ஞாயிறு தோழன்

திருப்பலி முன்னுரை

கிறிஸ்துவின் அன்பைச் சுவைக்க வருகை புரிந்திருக்கும் உங்கள் அனைவரையும் ஞாயிறு திருப்பலிக்கு அன்போடு அழைக்கின்றோம். இன்றைய நற்செய்தி வாசகமானது இறைவனை அன்பு செய்வது, நமது சகோதர-சகோதரிகளை அன்பு செய்வதில் வெளிப்படவேண்டும் என்ற சிந்தனையை நமக்குக் கற்றுத்தருகிறது.

கடவுளை அன்பு செய்வது என்பது வெறும் செபம் செய்வதோ, ஆலயத்திற்கு மட்டும் செல்வதோ அல்ல; நமது எண்ணங்கள், செயல்கள், திறமைகள், உறவுகள் அனைத்திலும் கடவுளுக்கு முதலிடம் கொடுப்பதாகும். கடவுளை அன்பு செய்வது போன்று நம்முடன் வாழும் மனிதரையும் அன்பு செய்யவேண்டும். புன்னகை, மென்மையான வார்த்தை, மன்னிப்பு, நோயாளிகளைச் சந்தித்தல், துன்பப்படுவோருக்கு ஆறுதல் கூறுதல், பசியுடன் இருப்பவருக்கு உதவி செய்தல், குறிப்பறிந்து கொடுத்தல், துன்ப நேரத்தில் உடனிருத்தல் இவை எல்லாம் அன்பின் செயல்களே. 

அன்பே கடவுள்; அன்பே திருச்சட்டத்தின் நிறைவு.  மனித வாழ்க்கையின் மிக அழகானதும், உயர்ந்ததுமான அன்பு என்ற பண்பை நமது அணிகலனாக்குவோம். நம் அன்றாட வாழ்வில் இறைவனை முழு இதயத்தோடு அன்பு செய்யவும், நம்மைச் சுற்றியுள்ள ஒவ்வொருவரிலும் இறைவனின் முகத்தைக் காணவும் வரம் வேண்டி இணைவோம் அன்பின் பலியில். 

முதல் வாசகம் முன்னுரை

நம்மைச் சுற்றியுள்ள ஏழையர், ஆதரவற்றோர், அந்நியர், பலவீனமானவர் இவர்களில் இறைவனின் முகத்தைக் காண வேண்டும்; துன்பத்தில் இருப்பவர்களின் வேதனையை நாம் உணர்ந்து ஆறுதல் கூறவேண்டும். நீதியும் இரக்கமும் கொண்ட இதயத்தை நாம் பெற்று, பிறரின் துயரத்தில் துணை நிற்கும் மனிதர்களாக வாழ அழைக்கும் முதல் வாசகத்திற்குச் செவிமடுப்போம்.

இரண்டாம் வாசகம் முன்னுரை

தெசலோனிக்க மக்கள் பல துன்பங்களுக்கும் வேதனைகளுக்கும் மத்தியிலும், மகிழ்ச்சியோடு இறைவார்த்தையை ஏற்றுக்கொண்டார்கள். அவர்கள் சிலைவழிபாட்டை விட்டுவிலகி, உயிருள்ள உண்மையான இறைவனுக்கு ஊழியம் செய்தார்கள். துன்ப நேரத்தில் உறுதியான நம்பிக்கையோடு வாழ்ந்து நற்செய்திக்குச் சான்று பகர்ந்து வாழ நம்மையும் அழைக்கும் இரண்டாம் வாசகத்திற்குச் செவிமடுப்போம். 

நம்பிக்கையாளர் மன்றாட்டுகள்

1. அன்பின் இறைவா! உலகெங்கும் வாழும் உமது திரு அவைத் தலைவர்கள் இறைவார்த்தையைத் துணிவுடனும் மகிழ்ச்சியுடனும் அறிவித்து, நம்பிக்கை, அன்பு ஆகியவற்றை விதைத்து, கிறிஸ்துவின் உயிருள்ள சாட்சிகளாய் வாழ வரம்தர வேண்டுமென்று இறைவா உம்மை மன்றாடுகின்றோம்.

2. ஞானத்தின் ஊற்றே எம் இறைவா! எம் நாட்டில் அமைதி, நீதி, சகோதரத்துவம் நிலவவும், ஏழையர், ஆதரவற்றோர், நோயுற்றோர் பாதுகாக்கப்படவும், ஆட்சியாளர்கள் நேர்மையுடனும் இரக்கத்துடனும் விவேகத்துடனும் செயல்படவும்  அருள்தர வேண்டுமென்று இறைவா உம்மை மன்றாடுகின்றோம்.

