உலக செய்திகள்

இத்தாலியின் கப்புச்சின் பூவர் கிளார் (Capuchin Poor Clare) அருள்சகோதரிகள் அமைப்பின் பிரதிநிதிகளைத் திருத்தந்தை லியோ சந்தித்தார். அப்போது “அழைத்தல்கள் என்பவை திட்டமிட்ட உத்திகளாலோ, பிரச்சாரங்களாலோ உருவாவதில்லை; மாறாக, செபம், நற்செய்தி வாழ்வு, அமைதி மற்றும் பலவீனங்களை ஏற்றுக்கொள்ளும் சகோதரத்துவச் சூழலிலிருந்தே பிறக்கின்றன. துறவற அழைப்பு குறைவது சுயபரிசோதனைக்கும், தங்களது வாழ்க்கை முறையைப் புதுப்பித்து இறைநெருக்கத்தை வளர்ப்பதற்குமான வாய்ப்பாக அமையவேண்டும். அருள்சகோதரிகள் தங்கள் வாழ்க்கையை எளிமையாகவும், உலகப் பற்றுகளிலிருந்து விடுபட்டும் வாழவேண்டும்” என்றார்.

அணுசக்தித் தொழில்நுட்பம் அழிவுக்குப் பயன்படாமல், மனிதகுலத்தின் வளர்ச்சிக்கும் அமைதிக்கும் மட்டுமே பயன்படுத்தப்படவேண்டும் என்று பேராயர் பால் ரிச்சர்ட் காலகர் வலியுறுத்தியுள்ளார். ஆஸ்திரியாவின் வியன்னா நகரில் நடைபெறும் உலகளாவிய அணுசக்தி முகமையின் (IAEA) 70-வது பொது மாநாட்டில், வத்திக்கான் வெளியுறவுச் செயலர் பேராயர் பால் ரிச்சர்ட் காலகர் கலந்துகொண்டு உரையாற்றினார். திருத்தந்தை லியோவின் நல்வாழ்த்துகளைப் பகிர்ந்துகொண்ட அவர், அணுசக்தியின் பயன்கள் அனைத்து நாடுகளுக்கும் சமமாகக் கிடைக்கவேண்டும் என்றும், அதேவேளையில் அணு ஆயுதப் பெருக்கத்தை நாடுகள் முற்றிலும் தவிர்க்கவேண்டும் என்றும் சுட்டிக்காட்டினார். செர்னோபில் அணு உலை விபத்தின் 40-வது ஆண்டினை நினைவுகூர்ந்த அவர், போர்க் காலங்களிலும் அணு சக்தி மையங்கள் மீதான தாக்குதல்கள் தவிர்க்கப்படவேண்டும் என எச்சரித்தார். மேலும், அணு ஆயுதங்களற்ற உலகை உருவாக்க உலக நாடுகள் முன்வரவேண்டும் என்றும் அவர் அழைப்பு விடுத்துள்ளார்.

இணையவழிச் செல்வாக்கை உண்மையான கிறித்தவச் சாட்சியமாக மாற்றும் நோக்கில், முதன்மை ஆசியக் கத்தோலிக்க டிஜிட்டல் மறைபரப்பாளர்கள் மாநாடு பிலிப்பைன்சின் மணிலா நகரில் நிறைவடைந்தது. செப்டம்பர் 10 முதல் 13 வரை ‘ரேடியோ வெரித்தாஸ் ஆசியா’ வளாகத்தில் நடைபெற்ற இம்மாநாட்டில், ஆசியா முழுவதிலுமிருந்து 100-க்கும் மேற்பட்ட கத்தோலிக்க இணைய ஊடகவியலாளர்கள் மற்றும் படைப்பாளர்கள் பங்கேற்றனர். ஆசிய ஆயர் பேரவைகளின் கூட்டமைப்பு (FABC-OSC) மற்றும் வத்திக்கான் தகவல் தொடர்பு ஆணையமும் இணைந்து இந்நிகழ்வை ஒருங்கிணைத்தன. “டிஜிட்டல் படைப்புகளில் இயேசுவின் உண்மையான சாட்சிகளாக வளரவேண்டும்” என்று திருத்தந்தை  லியோ தனது வாழ்த்துச் செய்தியில் ஊக்கப்படுத்தியதைத் தொடர்ந்து, திருப்பலியில் மறையுரையாற்றிய பேராயர் கில்பர்ட் கார்செரா, மக்களுடன் இணைந்து பயணித்து இயேசுவின் அன்பை உணர்த்துவதே உண்மையான ஊடகப்பணி என்றார்.

