உலக செய்திகள்

டெக்சாஸ் ஃபோர்ட் ஹூட் துப்பாக்கிச்சூடு வழக்கில் 13 பேரைக் கொன்ற நிடால் மாலிக் ஹாசனுக்கு, துப்பாக்கியால் சுட்டு மரண தண்டனை நிறைவேற்ற அமெரிக்க அரசு உத்தரவிட்டுள்ளது. இந்தத் தண்டனை நேரலையில் ஒளிபரப்பப்படும் என்றும் பாதுகாப்புச் செயலர் பீட் ஹெக்செத் அறிவித்துள்ளார். இதற்கு எதிர்ப்பு தெரிவித்துள்ள அமெரிக்க இராணுவப் பணிகளுக்கான  பேராயர் தீமோதி புரோக்லியோ, “மரண தண்டனை மற்றும் அதை நேரலை செய்வது திரு அவையின்  போதனைகளுக்கும் மனித கண்ணியத்திற்கும் எதிரானது. இந்தத் தண்டனையை நிறைவேற்றும் துப்பாக்கிச்சூடு படைப்பிரிவில் (firing squad) நியமிக்கப்படும் கத்தோலிக்கப் படைவீரர்கள், தங்களை அந்தப் பணியிலிருந்து விலக்கிக் கொள்ளக் கோருவதை ஒரு கடமையாகவே மேற்கொள்ளவேண்டும்” என்று பேராயர் வலியுறுத்தியுள்ளார்.

“ஆதிக்க மனப்பான்மையைக் கடந்து, சமூக ஏற்றத்தாழ்வுகளுக்கு முற்றுப்புள்ளி வைப்பதன் மூலமே உலகளாவிய போர்களை முடிவுக்குக் கொண்டுவர முடியும்” என்று வத்திக்கான் அரசுபணிச் செயலர் கர்தினால் பியத்ரோ பரோலின் தெரிவித்துள்ளார். அக்டோபர் 4 அன்று ‘லா ரிபப்ளிகா’ நாளிதழுக்கு அளித்த பேட்டியில், ஐக்கிய நாடுகள் சபைக் கூட்டத் தொடருக்குப் பின் உலகளாவிய மோதல்கள் குறித்து தனது கருத்துகளைப் பகிர்ந்து கொண்டார். உலகச் சட்டத்தின் அடிப்படையில் நாடுகளுக்கிடையே பரஸ்பர நம்பிக்கையை மீட்டெடுப்பது அவசியம் என்று அவர் வலியுறுத்தியுள்ளார்.

காசா, உக்ரைன் மற்றும் ஈரான் ஆகிய நாடுகளில் அப்பாவி மக்கள் அனுபவித்து வரும் துயரங்கள் குறித்து ஆழ்ந்த கவலை தெரிவித்த கர்தினால், காசாவில் இயங்கி வரும் கத்தோலிக்கப் பள்ளி நம்பிக்கையின் அடையாளமாகத் திகழ்வதாகக் குறிப்பிட்டார். குளிர்காலம் நெருங்கும் வேளையில் உக்ரைனில் நிலவும் பேரழிவு வேதனையளிப்பதாகக் கூறிய அவர், தற்காத்துக்கொள்ள உக்ரைனுக்கு உரிமை உண்டு என்பதைச் சுட்டிக்காட்டினார். வான்வழித் தாக்குதல்களை உடனடியாக நிறுத்தி, போர்நிறுத்த ஒப்பந்தத்தை எட்ட வத்திக்கான் என்றும் உதவத் தயார் என அவர் உறுதியளித்தார்.

“குடியேறிகளுக்காகக் குரல் கொடுப்பது இயேசுவின் ஒவ்வொரு சீடருக்கும் உரிய கடமை. அது உண்மையான அர்த்தத்தில் இறைவனை வழிபடும் ஒரு புனிதச் செயல்” என்று சிகாகோ பேராயர் கர்தினால் பிளேஸ் குபிச் தெரிவித்துள்ளார். அக்டோபர் 3 அன்று சிகாகோவில் உள்ள பழமையான புனித பேட்ரிக் தேவாலயத்தில் திருப்பலி நிறைவேற்றிப் பேசிய அவர், குடியேறிகளை அன்போடு வரவேற்ற வரலாற்றுப் பாரம்பரியம் கொண்ட சிகாகோ நகரில், இன்று அத்தகைய வரவேற்பு மனப்பான்மை குறைந்து வருவது குறித்துக் கவலை தெரிவித்தார். “நமது சொந்த வரலாற்றை நினைவில்கொண்டு, அந்நியர்களை அன்போடு அணுக வேண்டும்; ஒடுக்கப்பட்ட மக்களுக்கு நீதி வழங்கும் இறைவனை வழிபடும் நாம், குடியேறிகளின் துயரங்களைக் கண்டு விலகி நிற்க முடியாது” என்று  சுட்டிக்காட்டினார்.

“அகதிகளுக்கும் குடியேறிகளுக்கும் அடைக்கலம் அளித்து, உணவு, சட்ட உதவி மற்றும் கல்வி வழங்குவது வெறும் சமூகப் பணி அல்ல; மாறாக, அது கிறிஸ்துவை நேரில் சந்திக்கும் நற்கருணைச் சீடத்துவமாகும். அதேவேளையில், குடியேறிகளின் உரிமைகளைப் பாதுகாக்கவும், மனிதாபிமானமற்ற சட்ட நடவடிக்கைகளை எதிர்த்து, நியாயமான குடியேற்றச் சீர்திருத்தங்களை மேற்கொள்ளவும் அரசு அதிகாரிகளுக்கு அழுத்தம் கொடுக்கவேண்டும்” எனக் கத்தோலிக்க மக்களுக்கு கர்தினால் குபிச் அழைப்பு விடுத்தார்.

