தமிழக செய்திகள்

தமிழ்நாட்டின் ஒரே கத்தோலிக்க வார இதழான ‘நம் வாழ்வு’ ‘வாசிப்பை நேசிப்போம்’ என்னும் முழக்கத்துடன் பள்ளி, கல்லூரி மாணவரையும் இளைஞரையும் நேரில் சந்தித்து வாசிப்புப் புரட்சியை ஏற்படுத்தி வருகிறது. அவ்வகையில் திருச்சி பிராட்டியூரில் உள்ள பொதுநிலையினர் உருவாக்க மையத்தில், தமிழ்நாடு கத்தோலிக்க இளையோருக்கான ஒருநாள் எழுத்தாளர் பயிற்சிப் பட்டறை நடைபெற்றது. இளைஞர் எழுச்சிப் பாடலுடன் தொடங்கிய இந்நிகழ்வில், தமிழ்நாடு அச்சு ஊடகப் பணியகத்தின் இயக்குநரும், ‘நம் வாழ்வு’ இதழின் முதன்மை ஆசிரியருமான அருள்முனைவர் இராஜசேகரன், ‘டிஜிட்டல் யுகத்தில் வாசிப்பு மற்றும் எழுத்தின் முக்கியத்துவம்’ என்னும் தலைப்பில் சிறப்புரையாற்றினார். தொடர்ந்து, ‘நம் வாழ்வு’ இதழின் துணை ஆசிரியர் அருள்பணி. ஞானசேகரன், கட்டுரைகள், கதைகள் மற்றும் கவிதைகளை எவ்வாறு எழுதுவது என்பது குறித்தும், படைப்பாக்கத் திறனை வளர்ப்பது குறித்தும் இளைஞருக்கு விரிவான வழிகாட்டுதல்களை வழங்கினார்.

இப்பயிற்சி முகாமில் தமிழ்நாடு முழுவதிலுமிருந்தும் 35-க்கும் மேற்பட்ட இளைஞர் மிகுந்த ஆர்வத்துடன் பங்கேற்று, ‘நாங்களும் சிறந்த எழுத்தாளர்களாக உருவெடுப்போம்’ என்ற நம்பிக்கையை வெளிப்படுத்தினர். இளையோரை மையப்படுத்தி வெளியிடப்பட்ட நூல்களையும் வாங்கிப் பயன்பெற்றனர். இந்நிகழ்வில், புதிய எழுத்தாளர்கள் குழுவின் ஒருங்கிணைப்பாளராக செல்மா தேர்ந்தெடுக்கப்பட்டார். மேலும், புனித பிரான்சிஸ் அசிசியாரின் விண்ணகப் பிறப்பின் 800-வது ஆண்டு யூபிலியைக் கொண்டாடும் வகையில், பொதுநிலையினர் உருவாக்க மைய வளாகத்தில் 30-க்கும் மேற்பட்ட மரக்கன்றுகள் நடப்பட்டன. இப்பயிற்சி முகாமிற்கான அனைத்து ஏற்பாடுகளையும் தமிழ்நாடு கத்தோலிக்க இளைஞர் இயக்கத்தின் இயக்குநர் அருள்தந்தை கும. எடிசன் முன்னின்று ஒருங்கிணைத்திருந்தார்.

“மாணவர்கள் தமிழை ஆர்வத்துடன் கற்கவும், அரிய தமிழ் நூல்களைப் பாதுகாத்து அடுத்த தலைமுறைக்குக் கொண்டு செல்லவும் கூடுதல் முயற்சிகள் மேற்கொள்ளப்பட வேண்டும். தமிழை வளர்ப்பது என்பது, தமிழ்த் துறையின் பொறுப்பு மட்டுமல்ல; மாறாக, அரசு நிறுவனங்கள், கல்வி நிறுவனங்கள், பல்கலைக்கழகங்கள், ஆய்வு மையங்கள், நூலகங்கள், பதிப்பகங்கள், தமிழ் அறிஞர்கள், ஆசிரியர்கள், மாணவர்கள் என அனைவரும் இணைந்து செயல்படும்போதுதான் தமிழ் அடுத்த தலைமுறைக்கு முழுமையாகச் சென்றடையும். தமிழின் இலக்கியத்தையும் இலக்கணத்தையும் பாதுகாப்பது அறிஞர்களின் பணியாக மட்டும் இருக்கக்கூடாது; மாறாக, அது ஒட்டுமொத்த சமூகத்தின் கூட்டுப் பொறுப்பு!”