3. கைவிடாத தெய்வமே எம் இறைவா! எம் குடும்பங்களில் அன்பும் புரிந்துகொள்ளுதலும் பெருகவும், பெற்றோரும் பிள்ளைகளும் ஒருவருக்கொருவர் இறையன்பின் சாட்சிகளாக வாழவும் தேவையான அருளாசிரை எமது குடும்பங்களுக்குத் தந்து காத்திடவேண்டுமென்று இறைவா உம்மை மன்றாடுகின்றோம்.

4. உடனிருக்கும்  தெய்வமே! எங்கள் வாழ்க்கையில் சந்திக்கின்ற பிரச்சினைகள், குழப்பங்கள் அனைத்திலும் உம்மோடு இணைந்திருக்கவும், ஒவ்வொரு நாளும் இறையன்பிலும் பிறரன்பிலும் வளரவும் தேவையான மனப்பக்குவத்தை எமக்குத் தந்து காத்திட வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

உலக வாழ்க்கையிலும், கடவுளுக்கு உகந்தவற்றிலும் கவனமாக இருந்து நீதியிலும் நேர்மையிலும் நாளும் வளர ஆண்டின் பொதுக்காலம் 29-ஆம் ஞாயிறு நமக்கு அழைப்பு விடுக்கிறது. இன்றைய நற்செய்தியில் இயேசுவிடம் வரி செலுத்துவது குறித்து கேட்கப்பட்டபோது, “சீசருடையதைச் சீசருக்கும், கடவுளுடையதைக் கடவுளுக்கும் கொடுங்கள்” என்று பதிலளித்தார். இவ்வார்த்தைகள் நமது அன்றாடப் பொறுப்புகளைத் தவிர்க்காமல், அவற்றை நீதியுடனும் நேர்மையுடனும் நிறைவேற்ற அழைக்கிறது.

நமது உயிர், உள்ளம், மனச்சான்று, நேரம், திறமை அனைத்தும் இறைவன் நமக்கு இலவசமாகக் கொடுத்த கொடைகள் என்பதை உணர வேண்டும். பணம், பதவி, அதிகாரம், செல்வாக்கு, புகழ் போன்றவை நமது வாழ்வின் மையமாகிவிடாமல், இறைவனுக்குரிய இடத்தை இறைவனுக்குக் கொடுக்கவேண்டும். “நமது வாழ்வுக்கு கடவுள் மட்டுமே போதும்” என்று புனித அவிலா தெரசா கூறுகின்றார். உலகம் நமக்குப் பலவற்றைத் தரலாம்: ஆனால், நமது உள்ளத்தின் ஆழ்ந்த நிறைவு இறைவனிடமே உள்ளது.

எனவே, உயிருள்ள ஆலயமாகிய மனச்சான்றின் குரலுக்குச் செவிகொடுத்து வாழ்வோம். கடவுளின் சாயலில் படைக்கப்பட்டுள்ள நாம் கடவுளுக்கு உகந்தவற்றில் கருத்தாய் இருப்போம். நமக்கு அரணாகவும், வலிமையாகவும், கோட்டையாகவும் இருக்கும் ஆண்டவரின் பாதையில் நித்தம் நேர்மையுடன் பயணித்து இறையரசைக் கட்டியெழுப்ப வரம் வேண்டி இணைவோம் இத்திருப்பலியில்.

முதல் வாசகம் முன்னுரை

இன்றைய முதல் வாசகத்தில் சைரசு ஆண்டவரை அறியாதவராக இருந்தபோதிலும், இறைவன் அவரைத் தேர்ந்தெடுத்து, தம் மக்களுக்காகப் பணிசெய்யப் பணிக்கிறார். பல்வேறு மனிதர், நிகழ்வுகள், வாய்ப்புகள் ஆகியவற்றின் வழியாகத் தம் திருவுளத்தை வெளிப்படுத்தும் இறைவனை நாமும் பற்றிக் கொண்டு, அவரின் உயிருள்ள வார்த்தைக்குச் செவிமடுப்போம்.

இரண்டாம் வாசகம் முன்னுரை

இன்றைய இரண்டாம் வாசகத்தில் புனித பவுல் தெசலோனிக்கா திரு அவையினரின் நம்பிக்கை, அன்பு மற்றும் எதிர்நோக்கை நினைவுகூர்ந்து அவர்களுக்காக இறைவனுக்கு நன்றி செலுத்துகிறார். நாமும் இறைவார்த்தையை நம்பிக்கையோடு ஏற்றுக்கொண்டு நம்பிக்கை, அன்பு, எதிர்நோக்கு இவற்றில் நிலைத்திருக்க அழைக்கும் இறைவார்த்தைக்குச் செவிமடுப்போம்.

