தலையங்கம்

உலகளாவிய நெறிமுறைகளும், அவற்றைத் தரும் சட்ட நிறுவனங்களும் புவிசார் அரசியல் சூழ்ச்சிகளால் கடுமையான அச்சுறுத்தலுக்கு உள்ளாகியிருக்கும் இக்காலகட்டத்தில், நார்வே நோபல் குழு அறிவித்துள்ள 2026-ஆம் ஆண்டிற்கான நோபல் அமைதிப் பரிசு வரலாற்றுச் சிறப்புமிக்க ஒரு விழிப்புணர்வை ஏற்படுத்தியுள்ளது.

தென் ஆப்பிரிக்காவின் புகழ்பெற்ற 85 வயதான தமிழ் வழியிலான சட்ட வல்லுநர் நவநீதம் ‘நவி’ பிள்ளைக்கு வழங்கப்பட்டுள்ள இந்த உயரிய அங்கீகாரம், தனிநபர் ஒருவரின் அர்ப்பணிப்பிற்குக் கிடைத்த வெற்றி மட்டுமல்ல; மாறாக, உலகளாவிய மனித உரிமைகள், பன்னாட்டுச் சட்டம் மற்றும் நீதியை மையமாகக் கொண்ட ஒழுங்கமைப்பிற்குக் கிடைத்த மகத்தான வெற்றியாகும்.

டர்பன் நகரில் இனவெறி (அபார்தீட்) ஆட்சியின் கொடூரமான காலகட்டத்தில் பிறந்த நவி பிள்ளை, தொடக்கம் முதலே அடக்குமுறைகளுக்கு அஞ்சாத ஒரு தீரமிக்க போராளியாகவே உருவெடுத்தார். இவர் நீதியின் களத்தில் உருவான புயல். 1967-ஆம் ஆண்டில் நாட்டால் மாகாணத்தில் வழக்கறிஞர் அலுவலகம் தொடங்கிய முதல் பெண் என்ற பெருமையைப் பெற்றவர்.

நெல்சன் மண்டேலா போன்ற சுதந்திரப் போராட்ட வீரர்களுக்காகவும், அரசியல் ரீதியாகத் தடுத்து வைக்கப்பட்டவர்களுக்காகவும் நீதிமன்றங்களில் நெஞ்சுரத்தோடு வாதாடினார். கறுப்பின மக்களுக்கு உரிமைகள் மறுக்கப்பட்ட ஒரு சமூக அமைப்பில், தன் சட்ட அறிவையும் நெறிமுறை நேர்மையையும் மட்டுமே ஆயுதமாகக் கொண்டு களமிறங்கினார். பின்னாளில் தென் ஆப்பிரிக்க உயர் நீதிமன்றத்தின் முதல் கறுப்பினப் பெண் நீதிபதியாக நியமிக்கப்பட்டது, நிறுவனமயமாக்கப்பட்ட ஒடுக்கு முறைகளுக்கு இவர் அளித்த தக்க பதிலடியாகும்.

ருவாண்டாவிற்கான பன்னாட்டுக் குற்றவியல் தீர்ப்பாயத்தின் தலைவராக நவி பிள்ளை பணியாற்றிய காலம், உலகச் சட்ட வரலாற்றில் ஒரு பொற்காலமாகும். போர்க்காலங்களில் பெண்களுக்கு எதிராக நிகழ்த்தப்படும் பாலியல் வன்முறைகளையும் வன்கொடுமைகளையும் வெறும் உபாதைகளாகப் பார்க்காமல், அது ‘இனப்படுகொலையின் ஒரு கூறு’(Act of Genocide) என்று இவர் வழங்கிய வரலாற்றுச் சிறப்புமிக்க தீர்ப்பு,  உலகக் குற்றவியல் சட்டத்தின் திசையையே நிரந்தரமாக மாற்றியமைத்தது.