மாண்புமிகு ஜே.சி.டி. பிரபாகர், தமிழ்நாடு சட்டப்பேரவைத் தலைவர்

“தமிழ்நாட்டில் பிறப்பு - இறப்பு விவரங்களின் அடிப்படையில், தமிழ்நாடு பொதுச் சுகாதாரத் துறையின் காலாண்டு இதழில் வெளியிடப்பட்டுள்ள ஆய்வுக் கட்டுரையில், தமிழ்நாட்டில் கடந்த ஆண்டில் உயிரிழந்தவர்களில், பெண்களைவிட ஆண்களின் எண்ணிக்கை  1,10,513 என்று குறிப்பிடப்பட்டுள்ளது. ஆண்களின் உயிரிழப்பிற்கு சாலை விபத்து, தற்கொலை, மது மற்றும் புகையிலைப் பழக்கத்தால் ஏற்படும் கேடுகள், தொற்றுநோய்கள், சரியான நேரத்தில் கண்டறியப்படாதது ஆகியவைதான் காரணம் என்று தெரியவந்துள்ளது. இந்த நான்கு காரணிகளுக்குமே மூலக்காரணம் மதுப் பழக்கம்தான் என்பது ஏற்கெனவே நடத்தப்பட்ட பல்வேறு ஆய்வுகளின் மூலம் உறுதி செய்யப்பட்டுள்ளது. தமிழ்நாட்டில் ஆண்களின் உயிரிழப்பு அதிகரிப்பதற்கான காரணங்களை அதிகாரப்பூர்வமாக உறுதிசெய்ய மதுவின் கேடுகள் குறித்துச் சிறப்பு ஆய்வு நடத்தப்படவேண்டும்.”

திருமிகு. அன்புமணி இராமதாஸ், பா.ம.க. தலைவர்

“இளம் மாணவர்கள் உயர்ந்த, பெரிய கனவுகளைக் காணவேண்டும். உழைப்பும் குறிக்கோளும் இணைந்தால் எட்ட முடியாத உயரம் என்று எதுவும் இல்லை. இதில் ஒழுக்கம் மிக முக்கிய ஆயுதமாக இருக்கவேண்டும். ‘சுய ஒழுக்கம்’ என்ற ஆற்றல் இருந்தால் அனைத்துச் சவால்களையும் மாணவர்களால் நிச்சயமாக வெல்லமுடியும். பெற்றோருக்காகவோ, ஆசிரியருக்காகவோ அல்லது அலுவலகத்தில் உள்ள உயர் அதிகாரிகளுக்காகவோ கடைப்பிடிக்கப்படும் ஒழுக்கம் அல்ல; இது சுய ஒழுக்கம். இந்த ஒழுக்கம் என்னும் வலிமையான ஆயுதம் மூலம் எந்த மாணவராலும் உயரத்தையும் இலக்கையும் எட்ட முடியும். உயர் படிப்புகளிலும் பணிகளிலும் எப்போதும் அடுத்தக் கட்டத்திற்குச் செல்லத் தயாராக இருக்கவேண்டும்; அதில் சவால்கள் அடங்கியிருந்தாலும் அதன் மூலம் நிறைய கற்றுக்கொண்டு வெற்றியும் அடைய முடியும்.”

திருமிகு. தீரஜ் குமார், உயர் கல்வித் துறைச் செயலர், தமிழ்நாடு அரசு

தமிழ்நாடு கத்தோலிக்கத் திரு அவையின் வரலாற்றுச் சுவடுகள், பண்பாட்டுக் கூறுகள் மற்றும் ஆன்மிக மரபுகளைப் பாதுகாக்கும் நோக்கில் ‘கத்தோலிக்க மரபு மையம்’ (Catholic Heritage Centre) ஒன்று புதியதாகத் தொடங்கப்பட்டுள்ளது. நமது தொன்மையான கத்தோலிக்க வரலாற்றையும் தொன்மங்களையும் நவீன டிஜிட்டல் தொழில்நுட்பத்தின் வழியே மீட்டுருவாக்கம் செய்து, அவற்றை இளம் தலைமுறையின் கரங்களில் எளிதாகக் கொண்டு சேர்க்கும் இம்மாபெரும் முயற்சி காலத்தின் மிக முக்கியத் தேவையாகும்.