நம்பிக்கையாளர் மன்றாட்டுகள்

1. அன்பின் இறைவா! நம்பிக்கையைப் போதிக்கும் திரு அவைத் தலைவர்கள், தமது வார்த்தைகளால் மட்டுமல்லாமல், அன்பான செயல்களாலும்  நற்செய்தியின் சாட்சியாகத் திகழவும், தேவையான ஞானத்தைத் தந்து காத்திட வேண்டுமென்று இறைவா உம்மை மன்றாடுகின்றோம்.

2. பாதுகாக்கும் பரம்பொருளே எம் இறைவா! எமது குடும்பங்களில் அன்பும், புரிந்துகொள்ளும் ஆற்றலும் வளர்ந்திடவும், துன்பங்களின் மத்தியிலும் கிறிஸ்துவின் மீது கொண்ட எதிர்நோக்கை நாங்கள் இழக்காமல் வாழவும், தேவையான அருள்வரங்களை எமக்குத் தந்து காத்திட வேண்டுமென்று இறைவா உம்மை மன்றாடுகின்றோம்.

3. ஞானத்தின் ஊற்றே எம் இறைவா! இன்றைய இளைஞர்களும் குழந்தைகளும் உலகத்தின் கவர்ச்சிகளுக்கு மத்தியில் கிறிஸ்துவைத் தங்கள் வாழ்வின் மையமாக ஏற்றுக்கொண்டு நம்பிக்கை, அன்பு, நல்லொழுக்கம் ஆகியவற்றில் வளர்ந்து பிறருக்கு முன்மாதிரிகளாத் திகழ வரம்தர வேண்டுமென்று இறைவா உம்மை மன்றாடுகின்றோம்.

4. அமைதியின் தெய்வமே எம் இறைவா! நோய், வறுமை, தனிமை, கடன்தொல்லை, இழப்புகள் எனப் பல்வேறு சோதனைகளால் பாதிக்கப்பட்ட அனைவருக்கும் ஆறுதலையும், ஆற்றலையும் தந்து காத்திடவும், கடவுளின் துணை தம்மோடு இருக்கிறது என்ற நம்பிக்கையில் அவர்கள் வாழவும் வரம்தர வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

ஒப்பற்ற செல்வமாகிய ஆண்டவரைப் பற்றி அறிவதே உண்மையான மகிழ்ச்சி என்று வாஞ்சையோடு வருகை புரிந்திருக்கும் உங்கள் அனைவரையும், இயேசுவின் பெயரால் ஞாயிறு திருப்பலிக்கு அன்போடு அழைக்கின்றோம். இயேசுவின் அழைப்பிற்குச் செவிமடுத்து அவரது பிள்ளைகளாக வாழ ஆண்டின் பொதுக்காலம் 28-ஆம் ஞாயிறு நமக்கு அழைப்புவிடுக்கிறது.

இன்றைய நற்செய்தியில் ஆண்டவர் இயேசு  விண்ணரசை ஒரு திருமண விருந்திற்கு ஒப்பிடுகிறார். அரசர் ஒருவர் அனைவரையும் தம் மகனின் திருமண விருந்திற்கு அன்புடன் அழைக்கின்றார்; ஆனால், அழைக்கப்பட்டவர்கள் அந்த அழைப்பைப் பொருட்படுத்தாமல் தங்கள் சொந்த வேலைகளிலும், உலகக் கவலைகளிலும் மூழ்கிச் செல்கின்றனர். இந்த உவமை இறைவனின் அழைப்பு என்பது சிலருக்கானது மட்டுமல்ல; ஒவ்வொருவருக்கும் வழங்கப்படும் அருளின் அழைப்பு என்பதை நமக்கு நினைவூட்டுகிறது. ஒவ்வொரு திருப்பலியும் இறைவனோடு உறவுகொள்ளவும், அவரது விருந்தில் பங்கேற்கவும், நம் வாழ்வை அவருக்கேற்ப மாற்றிக்கொள்ளவும் கிடைக்கும் ஓர் அரிய வாய்ப்பாகும். இயேசுவின் விழுமியங்களை ஆடைகளாக அணிவோம்.  அன்பில்லாத இதயத்திற்கு அன்பின் ஆடை தேவை; மன்னிக்காத இதயத்திற்கு மன்னிப்பின் ஆடை தேவை; பொறாமை கொண்ட இதயத்திற்குத் தூய்மையின் ஆடை தேவை; சுயநலமான இதயத்திற்குத் தியாகத்தின் ஆடை தேவை என்பதை அறிந்து நமது வாழ்க்கைப் பாதையை மாற்ற முயற்சி செய்வோம். இறைவனின் அழைப்பை அலட்சியம் செய்யாமல் தூய்மையான மனத்துடன் அவரது விருந்தில் பங்கேற்போம். “அழைப்புப் பெற்றவர்கள் பலர்; ஆனால், தேர்ந்தெடுக்கப்பட்டவர்களோ சிலர்” என்ற ஆண்டவரின் வார்த்தையில், தேர்ந்தெடுக்கப்பட்ட சிலரில் நாமும் ஒருவராக வாழ வரம் வேண்டி இணைவோம் இத்திருப்பலியில்.

