வத்திக்கான் செய்திகள்

“மரண தண்டனை மனித கண்ணியத்திற்கு எதிரானது”- திருத்தந்தை லியோ

மரண தண்டனை என்பது மனிதனின் புனிதத்தன்மைக்கும் கண்ணியத்திற்கும் எதிரான தாக்குதல் என்பதால், அதை ஏற்றுக்கொள்ள முடியாது என்று திருத்தந்தை லியோ மீண்டும் வலியுறுத்தியுள்ளார். உலகளாவிய மரண தண்டனை எதிர்ப்பு நாளை முன்னிட்டு தனது ‘X\'  பக்கத்தில் வெளியிட்டுள்ள பதிவில் இதனைத் தெரிவித்துள்ளார். மரண தண்டனையை நாடாமலேயே சமூகப் பாதுகாப்பையும் நீதியின் தேவைகளையும் பூர்த்தி செய்ய முடியும் என்று குறிப்பிட்ட திருத்தந்தை, குற்றவாளிகள் திருந்தி வாழ்வதற்கான வாய்ப்பை வழங்க வேண்டும் என்றார். அமெரிக்காவில் ஃபார்ட் ஹூட் பகுதியில் 13 பேரைக் கொன்ற குற்றவாளி நிடால் ஹசனுக்கு, டிசம்பர் 3, 2026 அன்று துப்பாக்கியால் சுட்டு மரண தண்டனை நிறைவேற்றப்படவுள்ள நிலையில், திருத்தந்தையின் இந்த அறிக்கை வெளியாகியுள்ளது. இந்த மரண தண்டனைத் திட்டத்திற்கு வத்திக்கானின் வெளியுறவுச் செயலர் கர்தினால் பியத்ரோ பரோலின் மற்றும் அமெரிக்கக் கத்தோலிக்க ஆயர் பேரவையும் கடும் எதிர்ப்பு தெரிவித்துள்ளன. மரணத்தை ஒரு பொதுக் காட்சியாக மாற்றுவது முற்றிலும் ஏற்றுக்கொள்ள முடியாதது என்றும், இது மனித கண்ணியத்திற்கு எதிரானது என்றும் கர்தினால் பியத்ரோ கண்டனம் தெரிவித்துள்ளார்.

இளைஞர்களின் அன்பு, மனித உறவுகள் மற்றும் கத்தோலிக்க நம்பிக்கையின் ஒளியில் அமையும் திருமணம் குறித்து வழிகாட்டும்  ‘YOUCAT: Love Forever’ நூலின் புதிய பதிப்பிற்குத் திருத்தந்தை லியோ முன்னுரை எழுதியுள்ளார். அதில் இளைஞர்களுக்கு அழைப்பு விடுத்துள்ள திருத்தந்தை, “மனித இதயம் ஆழமான, தியாகமயமான, நிலையான அன்பிற்காக ஏங்குகிறது; ஏனெனில், மனிதன் அன்பிற்காகவே படைக்கப்பட்டுள்ளான். கத்தோலிக்க  நம்பிக்கையில் கணவன்-மனைவி இடையே நிலவும் தூய அன்பு வெறும் தற்காலிக உணர்ச்சியல்ல; மாறாக, அது ஒருவர் மற்றவருக்கு வழங்கும் வாழ்நாள் அர்ப்பணிப்பு” என்று குறிப்பிட்டுள்ளார்.

“சிலுவையில் இயேசு வெளிப்படுத்திய  அன்பே உண்மையான அன்பின் மிக அழகிய வடிவம். சுயநலமற்ற அந்தத் தெய்வீக அன்பைப் பிரதிபலிப்பதே உண்மையான கிறித்தவத் திருமணம். இளைஞர்கள் இத்தகைய ஆழமான அன்பைக் கண்டு அஞ்சாமல், இறைவனின் அருளோடும் நம்பிக்கையோடும் வாழ்நாள் முழுமைக்குமான வாக்குறுதியை ஏற்று, அன்பின் வழியில் நடக்கத் துணிச்சலுடன் முன்வரவேண்டும்” என்று திருத்தந்தை லியோ வலியுறுத்தியுள்ளார்.

திரு அவைக்கு உதவும் அமைப்பு (ACN) ஒருங்கிணைக்கும் ‘ஒரு மில்லியன் குழந்தைகள் செபிக்கும் செபமாலை’ இயக்கத்தின் தொடக்கமாக அக்டோபர் 1 அன்று உரோமையில் பல்வேறு பங்குகளிலிருந்தும் பள்ளிகளிலிருந்தும் வருகை தரும் 700 முதல் 1,000 வரையிலான குழந்தைகள், திருத்தந்தை  லியோவுடன் இணைந்து வத்திக்கான் தோட்டத்தில் செபமாலை செபிக்கவுள்ளனர். லூர்து மாதா கெபியில் நடைபெறும் இந்நிகழ்வில், உலகம் முழுவதிலும் உள்ள குடும்பங்கள் மற்றும் கிறித்தவச் சமூகங்களுடன் இணைந்து குழந்தைகள் அமைதிக்காக மன்றாடுவர். இருபது ஆண்டுகளுக்கும் மேலாக நடைபெற்று வரும் இத்திட்டம், வரலாற்றிலேயே முதன் முறையாக அக்டோபர் 1 முதல் அக்டோபர் 7 செபமாலை மாதா திருவிழாவுடன் இந்நிகழ்வு நிறைவடைகிறது.