இப்புதிய மையத்தின் தலைவராகப் பொறுப்பேற்றுள்ள ‘நம் வாழ்வு’ வார இதழின் தலைவர் மேதகு ஆயர் லூர்து ஆனந்தம் அவர்களுக்கும், இயக்குநராகப் பொறுப்பேற்றுள்ள தஞ்சாவூர் மறைமாவட்டத்தைச் சேர்ந்த  அருள்பணி. தமிழ்தாசன் அவர்களுக்கும் ‘நம் வாழ்வு’ குடும்பத்தின் சார்பாக மனமார்ந்த வாழ்த்துகளைத் தெரிவித்துக்கொள்கிறோம். இம்மையத்தின் பணி சிறக்க வாழ்த்துகிறோம்!

முதன்மை ஆசிரியர்

“அரசமைப்புச் சட்டத்தின் 22(1), 22(2)-இன் படி ஒருவரைக் கைது செய்வதற்கான காரணங்களைக் கூறாமல் அவரைக் கைது செய்ய முடியாது; அவ்வாறு கைது செய்யப்படும் நபரை அருகில் உள்ள மாஜிஸ்திரேட் முன்பாக 24 மணி நேரத்திற்குள் ஒப்படைக்கவேண்டும். அரசமைப்புச் சட்டத்தின் 22(1) அளித்துள்ள அடிப்படை உரிமைகளைப் பறிக்க எந்த முயற்சி மேற்கொள்ளப்பட்டாலும், அதை நீதிமன்றங்கள் கண்டித்து கடுமையாக நடவடிக்கை எடுக்கவேண்டும். கைதாகும் நபரிடம் அதற்கான காரணங்களைத் தெரிவிப்பது வெறும் சம்பிரதாயத்திற்காக மேற்கொள்ளப்படும் நடைமுறை அல்ல; மாறாக, அது அரசமைப்புச் சட்டம் அளித்துள்ள பாதுகாப்பாகும். அதைக் கட்டாயம் பின்பற்றவேண்டும். அவ்வாறு தெரிவிக்கப்படும் காரணங்கள் எழுத்துப்பூர்வமாகவும், கைதான நபர் புரிந்துகொள்ளும் மொழியிலும் இருக்கவேண்டும். கைதிற்கான காரணங்களைத் தெரிவிக்காதது அடிப்படை உரிமை மீறலாகும்.”

நீதிபதிகள் திருமிகு. உச்சல்புயான் மற்றும் ஏ. எஸ். சந்துர்கர், உச்ச நீதிமன்றம் (அமர்வு)

“தமிழ்நாடு நுகர்பொருள் வாணிபக் கழகத்தில் 2013 முதல் 2016-ஆம் ஆண்டு வரை பணியில் சேர்ந்தும் பல ஆண்டுகளாகத் தொடர்ந்து பணியாற்றியும் வரும் பருவகாலப் பணியாளர்கள் தங்களது பணியை நிரந்தரம் செய்து உரிய பணிப் பலன்கள் வழங்கவேண்டும் எனக் கோரிக்கை விடுத்துள்ளனர். இதுகுறித்து தமிழ்நாடு அரசு பரிசீலித்து பணி நிரந்தரம், பணிக்காலத்தைக் கணக்கில் எடுத்தல் மற்றும் உரிய பணிப் பலன்கள் வழங்குவதற்கான நடவடிக்கைகளை மேற்கொள்ளவேண்டும்.”

திருமிகு. பிரேமலதா, பொதுச்செயலாளர், தே.மு.தி.க.

“சென்னை பட்டினப்பாக்கத்தில் தலைமைச் செயலகம் அமைப்பது குறித்து முதல்வர் இறுதியான முடிவெடுக்கவில்லை என அமைச்சர் ஆதவ் அர்ஜுனா கூறியுள்ளார். பட்டினப்பாக்கத்தில் புதிய தலைமைச் செயலகம் அமைக்கும் அரசின் முடிவையே அரசாணை வெளிப்படுத்துகிறது. அந்த அரசாணை முதல்வருக்குத் தெரியாமல் வெளிவந்தது என்றால், அதற்குக் காரணமான அதிகாரிமீது நடவடிக்கை எடுக்கவேண்டும். சென்னையில் பல இடங்கள் இருக்கும்போது, பிடிவாதமாக மீனவர்களை வெளியேற்றி அங்கே தலைமைச் செயலகம் அமைப்பது என்பது தவறானது.”

