தமிழக செய்திகள்

திண்டுக்கல் மறைமாவட்ட ஆயர் மேதகு பி. தாமஸ் பால்சாமி அவர்களின் பணி ஓய்வு விண்ணப்பத்தைத் திருத்தந்தை 14-ஆம் லியோ ஏற்றுக்கொண்டுள்ளதாக இந்தியாவிற்கான திருத்தூதரக நிர்வாகம் திரு அவைச் சட்ட விதி 401, 1-இன்படி அதிகாரப்பூர்வமாக அறிவித்துள்ளது.  இதனைத் தொடர்ந்து திண்டுக்கல் மறைமாவட்டத்தின் திருத்தூதரக நிர்வாகியாக (apostolic administrator) மதுரை உயர்மறைமாவட்டப் பேராயர் மேதகு முனைவர் அந்தோணிசாமி சவரிமுத்து அவர்களைத் திருத்தந்தை லியோ நியமித்துள்ளார். இது குறித்து ஆயர் தாமஸ் பால்சாமி அவர்கள் வெளியிட்டுள்ள அறிக்கையில், புதிதாகப் பொறுப்பேற்கும் பேராயர் அந்தோணிசாமி அவர்களின் பணி சிறக்கத் தனது வாழ்த்துகளைத் தெரிவிப்பதாகவும், தனது ஆயர் பணியின்போது முழு ஒத்துழைப்பு நல்கிய மறைமாவட்டக் குருக்கள், துறவியர் மற்றும் பொதுநிலையினருக்குத் தனது மனமார்ந்த நன்றியைத் தெரிவித்துக்கொள்வதாகவும் குறிப்பிட்டுள்ளார்.

“எஸ்.சி., எஸ்.டி. மேம்பாட்டுச் செயல்திட்டத்தின் கீழ் ஒதுக்கப்படும் நிதியை எளிய மக்களின் பயன்பாட்டிற்கு முழுமையாக உபயோகிக்கவேண்டும். இதன் செயல்பாடுகளைத் தொடர்ந்து அதிகாரிகள் கண்காணிக்கவேண்டும். குறிப்பாக, இத்திட்டங்களைச் செயல்படுத்தும் துறைகளின் மாதாந்திரச் செலவீன விவரம், பணி முன்னேற்ற அறிக்கை மற்றும் பயனாளிகளின் விவரத்தை wwwadtwdap.tn.gov.in வலைதளத்தில் பதிவு செய்யவேண்டும். மேலும், ஆதிதிராவிடர் மற்றும் பழங்குடியினர் முன்னேற்றத்திற்கு இடையூறாக உள்ள தடைகளைக் கண்டறிந்து, அவற்றைக் களைவதற்கான பரிந்துரைகளைத் தெரிவிக்கவேண்டும். அதற்கான புதிய திட்டங்களை அனைத்துத் துறைச் செயலர்கள் உருவாக்கவேண்டும்.”

மாண்புமிகு. ஜோசப் விஜய், தமிழ்நாடு முதல்வர்

“தமிழ்நாட்டில் டாஸ்மாக் மது வகைகளை ‘ஆன்லைன்’ மூலம் முன்பதிவு செய்வது நடைமுறைக்கு வரவிருப்பதாகவும், அதற்காகத் தனி இணையதளம் தொடங்கப்பட்டிருப்பதாகவும் வெளியாகியுள்ள செய்திகள் அதிர்ச்சி அளிக்கின்றன. இந்த இணையதளத்தின் வாயிலாக தமிழ்நாட்டின் எந்த மூலையிலிருந்தும் மொத்தமுள்ள 4,048 மதுக்கடைகளிலும் என்னென்ன மதுவகைகள் உள்ளன; அவற்றின் விலை எவ்வளவு என்பதைக் கண்டறிந்து முன்பதிவு செய்ய முடியும். இது மது வணிகத்தையும், மதுப்பழக்கத்தையும் அதிகரிக்கச் செய்யும். ஆன்லைனில் மதுவை முன்பதிவு செய்வதை அனுமதிப்பது அரசுக்குப் பெருமை சேர்க்காது. மதுப்பழக்கத்தை அதிகரிக்கவே செய்யும். மது முன்பதிவுத் திட்டத்தை தமிழ்நாடு அரசு கைவிடவேண்டும்.”