“ஒரு மில்லியன் குழந்தைகள் செபமாலை செபிக்கும்போது உலகமே மாறும்” என்ற புனித பியோவின் கூற்றை நாம் நினைவுகூர்வோம்.

“செயற்கை நுண்ணறிவின் வளர்ச்சியானது ஞானம் மற்றும் அன்பினால் வழிநடத்தப்பட வேண்டும். தொழில்நுட்ப வளர்ச்சி ஒவ்வொரு மனிதனின் கண்ணியத்திற்கும் உலக அமைதிக்கும் பணியாற்றவேண்டும். மோதல்களும் பிரிவினைகளும் நிறைந்த இன்றைய உலகில், தொழில்நுட்பப் புதுமைகள் பொதுநலனுக்காகப் பயன்படுவதை உறுதிசெய்ய வேண்டியது அவசியம்” என்ற திருத்தந்தை, ‘மகத்தான மானுடம்’ (Magnifica humanitas)  என்ற தனது சுற்றுமடலை மேற்கோள்காட்டினார். “டிஜிட்டல் யுகத்தில் நற்செய்தியின்படி வாழ்வதற்கு இறைவனின் இரக்கமுள்ள திட்டமே வழிகாட்டியாக அமைகிறது. மக்களிடையே உரையாடல், நல்லிணக்கம் மற்றும் சகோதரத்துவத்தை வளர்க்க செயற்கை நுண்ணறிவை எவ்வாறு பயன்படுத்தலாம் என்பதை ஆராய வேண்டும். தொழில்நுட்பத்தின் பலன்கள் அமைதிக்கான கருவிகளாக மாறவேண்டும்” என்று கேட்டுக் கொண்டுள்ளார்.

வத்திக்கான் திருத்தூது ஆவணக் காப்பகம் (Vatican Apostolic Archive) மற்றும் வத்திக்கான் திருத்தூது நூலகத்தின் (Vatican Apostolic Library) சேமிப்பு இடங்களை விரிவுபடுத்தவும், இதற்காகப் புதிய கட்டிடம் ஒன்றை உருவாக்கவும் திருத்தந்தை லியோ உத்தரவிட்டுள்ளார். வத்திக்கானின் வரலாற்றுச் சிறப்புமிக்க நூல்கள் மற்றும் ஆவணங்களின் எண்ணிக்கை கடந்த சில ஆண்டுகளாகப் பெருமளவில் அதிகரித்துள்ளதால், தற்போதுள்ள இடவசதி போதுமானதாக இல்லை எனத் திருத்தந்தை தனது கையெழுத்திட்ட அதிகாரப்பூர்வ ஆவணத்தில் சுட்டிக்காட்டியுள்ளார். இதற்காக வத்திக்கான் நகர எல்லைக்குள்ளேயே அமைந்துள்ள ‘ஃபோண்டானா டெல் ஆட்டோபார்க்கோ’ (Fontana dell’Autoparco) மற்றும் அதன் சுற்றியுள்ள பகுதிகள் இத்துறைகளுக்கு ஒதுக்கப்பட்டுள்ளது. மேலும், நவீன கட்டிடக் கலை மற்றும் தொழில்நுட்ப வசதிகளுடன் கட்டப்படவுள்ள புதிய கட்டிடத்தின் நிதியமைப்பிற்காக ‘வத்திக்கான் அறக்கட்டளை’ (Vatican Instrumental Foundation) ஒன்றும் உருவாக்கப்படும் என்று தெரிவிக்கப்பட்டுள்ளது.

அண்மையில் ‘தூய  நற்கருணையின் ஆராதனைச் சகோதரிகள்’ (The Perpetual Adorers of the Most Blessed Sacrament, known as the Sacramentine Nuns) அமைப்பின் பிரதிநிதிகளை வத்திக்கானில் சந்தித்த திருத்தந்தை லியோ, “திரு அவையில் ஒற்றுமையைக் கட்டியெழுப்ப அன்பும் இறைநம்பிக்கையும் நிறைந்த ‘நற்கருணை ஆன்மிகம்’ மிகவும் அவசியமானது” என்று வலியுறுத்தியுள்ளார். மேலும், “அப்பத்தின் வடிவில் தம்மையே நமக்களித்த இறைவனைத் தொடர்ந்து ஆராதிக்கும் அவர்களின் பணி, மனித இதயங்களில் இறைவனைக் காண்பதற்கான ஏக்கத்தை நிறைவு செய்கிறது”என்றும் புகழாரம் சூட்டினார். புனித அசிசியாரின் போதனைகளைக் குறிப்பிட்டுப் பேசிய அவர், நற்கருணையும் திராட்சை இரசமும் நம்பிக்கையாளர்களின் ஒற்றுமையின் அடையாளம் என்றார். செபம், உழைப்பு மற்றும் சகோதரத்துவப் பகிர்வு ஆகியவற்றின் மூலம் திரு அவையில் அன்பையும் ஒற்றுமையையும் வழங்கும் இணைப்பாளர்களாக இக்கன்னியர் திகழவேண்டும் என்று கேட்டுக்கொண்ட திருத்தந்தை லியோ, நற்செய்தியின் போதனைகளுக்கு உண்மையோடு வாழ்ந்து புனித பாதையில் தொடர அவர்களுக்கு அழைப்பு விடுத்துள்ளார்.