அருளாளர் சியரா படனோ
சியரா படனோ, 1971 ஆம் ஆண்டு, இத்தாலியில் உள்ள சசெல்லோ (Sasello) என்னும் இடத்தில் பிறந்தார். இவருடைய பெற்றோருக்கு திருமணமாகிப் பதினோரு ஆண்டுகள் குழந்தையே இல்லை. அவர்களுடைய இடைவிடாத ஜெபத்தின் பயனாகவே சியரா படனோ பதினோரு ஆண்டுகள் கழித்துப் பிறந்தார். அதனால் சியரா படனோவின் பெற்றோர் அவர்மீது அளவு கடந்த அன்பு செலுத்தினார்கள். அதே நேரத்தில் அவரை பக்தி நெறியில் வளர்த்து வந்தார்கள். சியரா படனோவும் சிறுவயது முதலே இறையன்பிலும் பிறரன்பிலும் நல்ல முறையாய் வளர்ந்து வந்தார். சமயங்களில் தன்னுடைய நண்பர்களிடம் ஆண்டவர் இயேசுவைப் பற்றிய நற்செய்தியை எடுத்துரைத்து, அவர்களை கிறிஸ்துவின் மீது நம்பிக்கை கொள்ளச் செய்தார்.
பாடல் பாடுவதிலும் டென்னிஸ் விளையாடுவதிலும் மலையேவதிலும் அதிக ஆர்வம் கொண்ட சியரா படனோவுக்கு அதிகமான நண்பர்கள் கிடைத்தார்கள். அவர்கள் எப்போதும் அவருக்கு பக்க பலமாக இருந்து வந்தார்கள். ஒருசமயம் அவர் தன்னுடைய தோழியோடு டென்னிஸ் விளையாடிக்கொண்டிருந்தபோது அவருடைய தோள்பட்டையில் திடிரென்று அதிகமான வலியோடு ஏற்பட, அவர் சரிந்து கீழே விழுந்தார். உடனே அவருடைய தோழியும் அங்கிருந்த மற்ற நண்பர்களும் அவரைத் தூக்கிக்கொண்டு மருத்துவமனைக்கு ஓடினார்கள். மருத்துவமனையில் அவரை அனுமதித்து சோதித்துப் பார்த்தபோதுதான் தெரிந்தது அவருக்கு எலும்புப் புற்றுநோய் (Bone Cancer) இருக்கின்றது என்றும், இன்னும் ஓரிரு ஆண்டுகளில் அவர் இறந்துவிடுவார் என்றும். விஷயம் அறிந்து அவருடைய நண்பர்களும் அவருடைய பெற்றோரும் மிகவும் வருந்தினார்கள். சியரா படனோவோ அதனை இறைத் திருவுளமென ஏற்றுக்கொண்டார்.
சியரா படனோ மருத்துவமனையில் இருந்த நாட்களில் எல்லாம், அங்கிருந்த நோயாளிகளிடம் மிகவும் அன்பாக நடந்துகொண்டார். அதே நேரத்தில் ஆண்டவரின் நற்செய்தியை அவர்களுக்கு எடுத்துரைத்துக் கொண்டே இருந்தார். இது அங்கிருந்த மருத்துவர்களுக்கு மிகவும் ஆச்சரியமாக இருந்தது. எப்படி இவளால் மரணம் நெருங்கக்கூடிய தருணத்திலும் மகிழ்ச்சியாக, கண்களில் ஒளி நிறைந்து இருக்க முடிகின்றது என்று. சியரா படனோ எப்போதும் ‘இயேசுவே, இத்துன்பம் உமது திருவுளமானால், இதனை அப்படியே ஏற்றுக்கொள்ள தயார்” (If this is what you want, Jesus so do I) என்று சொல்லிவந்தார். அவர் மருத்துவமனையில் இருக்கின்றார் என்ற செய்தி கேள்விப்பட்டு கர்தினால் சல்டரினி உட்பட பலர் வந்து பார்த்துச் சென்றார்கள். எல்லாரிடத்திலும் அவர் இன்முகத்தோடே பேசி வழியனுப்பினார்.
நாட்கள் ஆக ஆக, சியரா படனோவிற்கு நோய் முற்றியது. அவரால் நடமாடக்கூடிய முடியவில்லை. அப்படியிருந்த போதும் அவர் ஆண்டவரைத் துதித்துக் கொண்டே இருந்தார். 1990 ஆம் ஆண்டு அக்டோபர் 10 ஆம், அவருடைய பெற்றோர் மற்றும் நண்பர்கள் அவற்றைச் சூழ்ந்திருக்க அவர் “Be Happy Because I am happy” என்ற வார்த்தைகளை உதிர்த்தவாறு இறையடி சேர்ந்தார். இவருக்கு 2010 ஆண்டு செப்டம்பர் மாதம் அருளாளர் பட்டம் கொடுக்கப்பட்டது. அப்பட்டமளிப்பு விழாவில் ஐம்பதாயிரத்துக்கும் மேற்ப்பட்டோர் கலந்துகொண்டது எல்லாருக்கும் ஆச்சரியத்தைத் தந்தது.
