தமிழக செய்திகள்

கோவை மறைமாவட்டத்தில் கருமத்தம்பட்டி, புனித செபமாலை அன்னை பசிலிக்கா கோவை மறைமாவட்டத்தின் முதல் தலைமை ஆலயமாக உருவானது. இந்த அழகுமிக்க பசிலிக்கா, கோவை மறைமாவட்டத்திற்குப் பெரும் புகழைச் சேர்த்துக் கொண்டிருக்கின்றது. அன்னை இறைமக்களின் அனைத்து வேண்டுதல்களையும் நிறைவேற்றுகின்றார். பசிலிக்கா நம்மையும் இறைவனையும் மிக நெருக்கமாகச் சந்தித்து உரையாட வைத்து, இறைவனின் அருளாசிரைப் பெற்றுக் கொண்டு நம்மை இறைவனுக்கு ஏற்ற மக்களாக மாற்றுகின்ற உன்னத இடமாக அமைந்திருக்கின்றது.

பசிலிக்காவிற்கு வரும் மக்கள் மீதும் அன்னை ஏராளமான ஆசிரையும் அருளையும் பொழிந்து வருகின்றார். எல்லா சனிக்கிழமைதோறும் இங்கு வருகின்ற மக்களே இதற்குச் சாட்சி. வருகின்ற அக்டோபர் மாதம் நடைபெறுகின்ற பெருவிழாவில் அனைவரும் கலந்துகொண்டு, அன்னையின் அன்பு ஆசிரைப் பெற்றுச்செல்ல அன்புடன் அழைக்கின்றேன். பசிலிக்கா அதிபர், உதவிப் பங்குத்தந்தை, ஆன்மகுரு மற்றும் பங்கு இறைமக்கள், வருகின்ற திருப்பயணிகள் அனைவருக்கும் திருவிழா நல்வாழ்த்துகளை மகிழ்வுடன் தெரிவித்துக் கொள்கின்றேன்.

பேரருள்தந்தை முனைவர் P. மெல்க்கியோர், முதன்மைக் குரு, கோவை மறைமாவட்டம்

அன்புள்ளம் கொண்ட அருள்பணியாளர்களே! அருள்சகோதரிகளே, அருள்சகோதரர்களே, ‘நம் வாழ்வு’ வாசக பெருமக்களே... இறை இயேசுவின் இனிய நாமத்தில் உங்கள் அனைவருக்கும் புனித செபமாலை அன்னையின் பெயரால் வாழ்த்துகளையும் செபங்களையும் உரித்தாக்கிக்கொள்கின்றேன்.

புனித செபமாலை அன்னை தன்னை அண்டி வருவோருக்கு எல்லாம் ஏராளமான நன்மைகளையும் புதுமைகளையும் புரிந்து வாரி வழங்கி வருகின்றார். கவலையோடும் கண்ணீரோடும் செபிப்பவர்கள் அனைவருக்கும் ஆண்டவரின் ஆசிரோடு அன்னை அருள்மழை பொழிகின்றார். இப்பேற்பட்ட அன்னைக்கு ஒவ்வொரு வருடமும் அக்டோபர் முதல் ஞாயிறு அன்று பெருவிழா எடுக்கப்படுகின்றது. இந்த ஆண்டும் கருமத்தம்பட்டி புனித செபமாலை அன்னை பசிலிக்காவின் பெருவிழா சிறப்பாகக் கொண்டாடப்பட இருக்கின்றது. இதில் அனைவரும் பெருந்திரளாகக் கலந்துகொண்டு இறை இயேசுவின் பரிந்துரை வழியாக அன்னையின் ஆசிர் பெற அன்புடனும் பாசத்துடனும் அழைக்கின்றேன். இறையாசிர்!