முதல் வாசகம் முன்னுரை

ஆண்டவர் தம் மக்களுக்கு ஆயத்தப்படுத்தும் விருந்தையும், எல்லா மக்கள்மீதும் பொழியும் அவரது இரக்கத்தையும், நம்மீது அவர் கொண்டுள்ள உண்மையான அன்பையும் பற்றி இறைவாக்கினர் எசாயா எடுத்துரைக்கிறார். நம் மரணத்தை அழித்து, கண்ணீரைத் துடைத்து, நமக்கு மீட்பையும் மகிழ்ச்சியையும் வழங்கும் இறைவனில் நம்பிக்கை கொண்டு வாழ அழைக்கும் முதல் வாசகத்திற்குச் செவிமடுப்போம். 

இரண்டாம் வாசகம் முன்னுரை

வாழ்வில் ஏற்படுகின்ற இன்பங்கள், துன்பங்கள், தோல்விகள், வெற்றிகள், நிறைகள், குறைகள், வளமை, வறுமை என அனைத்திலும் இறைவனைச் சார்ந்து வாழும்போது எதையும் நம்மால் எதிர்கொள்ள முடியும். நமது வழியாகவும் ஒளியாகவும் இருக்கும் இயேசுவின்மீது நம்பிக்கையுடன், அனைத்திலும் இறைத்திருவுளம் அறிந்து செயல்பட அழைக்கும் இரண்டாம் வாசகத்திற்குச் செவிமடுப்போம்.

நம்பிக்கையாளர் மன்றாட்டுகள்

1. அன்பின் இறைவா! எம் திரு அவைத் தலைவர்கள் தமது பணியில் உண்மையுடனும் தியாக உள்ளத்துடனும் செயல்பட்டு, பலரை இறைவனிடம் அழைத்துச் செல்லும் கருவிகளாகத் திகழ்ந்திட தேவையான ஞானத்தைத் தந்து காத்திட வேண்டுமென்று இறைவா உம்மை மன்றாடுகின்றோம்.

2. இரக்கத்தின் ஆண்டவரே! உலகக் கவலைகளாலும், பல்வேறு தடைகளாலும் உம்மிடமிருந்து விலகி இருக்கும் மக்கள் அனைவரும் உமது அன்பையும், பேரிரக்கத்தையும் உணர்ந்து மீண்டும் உம்மிடம் திரும்பிவர திட மனத்தைத் தந்து காத்திட வேண்டுமென்று இறைவா உம்மை மன்றாடுகின்றோம்.

3. பாசமுள்ள ஆண்டவரே! எம் குடும்பங்கள் இறைவிருந்தில் ஒன்றிணைந்து பங்கேற்கும் குடும்பங்களாகவும், அன்பு, நம்பிக்கை, மன்னிப்பு, பகிர்வு ஆகியவற்றை வளர்க்கின்ற குடும்பங்களாக விளங்கிடவும் வரம்தர வேண்டுமென்று இறைவா உம்மை மன்றாடுகின்றோம்.

4. கருணையின் இறைவா! திருமண விருந்திற்கு அழைக்கப்பட்டவர்களைப்போல நாங்களும் இறையழைப்பை ஏற்று, நற்செய்தி கூறும் விழுமியங்களைக் கடைப்பிடித்து வாழ வரம்தர வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

“என் அருள் உனக்குப் போதும்” என்று மொழிந்த இறைவனின் அருள்வரங்களைப் பெற, ஆவலோடு வந்துள்ள உங்கள் அனைவரையும் அன்போடு இந்த ஞாயிறு திருப்பலிக்கு வரவேற்கிறோம். இன்றைய நற்செய்தியில் திராட்சைத் தோட்டத்தின் உரிமையாளர் தன் தோட்டத்தைப் பராமரிக்கும் பணியைப் பொறுப்பான வேலைக்காரரிடம் ஒப்படைக்கிறார். ஆனால், அவர்களோ நன்றிகெட்டவர்களாகவும், பேராசை கொண்டவர்களாகவும் செயல்பட்டு, அனுப்பப்பட்ட பணியாளர்களையும் இறுதியாக உரிமையாளரின் ஒரே மகனையும் கொன்றுவிட்டார்கள். இதற்குக் காரணம் பொறாமை என்ற அரக்கன்.