திருமிகு. பெ. சண்முகம், மாநிலச் செயலாளர், மார்க்சிஸ்ட் கம்யூனிஸ்ட் கட்சி

இந்த இதழ் ‘நம் வாழ்வு’ சிறப்பிதழாக வெளிவர வாழ்த்துரை வழங்கிய கோவை ஆயர் பெருந்தகை அவர்களுக்கும், முதன்மைக்குரு அவர்களுக்கும் மற்றும் உதவி செய்த பசிலிக்கா அதிபர் மற்றும் பங்குத்தந்தை, விளம்பரங்கள் கொடுத்து உதவிய அன்பு நல்லுள்ளங்களுக்கும் எங்கள் நெஞ்சார்ந்த நன்றியைத் தெரிவித்துக்கொள்கிறோம். மேலும், கருமத்தம்பட்டி புனித செபமாலை அன்னை பசிலிக்காவின் 386-ஆம் ஆண்டு தேர்த்திருவிழாவிற்கு வருகை தரும் உங்கள் ஒவ்வொருவரையும் அன்புடன் வரவேற்கிறோம். ‘நம் வாழ்வு’ வாசகர்களாகிய நீங்கள் இங்கு வரும்பொழுது, ‘நம் வாழ்வு’ புத்தக ஸ்டால் இங்கே அமைந்திருக்கும். உங்கள் ஆண்டுச் சந்தாவைப் புதுப்பித்து புதிய சந்தாதாரர்களாக இணைந்துகொள்ளலாம். உங்கள் உறவினர்கள் மற்றும் நண்பர்களுக்குத் திருமண நாள் மற்றும் பிறந்த நாளில் ‘நம் வாழ்வு’ வார இதழை அறிமுகம் செய்ய அன்போடு கேட்டுக்கொள்கிறோம். அனைவருக்கும் திருவிழா வாழ்த்துகள்!

எஸ்.ஏ. கிறிஸ்டி, ‘நம் வாழ்வு’ கோவை மண்டலப் பொறுப்பாளர்

கோவை மறைமாவட்டத்தில் புனித செபமாலை அன்னை பசிலிக்கா தமிழகத்தின் 7-வது பசிலிக்காவாகும். இந்தப் பசிலிக்காவின் வரலாறு 386 ஆண்டுகள் கொண்டதாகும். இங்கு வரும் இறைமக்கள் கண்ணீர், வேதனை, நோய் நீங்கி இறை இயேசுவின் வழியாக அன்னையின் பரிந்துரையில் ஏராளமான நன்மைகளைப் பெற்றுச் செல்கின்றனர்.

அன்னையின் அளவிடமுடியாத அன்பும் அரவணைப்பும் ஒவ்வொரு மனிதனையும் நல்வழியில் நடத்துகின்றது. புனித செபமாலை அன்னையின் தேர்த்திருவிழா வருகின்ற அக்டோபர் மாதம் 4-ஆம் தேதி முதல் ஞாயிறன்று வெகு சிறப்பாகக் கொண்டாடப்பட உள்ளது.

இறைமக்கள் அனைவரும் இவ்விழாவில் ஏராளமாகக் கலந்துகொண்டு இறைமகன் வழியாக அன்னையின் அருளைப் பெற்றுச் செல்ல எம் மறைமாவட்ட மேதகு ஆயர், முதன்மைக்குரு, அருள்தந்தையர்கள், இருபால் துறவியர்கள் மற்றும் எம் பங்கு மக்களோடு இணைந்து இறைவனின் ஆசிர் பெற அன்புடன் அழைக்கின்றேன். அனைவருக்கும் திருவிழா நல்வாழ்த்துகள்!

அருள்பணி. K. அருண், பசிலிக்கா அதிபர் மற்றும் பங்குத்தந்தை, கருமத்தம்பட்டி