துர்க்மெனிஸ்தானில் சுமார் 30 ஆண்டுகள் கத்தோலிக்க மறைப்பணியாளராகப் பணியாற்றிய தந்தை ஆண்ட்ரசே மாதேஜ் OMI, மரியாதை மற்றும் அமைதியின் அடிப்படையில் அனைத்து மக்களுடனும் நல்லுறவை வளர்ப்பதே தனது முக்கிய இலக்காக இருந்தது என்று தெரிவித்துள்ளார். 1990-களின் இறுதியில் அவர் அங்குச் சென்றபோது கத்தோலிக்கத் திரு அவைக்கான பெரிய கட்டமைப்புகள் எதுவுமில்லை. இசுலாமியர் பெரும்பான்மையாக வாழும் சமூகத்தில், எளிய முறையில் மக்களைச் சந்தித்து, ஒன்றாகத் தேநீர் அருந்தி, நற்செய்தியைப் பகிர்ந்து சமூகத்தை உருவாக்கத் தொடங்கினார். 2000-ஆம் ஆண்டு உயிர்ப்புப் பெருவிழாவின் போது முதல் திருமுழுக்கு வழிபாடுகள் நடைபெற்றன. கிறித்தவ-இசுலாமிய மதத்தர்க்கங்களில் ஈடுபடாமல், அவர்களின் திருமணங்கள் மற்றும் இறுதிச்சடங்குகளில் கலந்துகொண்டு, அன்றாட வாழ்வில் அன்பைப் பகிர்வதையே அவர் தனது பணியாகக் கொண்டிருந்தார். “கிறிஸ்து வருகை தரும் இடத்தில், அவருடன் அன்பும் வருகிறது” என்று கூறும் அவர், பெரிய பிரகடனங்களை விட எளிய மனிதச் சந்திப்புகளே அமைதியை உருவாக்குகின்றன என்றார். தனது 30 ஆண்டுகால அனுபவங்களை அடிப்படையாகக் கொண்டு, கிறித்தவரும் இசுலாமியரும் வாசிக்கும் வகையில் ‘The Lamb’ என்ற நூலை எழுதவிருப்பதாகவும் தந்தை மாதேஜ் குறிப்பிட்டுள்ளார்.