திருமிகு. அன்புமணி, பா.ம.க. தலைவர்

“கீழடி அகழாய்வில் 2,400 ஆண்டுகளுக்கு முன்பே தமிழன் எழுதப் படிக்க அறிந்து இருந்ததற்கான ஆதாரங்கள் கிடைத்துள்ளன. குழந்தைகளைத் தினந்தோறும் புத்தகம் வாசிக்க பெற்றோர் ஊக்குவிக்கவேண்டும். புத்தக வாசிப்புடன் மாமல்லபுரம், கீழடி, பொருநை போன்ற அகழாய்வு இடங்களுக்கு அழைத்துச் செல்வதன் மூலம் குழந்தைகள் தமிழர்களின் கலை நுணுக்கங்களை, வாழ்வியலை அறிந்துகொள்ள முடியும். நவீன உலகத்தைக் குழந்தைகள் அறிந்துகொள்ளும் வகையில் நூல்களை, கட்டுரைகளை எழுத்தாளர்கள் படைக்கவேண்டும்.”

திருமிகு. ராஜ்மோகன், பள்ளிக் கல்வித்துறை அமைச்சர்

“மின்வாரிய அதிகாரிகளில் மீட்டர் கணக்கீடு மற்றும் பில்லிங் குளறுபடிகளால் மக்களுக்குத் தவறான கட்டணங்கள் அனுப்பப்பட்டுள்ளன. இதனால் மக்களுக்குப் பாதிப்பு ஏற்பட்டுள்ளது. மின் கணக்கீட்டில் பெரும் குளறுபடிகள் நடந்திருப்பதாக மின்வாரியத் தலைமைப் பொறியாளரே ஒப்புக்கொண்டிருப்பது த.வெ.க. அரசின் நிர்வாகத் தோல்வியைக் காட்டுகிறது. எனவே, மின் கணக்கீட்டுப் பிரச்சினையில் தனிக்கவனம் செலுத்தி, உடனடியாகத் தீர்வுகாண வேண்டும்.

திருமிகு. நயினார் நாகேந்திரன், பா.ச.க. மாநிலத் தலைவர்

“தமிழ்நாடு அரசு விரைவில் தாக்கல் செய்யவுள்ள நிதிநிலை அறிக்கையில் ரூ.1.5 இலட்சம் கோடி வேளாண்மை மற்றும் அவை சார்ந்த தொழில்களுக்கு ஒதுக்கப்படவேண்டும். குறுவைச் சாகுபடி விவசாயிகளுக்கு ஏக்கருக்கு ரூ. 5,000 சிறப்பு மானியம் வழங்கவேண்டும். பயிர்க்கடன் முழுமையாகத் தள்ளுபடி செய்யப்படவேண்டும். நெல் கொள்முதல் விலை குவிண்டாலுக்கு ரூ.3,500, கரும்பு டன்னுக்கு ரூ. 5,000 ஆக உயர்த்தப்படவேண்டும். அனைத்து வேளாண்மைப் பொருள்களையும் அரசே கொள்முதல் செய்ய சிறப்புச் சட்டம் இயற்றவேண்டும். நெல் கொள்முதல் கிடங்குகள் எண்ணிக்கை ஆயிரமாக உயர்த்தப்படவேண்டும்.”

