூட்டங்கள் நடைபெற உள்ள நிலையில், கிராம சபையை மிகவும் பயனுள்ள மற்றும் வலுவான மக்களாட்சி அமைப்பாக மாற்றவேண்டும். அதன்படி, ஊராட்சிப் பிரதிநிதிகளின் மாதாந்திர மதிப்பூதியத்தைக் கணிசமாக உயர்த்தவேண்டும். கிராமங்களில் மதுக்கடைகள் அமைப்பது தொடர்பான முடிவுகளில் உள்ளூர் மக்களின் கருத்துகளுக்கு முக்கியத்துவம் அளிக்கப்பட வேண்டும். கிராம சபையின் கூட்டங்களில் முதல்வர், அமைச்சர்கள் மற்றும் சட்டப் பேரவை உறுப்பினர்களின் பங்கேற்பை நேரலை செய்யவேண்டும். கிராம சபைத் தீர்மானங்கள் மீது குறிப்பிட்ட கால வரையறைக்குள் நடவடிக்கை எடுக்கப்படவேண்டும். கிராம சபை என்பது மக்கள் கேள்விகள் கேட்கவும் விவாதிக்கவும் உள்ளாட்சி நிர்வாகத்தைப் பொறுப்பேற்கச் செய்யக்கூடிய தளமாகவும் உயர்த்தவேண்டும்.”

திரு. கமலஹாசன், தலைவர், மக்கள் நீதி மையம்

“தமிழ்நாட்டில் உள்ள அனைத்து வணிக நிறுவனங்கள் மற்றும் கடைகளின் பெயர்களை நவம்பர் 1-ஆம் தேதிக்குள் தமிழில் மாற்றவேண்டும் என சென்னை உயர்நீதிமன்றம் தீர்ப்பளித்துள்ளது வரவேற்கத்தக்கது. தமிழ்நாட்டின் வணிக நிறுவனங்கள், கடைகள் மற்றும் பொதுவெளிகளில் தமிழில் பெயர்ப் பலகை இடம்பெற வேண்டும் என்ற கோரிக்கையும் இந்தி எதிர்ப்பு, மொழிப்போர் ஆகிய போராட்டங்களில் முதன்மையான நோக்கங்களில் ஒன்றாக இருந்தது. பல ஆண்டுகளுக்கு முன்பே, மக்கள் இயக்கங்களின் வாயிலாக வலியுறுத்தப்பட்ட இந்தக் கோரிக்கையை இன்று உயர்நீதிமன்றமே காலக்கெடு விதித்து நிறைவேற்ற உத்தரவிட வேண்டிய நிலை ஏற்பட்டிருப்பது மிகுந்த வேதனையளிக்கிறது.”

திரு. சீமான், தலைமை ஒருங்கிணைப்பாளர், ‘நாம் தமிழர் கட்சி’

“பெண்கள் இடஒதுக்கீடு என்ற பெயரில், தொகுதி மறுசீரமைப்பை மேற்கொள்ள ஒன்றிய பா.ச.க. அரசு முயற்சித்து வருகிறது. இது தென் மாநிலங்களின் முக்கியத்துவத்தைக் குறைக்கும் வகையில் உள்ளது என்பதை நாம் அறிவோம். நாடாளுமன்றத்தில் தொகுதிகள் மறுசீரமைப்பு மசோதா மீண்டும் கொண்டுவரப்பட்டால் கூட்டணிக் கட்சிகளின் ஆதரவுடன் தோற்கடிக்கப்படும்.”

திருமிகு. ப. சிதம்பரம், மேனாள் மத்திய நிதி அமைச்சர்

“தேர்தல் ஆணையத்தைப் பயன்படுத்தி மேற்கு வங்க சட்டப்பேரவைத் தேர்தலைப் பா.ச.க. திருடிவிட்டது. வாக்காளர் பட்டியல் சிறப்புத் தீவிரத் திருத்த நடவடிக்கைகளைப் பயன்படுத்தி இலட்சக்கணக்கானோர் பெயர்களைச் சட்டவிரோதமாக வாக்காளர் பட்டியலில் இருந்து நீக்கிவிட்டனர்.”

திருமிகு. செல்வி. மம்தா பானர்ஜி, மேற்கு வங்க மேனாள் முதல்வர்

“கடந்த மூன்று மாதங்களில் மட்டும் கர்நாடக முதல்வர் டி.கே. சிவக்குமார் மற்றும் அந்த மாநில அமைச்சர்கள் நான்கு முறை டெல்லி சென்று மேக்கேதாட்டு அணை கட்டுவது தொடர்பாக ஒன்றிய அமைச்சர் மற்றும் அதிகாரிகளைச் சந்தித்துள்ளனர். ஆனால், இந்த விவகாரத்தில் தமிழ்நாடு அரசு வாய்மூடி மௌனியாக உள்ளது. முதல்வர் ஜோசப் விஜய் மற்ற கட்சித் தலைவர்களை டெல்லிக்கு அழைத்துச் செல்லவில்லை என்றாலும் பரவாயில்லை, தனது அமைச்சர்களை அழைத்துக் கொண்டு பிரதமரையும், நீர்வளத்துறை அமைச்சரையும் சந்தித்து மேக்கேதாட்டு அணை கட்டுவதைத் தடுப்பதற்கான நடவடிக்கைகளை மேற்கொள்ளவேண்டும். காவிரி மற்றும் மேக்கேதாட்டு அணை விவகாரத்தில் முதல்வர் விஜய்யின் அமைதி தமிழ்நாட்டிற்குப் பாதிப்பை ஏற்படுத்திவிடும். காவிரி விவகாரம் குறித்து உச்ச நீதிமன்றத்தில் வழக்குத் தொடுத்துவிட்டால் மட்டும் போதாது; அரசியல் ரீதியாக அழுத்தம் கொடுக்கவேண்டும்.”

திருமிகு. அன்புமணி இராமதாஸ், பா.ம.க. தலைவர்

“மணல், தாதுப் பொருள்கள் சட்ட விரோதமாக, நிர்ணயிக்கப்பட்ட அளவிற்குப் பல மடங்கு அதிகமாக எடுத்தது தொடர்பாக ஒன்றிய அமலாக்கத்துறை கணிசமான ஆய்வு செய்து நடவடிக்கை எடுக்க சமர்ப்பித்த அறிக்கை அரசின் ஆய்வில் உள்ளது. மதுரை உயர் நீதிமன்றம் 2025-ஆம் ஆண்டு பிப்ரவரி மாதம் சி.பி.ஐ. விசாரணைக்கு உத்தரவிட்டது; பல இடங்களில் சோதனையும் மேற்கொள்ளப்பட்டது. ஆனால், உச்ச நீதிமன்றம் ஒரு மேல்முறையீட்டில் உயர் நீதிமன்ற உத்தரவுக்குத் தடை விதித்துள்ளது. இந்தத் தடையை நீக்க நடவடிக்கை எடுக்கப்படவேண்டும்.”

திருமிகு. ஆர். நடராஜ், மேனாள் காவல்துறை தலைவர்