மாஸ்கோவிற்கான தனது பயணத்தை நிறைவு செய்து உரோமை திரும்பிய வத்திக்கானின் வெளியுறவுச் செயலர் பேராயர் பால் ரிச்சர்ட் காலகர், “அமைதி மட்டுமே அனைத்து மோதல்களுக்கும் ஒரே தீர்வாகும்” என்று தெரிவித்துள்ளார். இரஷ்ய வெளியுறவுத்துறை அமைச்சர் செர்ஜி லாவ்ரோவ் மற்றும் அதிகாரிகளுடன் நடைபெற்ற ஆலோசனைகளுக்குப் பிறகு உரையாற்றிய அவர், உக்ரைன்-இரஷ்யப் போருக்கு நாடுகளுக்கிடையேயான பேச்சுவார்த்தைகள் மூலமே முற்றுப்புள்ளி வைக்க முடியும் என்று வலியுறுத்தியுள்ளார். வத்திக்கான் நேரடியாகத் தொழில்நுட்பத் தீர்வுகளை வழங்காவிட்டாலும், இரு நாடுகளிடையே இணக்கமான பேச்சுவார்த்தைக்கான சூழலை உருவாக்கத் தயாராக இருப்பதாக அவர் குறிப்பிடுள்ளார். மேலும், போரினால் பாதிக்கப்பட்டுள்ள மக்களுக்குத் தேவையான நிவாரணங்களை வழங்கும் ‘கத்தோலிக்கத் தொண்டுப் பணிகளை’ பலப்படுத்துவதே வத்திக்கானின் முதன்மை இலக்கு என்று குறிப்பிட்ட அவர், இரஷ்யாவிலுள்ள கத்தோலிக்கச் சமூகங்களைச் சந்தித்து, “சமூகத்தில் அமைதியை உருவாக்கும் தூதுவர்களாக நீங்கள் செயல்பட்டு வருகிறீர்கள்” எனப் பாராட்டியுள்ளார். அவ்வாறே, உலகின் பல்வேறு பகுதிகளில் வாழும் கிறித்தவர்களின் பாதுகாப்பை உறுதி செய்வது குறித்தும் கலந்துரையாடியதாகத் தெரிவித்துள்ளார்.

செப்டம்பர் 1-ஆம் நாள் ‘படைப்பைப் பராமரிப்பதற்கான 11-வது உலக இறைவேண்டல் நாளை’ முன்னிட்டு, உலகெங்கிலும் உள்ள கிறித்தவர்கள் ஒன்றிணைந்து சுற்றுச்சூழல் பாதுகாப்பு மற்றும் நீர் வளத்தைப் பாதுகாப்பதற்காக, சிறப்பு இறைவேண்டல் செய்யவேண்டும் என்று திருத்தந்தை லியோ அறிவித்துள்ளார். ‘திருத்தந்தையின் உலகளாவிய இறைவேண்டல் வலைப்பின்னல்’ வெளியிட்ட காணொளிச் செய்தியில் உரையாற்றிய அவர், “தண்ணீர் எல்லைகளற்ற உரிமையாகும்; அது அனைவருக்கும் உரிய பொதுவான கொடை” என்று வலியுறுத்தியுள்ளார். நீரை வணிகப் பொருளாக மாற்றுவதற்கும், விரையம் செய்வதற்கும் கண்டனம் தெரிவித்த திருத்தந்தை, சுத்தமான குடிநீருக்காக மைல் கணக்கில் நடந்து செல்லும் ஏழை எளிய மக்களின் துயரங்களைச் சுட்டிக்காட்டியுள்ளார். தண்ணீரை வீணாக்காமல் எளிமையான வாழ்முறையைக் கடைப்பிடிக்குமாறு கேட்டுக்கொண்ட அவர், ஏற்றத்தாழ்வுகளின்றி அனைவரும் அச்சமின்றித் தண்ணீரைக் குடிக்கும் உரிமையைப் பாதுகாக்க அழைப்பு விடுத்துள்ளார். மேலும், குழாய் கசிவுகளைச் சரிசெய்தல், நீரைக் குறைவாகப் பயன்படுத்துதல் மற்றும் நீர்நிலைகளை மாசடையாமல் தடுத்தல் போன்ற தனிநபர் பொறுப்புகளையும் முன்னெடுக்குமாறு திருத்தந்தை லியோ கேட்டுக்கொண்டுள்ளார். அக்டோபர் 4-இல் வரும் புனித பிரான்சிஸ் அசிசியாரின் திருவிழா வரை தொடரும் இக்காலகட்டத்தில், காலநிலை மாற்றத்தின் பேரழிவுகளிலிருந்து நமது பொதுவான இல்லமாகிய பூமியைப் பாதுகாக்கத் திரு அவை அழைப்பு விடுத்துள்ளது.