திருமிகு. அன்புமணி, பா.ம.க. தலைவர்

“இன்றைய சமூகத்தில் சாலை விபத்துகள், சைபர் மோசடிகள், போதைப் பழக்கம் ஆகியவை மிகப்பெரிய அச்சுறுத்தலாக உள்ளன. தமிழ்நாட்டில் தினமும் ரூ.13 கோடி முதல் ரூ.15 கோடி வரை சைபர் மோசடிகளால் பொதுமக்கள் பணத்தை இழக்கின்றனர். எனவே, ஆன்லைன் மோசடிகள் குறித்து அனைவரும் எச்சரிக்கையுடன் செயல்படவேண்டும். போதைப்பொருள் மட்டுமின்றி, மதுப்பழக்கமும் போதைதான். போதைப்பழக்கம் ஒருவரின் எதிர்காலத்தை மட்டுமல்ல; குடும்பத்தை, சமூகத்தைச் சீரழிக்கும். எனவே, சாலை விபத்து, சைபர் குற்றம், போதைப்பழக்கம் ஆகிய மூன்று ஆபத்துகளிலிருந்தும் மாணவர்கள் தங்களைப் பாதுகாத்துக் கொண்டு, போதையற்ற சமுதாயத்தை உருவாக்க உறுதுணையாக இருக்கவேண்டும்.”

திருமிகு. ஏ. அமல்ராஜ், சென்னை காவல் ஆணையர்

“நாட்டின் பல்கலைக்கழகங்களும் கல்வி நிலையங்களும் மாணவர்களுக்கு நவீனத்துடன் கலாச்சாரம், பாரம்பரிய உணர்வையும் புகட்டவேண்டும். நவீனத்தையும் பாரம்பரியத்தையும் இணைக்கும்போதுதான் சமநிலையான வளர்ச்சியைப் பேணமுடியும். நாட்டின் மக்கள்தொகையில் 65% இளையோர் உள்ளனர். எனவே, இந்தியாவை ‘இளைஞர்கள் நாடு’ என்றே கூறலாம். வளர்ச்சிப் பயணத்தில் பின்தங்கியவர்களை முன்னேற்றப் பாதையில் இட்டுச் செல்வதும் பிரதான அமைப்பு முறையில் அவர்களை இணைப்பதும் முக்கியமானது. நவீன வளர்ச்சியில் அனைவரும் பங்கேற்க நாம் ஒன்றிணைந்து செயல்படவேண்டும். எதையும் சாதிக்கக்கூடிய, அசைக்க முடியாத துணிச்சல் கொண்ட நமது இளைஞர்களிடம் மக்களின் எதிர்பார்ப்புகள் அதிகமுள்ளன.”

உயர்மிகு. திரௌபதி முர்மு, குடியரசுத் தலைவர்

“தமிழ்நாட்டில் உள்ள அனைத்து மாநகராட்சிகளிலும் தூய்மைப் பணியைத் தனியாரிடம் ஒப்படைக்க, தமிழ்நாடு அரசு முடிவெடுத்துள்ளதாகத் தகவல் வெளியாகியுள்ளது. உள்ளாட்சி அமைப்புகளில் தூய்மைப் பணியில் ஈடுபட்டு வருபவர்கள் பெரும்பாலும் ஒடுக்கப்பட்ட சமூகப் பிரிவைச் சேர்ந்தவர்கள் என்பதைக் கருத்தில் கொள்ளவேண்டும். பணி நிரந்தரம், காலமுறை ஊதியம், ஓய்வூதியம் உள்ளிட்ட எந்தவித உரிமைகளும் பெற முடியாத சூழலில் அவர்களைப் பணியமர்த்துவது சமூகநீதிக் கொள்கைக்கு முரணானதாகும். முந்தைய ஆட்சியாளர்கள் தூய்மைப் பணியைத் தனியார் மயமாக்கக்கூடாது என்ற கோரிக்கையைப் புறக்கணித்தனர். இச்சூழலில் புதிய அரசு தனியார்மயமாக்கலுக்கு முடிவு கட்டவேண்டும். மாநகராட்சிகள் உள்ளிட்ட உள்ளாட்சி அமைப்புகளில் தூய்மைப் பணியைத் தனியார் மயமாக்கும் முயற்சியை உடனடியாக அரசு கைவிடவேண்டும். மேலும், தற்காலிக முறை, ஒப்பந்த முறையில் பணிபுரியும் அனைத்துத் தூய்மைப் பணியாளர்களுக்கும் பணிப் பாதுகாப்பு, பணி நிரந்தரம் உள்ளிட்ட சமூகப் பொருளாதாரப் பாதுகாப்பு வழங்கவேண்டும்.”