“பொறாமை கொண்டவன் ஒருபோதும் மன அமைதியையோ, ஆன்மிக விழிப்புணர்வையோ அடைய முடியாது” என்கிறார் புத்தர். திராட்சைத் தோட்டம் என்பது கடவுள் நமக்குக் கொடுத்துள்ள ஆன்மிகக் கொடைகள் மற்றும் கடமைகளைக் குறிக்கிறது. நாம் அனைவரும் அதற்குப் பொறுப்பான தோட்டக்காரர்கள். தகுந்த காலத்தில் நாம் கடவுளுக்கு நற்செயல்களாகிய கனிகளைக் கொடுக்க வேண்டும். நற்செயல்களாலேயே இறைவனின் அழைப்பிற்கு நாம் தகுதியுள்ளவராகிறோம். நாம் அனைவருமே இந்த உலகிற்கு வந்துள்ள விருந்தினர்கள். எனவே, எதன்மீதும் பேராசை கொள்ளாமல்  வாழ்க்கை என்ற தோட்டத்தில் அன்பு, இரக்கம், பொருமை, விட்டுக்கொடுத்தல், மன்னிப்பு, நீதி, நேர்மை, அமைதி என்ற மதிப்புமிக்கக் கனிகளை இந்த உலகிற்கும் உறவுகளுக்கும் கொடுத்து வாழ்வோம். புனித பிரான்சிஸ் அசிசியார் கூறுவது போன்று, பகையுள்ள இடத்தில் பாசத்தையும், அவநம்பிக்கையுள்ள இடத்தில் நம்பிக்கையையும், இருள் சூழ்ந்த இடத்தில் ஒளியையும், துயரம் நிறைந்த உள்ளத்திற்கு மகிழ்ச்சியையும் கொடுத்து, அனைத்திலும் இறைவனைக் கண்டு மகிழ்வோடு வாழ வரம் வேண்டி இணைவோம் இத்திருப்பலியில்.

முதல் வாசகம் முன்னுரை

இன்றைய முதல் வாசகம், கடவுளுக்கும் இஸ்ரயேலருக்கும் இடையேயான உறவை ஒரு திராட்சைத் தோட்ட உவமையின் வழியாக அழகாக எடுத்துரைக்கிறது. இஸ்ரயேல் மக்களைக் கடவுள் கண்மணிபோல் பாதுகாத்தார். அளவற்ற அன்புகாட்டி பாதுகாத்த இறைனுக்கு, இஸ்ரயேல் மக்கள் நம்பிக்கைத் துரோகம் செய்தார்கள். அன்றாடம் கடவுளின் அன்பைச் சுவைக்கும் நாம், நற்கனிகளைக் கொடுத்து வாழ அழைக்கும் இறைவார்த்தைக்குச் செவிகொடுப்போம்.

இரண்டாம் வாசகம் முன்னுரை

வாழ்க்கையில் கவலைகளும், நாளைய பற்றிய பயங்களும் நம்மை ஆட்கொள்ளும்போது கலங்காமல் நன்றியுணர்வோடு இறைவனிடம் செபிக்குமாறு பவுல் நமக்கு அழைப்பு விடுக்கிறார். உண்மை, நீதி, தூய்மை, கண்ணியம்,  நேர்மை போன்ற மதிப்பீடுகளை ஒவ்வொரு நாளும் நாடித் தேடிடவும், இறைநம்பிக்கையில் வேரூன்றிடவும் அழைக்கும் இரண்டாம் வாசகத்திற்குச் செவிமடுப்போம்.

இறைநம்பிக்கையாளர் மன்றாட்டுகள்

1. ஞானத்தின் ஊற்றே எம் இறைவா! உமது திராட்சைத் தோட்டமாகிய திரு அவையை வழிநடத்த நீர் தேர்ந்துகொண்ட திருத்தந்தை, ஆயர்கள், அருள்பணியாளர்கள் மற்றும் துறவியர் அனைவரும் நற்பொறுப்பாளர்களாகச் செயல்பட வரம்தர வேண்டுமென்று இறைவா உம்மை மன்றாடுகின்றோம்.