+ மேதகு முனைவர் லெ. தாமஸ் அக்குவினாஸ், கோவை ஆயர்

‘நம் வாழ்வு’ இதழில் தொடர்ந்து பல உளவியல் கட்டுரைகளைப் படைத்து, வாசகர்கள் உள்ளத்தில் நீங்கா இடம்பிடித்த சேசு சபை அருள்பணியாளர் முனைவர் இம்மானுவேல் ஆரோக்கியம் எனும் எம்மா, கடந்த 07.09.2026 அன்று காலை இறைவனடி சேர்ந்தார் எனும் செய்தி எமக்குப் பேரதிர்ச்சியைத் தந்தது. தந்தை எம்மாவின் இறுதிப் பயணமும் அடக்கத் திருப்பலியும் சென்னை - இலயோலா கல்லூரி வளாகத்தில் உள்ள ஆலயத்தில் 08.09.2006 அன்று நடைபெற்றது. ‘நம் வாழ்வு’ வாசகர்கள், எழுத்தாளர்கள், ‘நம் வாழ்வு’ நிர்வாகம் சார்பாக ‘நம் வாழ்வு’ முதன்மை ஆசிரியரும் பணியாளர்களும் அடக்கத் திருப்பலியில் கலந்துகொண்டனர்.

இவ்வேளையில் தந்தை எம்மாவின் குடும்பத்தாருக்கும் குறிப்பாக, அவருடைய உடன் பிறந்த சகோதரர் தந்தை எம்.ஏ. ஜோ அவர்களுக்கும் ‘நம் வாழ்வு’ குடும்பம் தனது ஆழ்ந்த இரங்கலையும் செபங்களையும் தெரிவித்துக்கொள்கிறது. தந்தை எம்மாவின் ஆன்மா இறைவனில் இளைப்பாற தொடர்ந்து செபிப்போம்.

உளவியல் ஆற்றுப்படுத்துதல் துறையில், அமெரிக்காவில் முனைவர் பட்டம் பெற்ற தந்தை எம்மா, திருச்சி - தூய வளனார் கல்லூரியில் உளவியல் துறையை நிறுவி, அதன் முதல் துறைத் தலைவராகவும், தொடர்ந்து இறுதி வரை அங்கு உளவியல் பேராசிரியராகவும் பணியாற்றியவர் என்பது குறிப்பிடத்தக்கது. 

முதன்மை ஆசிரியர்

‘அவருக்குச் செவிசாய்ப்போம்’ (Let us listen to Him)  செயலி ஆன்மிக வளங்கள், ஒலிவடிவத் திருவிவிலியம், திருப்புகழ்மாலை, திருவழிபாட்டு உரைகள் மற்றும் திரு அவைச் சட்டப் போதனைகள் என எல்லாவற்றையும் ஒரே இடத்தில் உங்களுக்காகக் கொண்டு வருகிறது. உங்களின் அன்றாட ஆன்மிக வாழ்க்கையை வளப்படுத்த ஒரே செயலி மூலம் எளிதாக அணுகவும் இது உருவாக்கப்பட்டுள்ளது.

தினமும் திருவிவிலியம் வாசிக்க நேரமில்லை என்று கூறலாம், ஆனால், இறைவார்த்தையைக் கேட்க நேரமில்லை என்று யாருமே கூறமுடியாது. பயணம் செய்யும்போது, சமையல் செய்யும்போது அல்லது வேலை பார்த்துக்கொண்டே மிக எளிதாகக் கேட்கலாம். அதேபோல், ‘திருப்புகழ் மாலை’ (Liturgy of the Hours) மற்றும் ‘புனிதர்களின் ஆன்மிக வாசிப்புகள்’ (Spiritual Readings by Saints) ஆகியவை ஆயர்கள், குருக்கள், துறவியர் மற்றும் இறைமக்கள் எல்லாரும் திரு அவையின் அதிகாரப்பூர்வமான செபத்தை நாள்தோறும் தவறவிடாமல் செபிக்கப் பெரிதும் உதவுகின்றன.

இன்றே இந்தச் செயலியை (App) பதிவிறக்கம் (Download) செய்து (https://play.google.com/store/apps/details?id=org.bishopsalem.bishop_app), இந்த ஆன்மிக வளங்கள் அனைத்தையும் உங்கள் விரல் நுனியில் வைத்துக்கொள்ளுங்கள். இந்தச் செயலி பற்றிய தகவலை உங்கள் குடும்பத்தினர், நண்பர்கள் மற்றும் பங்கு மக்களோடு பகிர்ந்துகொள்ளுங்கள்!