உயர்மிகு. மு. வீரபாண்டியன், இந்தியக் கம்யூனிஸ்ட் கட்சியின் மாநிலச் செயலர்

“விவசாயிகள் தேசிய வங்கிகள், கூட்டுறவு வங்கிகள், தனியார் வங்கிகள் என எல்லா இடங்களிலும் கடன் வாங்கி விவசாயம் செய்கிறார்கள். 2021 முதல் 2023 - ஆம் ஆண்டு வரை, 1,968 விவசாயிகள் தமிழகத்தில் தற்கொலை செய்துகொண்டுள்ளனர். ஒரு நாளைக்கு இரு விவசாயிகள் தமிழகத்தில் தற்கொலை செய்கிறார்கள். மகாராஷ்டிர மாநிலத்தில் விவசாயிகள் பெற்ற அனைத்துக் கடன்களும் தள்ளுபடி செய்யப்பட்டுள்ளன. அதேபோல், தமிழ்நாட்டிலும் கூட்டுறவுக் கடன்களை முழுமையாகத் தள்ளுபடி செய்யப்படவேண்டும்.”

திருமதி. சௌமியா அன்புமணி, பா.ம.க. சட்டமன்ற உறுப்பினர்

“திறமையான அதிகாரிகளை நியமித்துவிட்டேன், சிங்கப்பெண் படையை அமைத்துவிட்டேன்’ என்று கூறிய முதல்வரின் காதுகளுக்கு, பாலியல் வன்கொடுமையால் குழந்தைகளை இழந்து ஓலமிடும் பெற்றோரின் அழுகுரல் கேட்கவில்லையா? மக்களின் பாதுகாப்பில் எப்போது கவனம் செலுத்தப்போகிறீர்கள்? குற்றவாளிகள் சிறிதும் அச்சமின்றிக் குற்றச்செயல்களில் ஈடுபடுவதைத் தடுக்க எடுக்கப்பட்ட நடவடிக்கைகள் என்ன? மக்களின் உயிரும், குழந்தைகளின் பாதுகாப்பும் கேள்விக்குறியாகி உள்ள நிலையிலும், எதிர்க்கட்சியாக ஆறு மாதம் எதுவும் கேட்கக்கூடாது என நினைக்கிறீர்களா? அல்லது தி.மு.க.வின் பெரும் போராட்டத்தை எதிர்பார்க்கிறீர்களா?

உயர்மிகு. மு.க. ஸ்டாலின், தி.மு.க. தலைவர்

“த.வெ.க. தனது தேர்தல் வாக்குறுதியில் குறு சிறு விவசாயிகளின் பயிர்க் கடன்களை முழுவதும் தள்ளுபடி செய்யப்படும் என்று அறிவித்தது. ஆட்சிக்கு வந்தபின் ரூ. 50,000 வரை கடன் பெற்ற குறு சிறு விவசாயிகளின் கடன் தொகை முழுமையாகவும் ரூ.50,000-க்கு மேல் பெற்றவர்களுக்கு விகிதாச்சார அடிப்படையில் தள்ளுபடி செய்யப்படும் என்றும் அறிவித்தது. விவசாயிகள் மத்தியில் இதற்கு எதிர்ப்புக் கிளம்பியதையடுத்து ரூ.75,000 வரை குறு, சிறு விவசாயிகள் பயிர்க் கடன் பெற்றிருந்தால் அவை முழுமையாகத் தள்ளுபடி செய்யப்படும்; ரூ.75,000-க்கு மேல் கடன் பெற்றவர்களுக்கு ரூ. 35,000 மட்டுமே தள்ளுபடி செய்யப்படும் என்றும் அறிவிக்கப்பட்டுள்ளது. குறு சிறு விவசாயிகளிடையே பாகுபாட்டை ஏற்படுத்தும் வகையில் உள்ள தற்போதைய அரசின் அறிவிப்பு ஏற்கக்கூடியது அல்ல; எனவே, த.வெ.க. தேர்தல் அறிக்கையில் வாக்குறுதி அளித்தவாறு குறு சிறு விவசாயிகள் கூட்டுறவு வங்கிகளில் பெற்றுள்ள பயிர்க்கடன்களை முற்றிலுமாகத் தள்ளுபடி செய்யவேண்டும்.”