உரோமையில் உள்ள பலாஸோ சான் கலிஸ்டோவில் நடைபெற்று வரும் ‘மதங்களும் அரசுமுறைப் பேச்சுவார்த்தைகளும்’ என்ற மாநாட்டில், கிறித்தவ ஒற்றுமையை ஊக்குவிப்பதற்கான வத்திக்கான் அமைப்பின் தலைவரான கர்தினால் கர்ட் கூக் உரையாற்றினார்.  “முதலில் நாம் திரு அவைக்குள்ளும், அனைத்துத் திரு அவைகளுக்கிடையேயும் அமைதியைக் கண்டறியவேண்டும்; பன்முகத்தன்மைக்கு மத்தியில் சமநிலையோடு வாழ ‘எக்குமேனிசம்’ (சபைகளின் ஒற்றுமை) நமக்கு உதவுகிறது. கிறித்தவர்கள் சமூகத்தில் ஒற்றுமையையும் அமைதியையும் கட்டியெழுப்ப உதவ வேண்டுமானால், முதலில் திரு அவைகளுக்கு இடையே அமைதியை மீட்டெடுக்கவேண்டும் என்று அவர் சுட்டிக்காட்டினார்.

“ஐரோப்பாவின் எதிர்காலம் அதன் வரலாற்று, ஆன்மிக மற்றும் பண்பாட்டு வேர்களில் உள்ளது. கடவுள் மீதான நம்பிக்கை, மனித கண்ணியம் மற்றும் சமூகப் பொறுப்பு ஆகிய கொள்கைகளை ஐரோப்பா அடுத்த தலைமுறைக்குக் கொண்டு செல்லவேண்டும்” என்றார். அரசியல் மற்றும் அரசுமுறைப் பேச்சுவார்த்தை முயற்சிகள் சவால்களைச் சந்திக்கும் இவ்வேளையில், கிறித்தவச் சபைகளுக்கிடையேயான இந்த ஒற்றுமைப் பயணம், சமுதாயத்தில் அமைதியையும் நல்லிணக்கத்தையும் ஏற்படுத்தப் பெரும் முன்மாதிரியாகத் திகழும் என்று கர்தினால் கூக் வலியுறுத்தினார்.

ஐ.நா. சபையின் 81-வது பொது அவைக் கூட்டத்தில் வத்திக்கான் வெளியுறவுச் செயலர் கர்தினால் பியத்ரோ பரோலின் உரையாற்றினார்.  “போர்களை உடனடியாக நிறுத்தவேண்டும்; பலவந்தமான அதிகாரப் போக்கைக் கைவிட்டு, பேச்சு வார்த்தைப் பண்பாட்டை வளர்க்கவேண்டும். செயற்கை நுண்ணறிவு தொழில்நுட்ப வளர்ச்சியில் மனித கண்ணியமும் பொறுப்பும் முதன்மையாக இருக்கவேண்டும். தன்னாட்சி கொண்ட கொடிய ஆயுதங்களின் பயன்பாடு மனிதக் கட்டுப்பாட்டிலேயே இருக்கவேண்டும். உக்ரைன் போரை உடனடியாக நிறுத்த முழுமையான போர்நிறுத்தம் தேவை. காசா மற்றும் மேற்குக் கரையில் நிலவும் மனிதாபிமான நெருக்கடிகளுக்குத் தீர்வாக இரு-நாட்டு கொள்கை வழியே நிலையான அமைதியை ஏற்படுத்தவேண்டும்” என்றும் அவர் கேட்டுக்கொண்டார். அகதிகள் மற்றும் புலம்பெயர்ந்தோரின் உரிமைகள் பாதுகாக்கப்படவேண்டும் எனக் குறிப்பிட்ட அவர், உலகளவில் அமைதியையும் நீதியையும் நிலைநாட்ட, மீண்டும் பலதரப்பு உலகளாவிய ஒத்துழைப்பை வலுப்படுத்தவும் வலியுறுத்தினார்.

2027-ஆம் ஆண்டின் 61-வது உலகத் தகவல் தொடர்பு நாளுக்கான (World Communications Day) கருப்பொருளாக, ‘புதிய பார்வை: கிளிக்பேட் யுகத்தில் கவனம் செலுத்துதல்’ (A New Gaze: Paying Attention in the Age of Clickbait) என்பதை வத்திக்கானின் தகவல் தொடர்பு அமைப்பு வெளியிட்டுள்ளது. இன்றைய நவீன டிஜிட்டல் ஊடகச் சூழலில், மக்களின் கவனத்தை ஈர்ப்பதற்காகத் திணிக்கப்படும் பரபரப்புச் செய்திகளுக்கு மத்தியில் (Clickbait), பிறர்மீது அன்போடும் அக்கறையோடும் கவனம் செலுத்துவதன் அவசியத்தை இக்கருப்பொருள் வலியுறுத்துகிறது. வேகமான உள்ளடக்கப் பெருக்கால் மனிதர்களின் சிந்திக்கும் திறனும், ஆழமான தனிப்பட்ட தொடர்புகளும் பாதிக்கப்படுவதாகக் கவலை தெரிவிக்கப்பட்டுள்ளது.

“கவனம் செலுத்துதல் என்பது ஒரு தாராளமான கொடையாகும். மற்றவர்களைத் தீர்ப்பிடாமல், அவர்களை அன்போடு அணுகும்போது நமது தகவல் தொடர்பு அர்த்தமுள்ளதாக மாறுகிறது” என்று வத்திக்கான் அறிக்கை சுட்டிக்காட்டுகிறது.