2. நீதியின் இறைவா! உலக நாடுகளை ஆளும் தலைவர்கள் தங்களுக்குக் கொடுக்கப்பட்டுள்ள அதிகாரத்தைச் சுயநலத்திற்குப் பயன்படுத்தாமல், ஏழை எளிய மக்களின் நலனிற்காகவும், நாட்டின் வளர்ச்சிக்காகவும் பயன்படுத்தத் தேவையான ஞானத்தைத் தலைவர்களுக்குத் தந்து காத்திட வேண்டுமென்று இறைவா உம்மை மன்றாடுகின்றோம்.

3. அன்பின் இறைவா! புனித பிரான்சிஸ்கு அசிசியாரின் விழாவைக் கொண்டாடும் இந்நாளில் அப்புனிதரைப் போன்று இயற்கையிலும், ஏழை மக்களிலும் உமது முகத்தைக் காணவும், ஆண்டவரைச் சுவைப்பதில் அலாதி இன்பம் கொண்டு வாழவும் வரம்தர வேண்டுமென்று இறைவா உம்மை மன்றாடுகின்றோம்.

4. வழிகாட்டும் நாயகனே எம் இறைவா! எம் இளையோர் இணையதளத்தில் தங்கள் வாழ்க்கையைத் தொலைத்துவிடாமல், தகவல்தொடர்பு சாதனங்களை நல்ல முறையில் பயன்படுத்திடவும், கடவுளை அறிவதில் ஆர்வம் கொண்டு வாழவும் வரம்தர வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

மனமாற்றம் பெற்று புதுவாழ்வு வாழ ஆண்டின் பொதுக்காலம் 26-ஆம் ஞாயிறு நமக்கு அழைப்பு விடுக்கிறது. இன்றைய நற்செய்தியில் கூறப்பட்டுள்ள தோட்டத்திற்கு வேலை செய்ய அனுப்பப்படும் இரு மகன்களின் உவமையில் ‘போகமாட்டேன்’ என்று முதலில் மறுத்து, பின்னர் மனம்மாறிச் சென்று வேலை செய்த முதல் மகனைப்போல, நாமும் பல நேரங்களில் கடவுளின் வார்த்தைக்குக் கீழ்ப்படியத் தவறியிருக்கலாம்; ஆனால், நமது பாவங்களையும் தவறுகளையும் உணர்ந்து, உண்மையான மனமாற்றத்தோடு அவரிடம் திரும்பி வரும்போது கடவுள் நம்மை அன்போடு அரவணைத்துக்கொள்வார்.

வெறும் வார்த்தைகளால் அல்லாமல், வாழ்வால் இறைவனின் திருவுளத்தை நிறைவேற்றுவதே சீடத்துவம். ‘போகிறேன்’ என்று சொல்லிவிட்டுப் போகாத இரண்டாம் மகனைப்போல, நமது நம்பிக்கை வெறும் உதட்டளவிலான பேச்சாக மட்டும் நின்றுவிடக் கூடாது; நாம் செய்யும் ஒவ்வொரு செயலிலும் இறைவனின் விருப்பத்தைப் பிரதிபலிக்கவேண்டும். திருமண நாளிலும், துறவற அர்ப்பண நாளிலும் ஆண்டவர்முன் வார்த்தைப்பாடுகளைக் கொடுக்கின்றோம். கொடுத்த வார்த்தைப்பாடுகளைப் பின்பற்றுகிறோமா? குறையில்லாத மனிதர் இல்லை; எனவே, குறைகளைக் குறைத்து, உண்மையான மனமாற்றம் அடைந்து  இயேசுவின் உண்மையான சீடர்களாய் வாழ வரம் வேண்டி இணைவோம் இத்திருப்பலியில்.

முதல் வாசகம் முன்னுரை

இன்றைய முதல் வாசகத்தில், எசேக்கியேல் இறைவாக்கினர்  இறைவனின் நீதி மனிதரின் கணிப்பைக் காட்டிலும் எவ்வளவு மேலானது என்பதை நமக்கு எடுத்துக்காட்டுகின்றார். ஒரு பாவி தான் செய்துவந்த தீமையிலிருந்து விலகி மனம்மாறி, நேர்மையோடும் நீதியோடும் வாழ்ந்தால் அவர் நிச்சயம் வாழ்வார் என்று கூறி, மனமாற்றம் பெற்று நல்மனிதர்களாக வாழ அழைக்கும் இவ்வாசகத்திற்குச் செவிமடுப்போம்.