உயர்மிகு. எடப்பாடி பழனிச்சாமி, அ.தி.மு.க. பொதுச்செயலர்

“தமிழ்நாட்டின் தென் மாவட்டங்களில் தொடர்ந்து ஆணவப் படுகொலைகள் அதிகரித்து வருவது வேதனையளிக்கிறது. சாதி ஆணவப் படுகொலைகளைத் தடுப்பதற்கு ஏதுவாக ஒரு சட்டம் இயற்றவேண்டும் என்பது விடுதலைச் சிறுத்தைகள் கட்சியின் நீண்ட நாள் கோரிக்கையாகும். ஆணவப் படுகொலைகளைத் தடுப்பதற்கான சட்டத்தை இயற்றிடவேண்டும் என ஒன்றிய, மாநில அரசுகளுக்கு உச்ச நீதிமன்றம் பலமுறை அறிவுறுத்தியுள்ளது. ஆனால், அந்த வழிகாட்டுதலைப் பின்பற்றி ஒன்றிய அரசும் பெரும்பாலான மாநில அரசுகளும் சட்டம் இயற்றவில்லை என்பது கவலையளிக்கிறது.” 

உயர்மிகு. தொல். திருமாவளவன், விடுதலைச் சிறுத்தை கட்சித் தலைவர்

சென்னை கூட்டுறவு மேலாண்மை நிலையத்தில் 2026-27 ஆம் ஆண்டு முழுநேர கூட்டுறவு மேலாண்மை பட்டயப் படிப்பில் (Diploma in Co-oerative Management) சேர ஆன்லைனில் விண்ணப்பங்கள் வரவேற்கப்படுகின்றன. இதற்கு பிளஸ் 2 தேர்ச்சி பெற்றவர்கள் விண்ணப்பிக்கத் தகுதியுடையவர் ஆவர். குறைந்தபட்சம் 17 வயது பூர்த்தி அடைந்திருக்கவேண்டும். வயது வரம்பு கிடையாது.

ஆன்லைனில் மட்டும்...

தகுதியுடைய நபர்கள் www.tncu.tn.gov.in என்ற இணையதளத்தைப் பயன்படுத்தி ஜூலை 20-ஆம் தேதி வரை விண்ணப்பிக்கலாம். விண்ணப்பக் கட்டணம் ரூ.100. ஆன்லைனில் விண்ணப்பத்தைப் பூர்த்திசெய்து அதற்கான சான்றிதழ்கள் மற்றும் புகைப்படத்தை ஆன்லைனில் பதிவேற்றம் செய்ய வேண்டும். ஆன்லைன் விண்ணப்பங்கள் மட்டுமே ஏற்றுக்கொள்ளப்படும். நேரடியாகவோ தபால் மூலமாகவோ கூட்டுறவு மேலாண்மை நிலையத்திற்கு விண்ணப்பித்திருந்தால், அந்த விண்ணப்பங்கள் எக்காரணம் கொண்டும் ஏற்றுக்கொள்ளப்பட மாட்டாது.

சென்னை கூட்டுறவு மேலாண்மை நிலையம்