அன்பார்ந்த நண்பர் அருள்தந்தை இராஜசேகரன் அவர்களே,

மிகுந்த ஆர்வத்துடன் ‘நம் வாழ்வு’ வெளியீட்டுச் சங்கம் தொடங்கிய ‘நம் வாழ்வு’ இணைய தினசரி இதழின் முதலாவது ஆண்டு நிறைவை முன்னிட்டு அன்பான வாழ்த்துகள்! ஒரு வருடமாக தமிழ் கத்தோலிக்கச் சமூகத்திற்கு உண்மை, நம்பிக்கை மற்றும் திரு அவையின் குரலை உண்மையுடன் எடுத்துச் சென்ற உங்கள் அர்ப்பணிப்பு மிகவும் பாராட்டத்தக்கது. இது வெறும் ஒரு மைல்கல் மட்டுமல்ல; செய்தி, நம்பிக்கை, சத்தியம் என்ற மூன்று அடிப்படைகளின் மூலம் தமிழ் கத்தோலிக்க நம்பிக்கையாளர்களை இணைத்த ஒரு பணியின் தொடக்கமும் ஆகும்.

அன்னை மரியாவும், தூய ஆவியானவரும் உங்கள் இந்தத் திருப்பணியைத் தொடர்ந்து வழிநடத்தி, வளர்ச்சியடைய அருள்பாலிக்கட்டும். இன்னும் பல ஆண்டுகள் பயனுள்ள சேவையாற்ற இறைவன் உங்கள் குழுவினருக்கு ஆசி வழங்குவாராக! ‘நம் வாழ்வு’ தலைவர் ஆயர் லூர்து ஆனந்தம் அவர்களுக்கும், ‘நம் வாழ்வு’ வாசகர்களுக்கும், நலம் விரும்பிகளுக்கும் என் நெஞ்சார்ந்த பாராட்டுகளும், வாழ்த்துகளும் உரித்தாகுக.

முனைவர் ரபி பெர்னார்ட், நாடாளுமன்ற மாநிலங்களவை மேனாள் உறுப்பினர்

தமிழ்நாடு சிறுபான்மையினர் ஆணையத்தின் புதிய தலைவராக பிரபல ஊடகவியலாளரும், தமிழக வெற்றிக் கழகத்தின் செய்தித் தொடர்பாளருமான பெலிக்ஸ் ஜெரால்ட் நியமிக்கப்பட்டுள்ளார்.

கத்தோலிக்கரான திரு. பெலிக்ஸ், சென்னை இலயோலோ கல்லூரியில் பயின்றவர். தமிழ்நாட்டில் பலராலும் அறியப்பட்ட ஊடகவியலாளர். ‘சன்’, ‘சத்தியம்’ தொலைக்காட்சி சேனல்களில் செய்தியாளராகப் பணியாற்றியுள்ளார். மேலும், ’ரெட் பிக்ஸ்’ என்ற யூடியூப் சேனலை நடத்தி வந்தார். கடந்த ஆண்டு செப்டம்பர் மாதம் கரூரில் நடந்த துயர நிகழ்வு குறித்து கருத்துத் தெரிவித்த வழக்கில் கைது செய்யப்பட்டது குறிப்பிடத்தக்கது. ஊடகத் துறையிலிருந்து விலகி த.வெ.க. கட்சியில் இணைந்த இவர், அக்கட்சியின் செய்தித் தொடர்பாளராகத் தொலைக்காட்சி விவாத நிகழ்ச்சிகளில் பங்கேற்று, கட்சியின் கருத்துகளை முன்வைத்து வந்தார்.

த.வெ.க. தலைவர் விஜய்யின் முக்கிய நிர்வாகிகளில் ஒருவராகச் செயல்பட்டு வரும் நிலையில், தற்போது சிறுபான்மையினர் ஆணையத் தலைவராகப் பொறுப்பேற்றுள்ளார். சமூக நீதி மற்றும் சிறுபான்மையினர் உரிமைகள் தொடர்பான பணிகளில் நீண்ட அனுபவம் கொண்ட இவரது நியமனம், சிறுபான்மையினரின் பிரச்சினைகளுக்கு ஒரு புதிய தீர்வைக் கொண்டு வரும் என்று எதிர்பார்க்கிறோம். சிறுபான்மை சமூக மக்களின் நலன்களைப் பாதுகாக்கவும், அவர்களுக்கான நலத்திட்டங்களைச் சிறப்பாகச் செயல்படுத்தவும் முழு கவனத்துடன் உழைப்பதாக உறுதி அளித்துள்ள இவருக்குப் பல்வேறு தரப்பினரும் வாழ்த்துகளைத் தெரிவித்து வருகின்றனர்.