இரண்டாம் வாசகம் முன்னுரை

வீண்பெருமைக்கும் பகட்டான வாழ்விற்கும் சுயநலத்திற்கும் முக்கியத்துவம் கொடுக்காமல், மனத்தாழ்மை உள்ளவர்களாய் வாழவும், மற்றவர்களைப் பற்றிய நமது எண்ணங்கள் உயர்வானதாக இருக்கவும், இயேசுவைப் போன்று தாழ்ச்சியுள்ளவர்களாய் வாழவும், பிறருக்கு உதவி செய்வதில் கருத்தாய் இருக்கவும் அழைக்கும் இரண்டாம் வாசகத்திற்குச் செவிமடுப்போம். 

நம்பிக்கையாளர் மன்றாட்டுகள்

1. அன்பின் இறைவா எம் திரு அவையை வழிநடத்தும் திருத்தந்தை, ஆயர்கள், அருள்பணியாளர்கள், துறவியர் அனைவரும் இயேசுவின் மனநிலையைக் கொண்டு வாழவும், சொற்களைவிட செயலுக்கு முக்கியத்துவம் கொடுத்துச் சிறப்பாகப் பணி செய்யவும் தேவையான அருள்வரங்களைத் தந்து காத்திட வேண்டுமென்று இறைவா உம்மை மன்றாடுகின்றோம்.

2. இரக்கமுள்ள இறைவா! ‘போகிறேன்’ என்று கூறிவிட்டு வேலைக்குச் செல்லாத இரண்டாவது மகனைப்போல, உதட்டளவில் பேசும் வாய்ச்சொல் வீரர்களாக இல்லாமல், எங்களது பாவநிலையை உணர்ந்து, உமது திருவுளத்திற்குக் கீழ்ப்படிந்து வாழ்ந்திட வரம்தர வேண்டுமென்று இறைவா உம்மை மன்றாடுகின்றோம்.

3. அன்பின் இறைவா! உமது பிள்ளைகளாகிய நாங்கள் அனைவரும் எங்களைப் பற்றி பெருமை பாராட்டுவதில் முனைப்பாக இல்லாமல், மற்றவர்களைப் பற்றி உயர்வான எண்ணம் கொண்டவர்களாக, கிறிஸ்துவைப் போன்று தாழ்ச்சியும் தூய்மையான இதயமும் கொண்டு  வாழ வரம்தர வேண்டுமென்று இறைவா உம்மை மன்றாடுகின்றோம்.

4. இரக்கத்தின் இறைவா! எம் நாட்டிலும், எமது குடும்பங்களிலும் பல்வேறு கொடிய நோயினால் பாதிக்கப்பட்டுத்  துன்பப்படும் எம் சகோதர- சகோதரிகளுக்கு நிறைவான சுகத்தையும், அந்த நோயினின்று விடுதலையையும், மனவலிமையையும் தந்து காத்திட வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

இறைவனின் அளவற்ற இரக்கத்தையும், தாராள உள்ளத்தையும் பற்றி சிந்திக்க ஆண்டின் பொதுக்காலம் 25-ஆம் ஞாயிறு நமக்கு அழைப்பு விடுக்கிறது. இன்றைய நற்செய்தியில் திராட்சைத் தோட்ட உரிமையாளர் அதிகாலையில் வேலைக்கு வந்தவர்களுக்கும், மாலையில் ஒரு மணிநேரம் மட்டுமே வேலை செய்தவருக்கும் சமமாக ஒரு தெனாரியம் கொடுக்கிறார். மனிதநீதி, வேலையின் அளவிற்கு ஏற்ப கூலி என்று கணக்கிடுகிறது. ஆனால், இறைவனின் நீதியோ ஒவ்வொருவரின் தேவையை நிறைவு செய்யும் அளவற்ற அன்பு கொண்டது. இறைவனின் இரக்கம் அனைத்து உயிர்களையும் தாங்கி நிற்கும் பேரன்பின் வடிவம்; இவ்வுலகத்தை இயக்கும் பேராற்றல். எனவே, மற்றவர்களோடு நம்மை ஒப்பிட்டுப் பார்த்துப் பொறாமைப்படாமல், மற்றவர்களின் வளர்ச்சியை விமர்சிக்காமல்  இறைவனின்  தாராளக் கொடையை நன்றியோடு நினைப்போம். நாம் எப்போதும் இறைவனின் இரக்கத்தின் நிழலில் வாழ்கிறோம் என்பதை மனத்தில் இருத்துவோம். பிறருக்குக் கிடைக்கும் ஆசிகளையும், இறைவனின் இரக்கத்தையும் கண்டு மகிழமுடியாத இதயமே ஆன்மிக வறுமையின் அடையாளம். பிறரின் ஆசிகளையும் வளர்ச்சியையும் கண்டு மகிழும் தாராள உள்ளத்தை நமக்குத்தர மன்றாடுவோம். பிறரோடு ஒப்பிட்டுப் பார்க்கும் குணத்தைத் தவிர்த்து, இறைவனின் இரக்கம் எப்போதும் நம்முடன் இருப்பதற்காய் நன்றி கூறுவோம். அளவிடமுடியாத பெருங்கடல் போன்ற கடவுளின் இரக்கத்தால்  வாழும் நாம் இந்த உலகம் என்னும் இறைவனின் திராட்சைத் தோட்டத்தில் மகிழ்வோடு பணிசெய்து, பன்மடங்கு பலன் கொடுக்க வரம் வேண்டி இணைவோம் இத்திருப்பலியில்.

முதல் வாசகம் முன்னுரை

ஆண்டவரைக் கண்டுகொள்ளக்கூடிய வாய்ப்புள்ள காலத்திலேயே அவரைத் தேடவும், அவர் அருகில் இருக்கும்போதே அவரை நோக்கிக் கூப்பிடவும் இறைவாக்கினர் எசாயா நமக்கு அழைப்புவிடுக்கிறார். நமது தீய சிந்தனைகளையும் செயல்களையும் விட்டுவிலகி, ஆண்டவரிடம் திரும்பி வரும்போது நம்மை மன்னிக்கக்  காத்துக் கொண்டிருக்கிறார் என்ற நம்பிக்கைச் செய்தியைக் கொடுக்கும் முதல் வாசகத்திற்குச் செவிமடுப்போம்.

இரண்டாம் வாசகம் முன்னுரை

‘வாழ்வது கிறிஸ்து; சாவது ஆதாயம்’ என்ற உறுதியான நம்பிக்கையோடு, தான் வாழ்ந்தாலும் இறந்தாலும் கிறிஸ்துவின் மாட்சி விளங்குவதே தனது ஒரே விருப்பம் என்கிறார் பவுலடியார். கிறிஸ்துவோடு இணைந்து வாழும்போது உறவுகள் வளரும், மகிழ்ச்சி பெருகும், துன்பங்கள் குறையும். எனவே, நாம் ஒருவர் மற்றவருக்கு நம்பிக்கையின் தூதுவராக வாழவும், நல்மதிப்பீடுகளை வாழ்க்கையால் விதைக்கவும் அழைக்கும் இரண்டாம் வாசகத்திற்குச் செவிமடுப்போம்.

நம்பிக்கையாளர் மன்றாட்டுகள்

1. அன்பின் இறைவா! எம் திரு அவைத் தலைவர்கள் கிறிஸ்துவை மட்டுமே தங்கள் வாழ்வின் மையமாகக் கொண்டு வாழவும், தங்களிடம் ஒப்படைக்கப்பட்ட மக்களிடம் இரக்கத்தோடும் அன்போடும் இருக்கவும், தங்களை அழைத்த ஆண்டவர் கைவிடமாட்டார் என்ற நம்பிக்கையில் தொடர்ந்து தொய்வின்றிப் பயணிக்கவும் வரம்தர வேண்டுமென்று இறைவா உம்மை மன்றாடுகின்றோம்.

2. பாசமுள்ள ஆண்டவரே! உமது பிள்ளைகளாகிய நாங்கள் அனைவரும் தீய வழிகளை விட்டுவிலகி உமது மதிப்பீடுகளின் வழியில் வாழவும், மற்றவர்களின் வளர்ச்சியில் மகிழ்ந்திருக்கவும், உடன் வாழும் சகோதர, சகோதரிகளோடு அமைதியோடு வாழவும் வரம்தர வேண்டுமென்று இறைவா உம்மை மன்றாடுகின்றோம்.

3. இரக்கத்தின் ஆண்டவரே, எம் பங்கில் உள்ள குடும்பங்களில் அன்பு, மன்னிப்பு, பகிர்வு, விட்டுக்கொடுத்தல் போன்ற மதிப்பீடுகள் வளரவும், தீராத நோய்கள் விலகிடவும், அருள்செல்வம், பொருள்செல்வம் பெருகிடவும் வரம்தர வேண்டுமென்று இறைவா உம்மை மன்றாடுகின்றோம்.

4. வல்லமையின் ஆண்டவரே! எம் பங்கிலுள்ள குழந்தைகள் படிப்பிலும் பக்தியிலும் வளர்ந்திடவும், திருப்பலி, மறைக்கல்வி, பீடச்சிறுவர்கள் பணி  போன்றவற்றிற்கு முக்கியத்துவம் கொடுக்கவும், கடவுளைப் பற்றிய அறிவில் வளரவும் வரம்தர வேண்டுமென்று இறைவா உம்மை மன்றாடுகின்றோம்.