ஐ.நா. மனித உரிமைகளுக்கான உயர் ஆணையர், உலகக் குற்றவியல் நீதிமன்றம் (ICC) மற்றும் உலக நீதிமன்றம் (ICJ) ஆகியவற்றில் இவர் ஆற்றிய பணிகள் அனைத்தும் ஒரே கொள்கையைத் தெளிவாகப் பறைசாற்றின. அதாவது, “நாடுகளின் பரப்பளவு, பொருளாதாரம் அல்லது இராணுவ பலம் எதுவாக இருப்பினும், பன்னாட்டுச் சட்டம் அனைவருக்கும் சமமாகப் பொருந்தவேண்டும்” என்றே முழங்கிவந்தார்.

எதிர்பார்க்கப்பட்டபடியே, இந்த உயரிய அங்கீகாரம் சில அரசியல் அதிகார மையங்களிடமிருந்தும் குறிப்பாக, இஸ்ரேலிய அரசிடமிருந்தும் கடுமையான எதிர்ப்பையும் விமர்சனங்களையும் தூண்டியுள்ளது. ஆக்கிரமிக்கப்பட்ட பாலஸ்தீனப் பகுதிகள் மற்றும் காசாவில் மனித உரிமை மீறல்கள் குறித்து விசாரணை நடத்திய ஐ.நா. ஆணையத்தின் தலைவராக நவி பிள்ளை பணியாற்றியதைச் சுட்டிக்காட்டி, இந்தப் பரிசை ‘அரசியல் ஆயுதமாக்கல்’ என்று அவர்கள் குற்றம்சாட்டுகின்றனர்.

ஆனால், இத்தகைய குற்றச்சாட்டுகள் நவி பிள்ளையின் பத்தாண்டுகால நடுநிலையான சாதனைகளுக்கு முன்னால் அடியோடு சரிந்து விழுகின்றன. ருவாண்டா முதல் மியான்மர் வரை மனிதகுலத்திற்கு எதிரான குற்றங்களில் ஈடுபட்ட எவரையும் இவர் தப்பவிட்டதில்லை. 2009, மே மாதத்தில் இலங்கையில் இடம்பெற்ற இறுதிக்கட்டப் போரின்போது, அரசு மற்றும் போராளிகள் என இருதரப்பினராலும் இழைக்கப்பட்ட மனித உரிமை மீறல்களை உலக மன்றத்தின் கவனத்திற்கு அஞ்சாமல் கொண்டு சென்றவர் நவி பிள்ளை என்பதும் இங்கே குறிப்பிடத்தக்கது.

தனிப்பட்ட காழ்ப்புணர்ச்சிகளுக்கு அப்பாற்பட்டு, ஜெனிவா உடன்படிக்கைகளின் தர நிலைகளை மட்டுமே அடிப்படையாகக் கொண்டு செயல்பட்ட ஒரு சட்டப் போராளியின் மீது அரசியல் முத்திரை குத்துவது, உலகளாவிய நீதி என்ற கருத்தாக்கத்தையே நிரந்தரமாக நிராகரிப்பதாகும்.

நவி பிள்ளை, ஒடுக்கப்பட்டோரின் நம்பிக்கை நட்சத்திரம்; குரலற்றவர்களின் குரல்; முகமற்றவர்களின் முகம். இவருடைய ஐம்பதாண்டு காலச் சட்டப் பயணம் என்பது வெறும் பதவிகளாலும் தீர்ப்புகளாலும் மட்டுமே அளவிடக்கூடியதன்று; அதிகார வர்க்கத்தின் அச்சுறுத்தல்களுக்கு அஞ்சாமல், எளிய மற்றும் ஒடுக்கப்பட்ட மக்களின் குரலாக, அவர்களின் உரிமைகளுக்காகத் தன் வாழ்நாள் முழுவதையும் அர்ப்பணித்த ஒப்பற்ற நேர்மையே இவரது அடையாளமாகும்.

உலகளாவிய அமைப்புகள் மற்றும் ஐ.நா. மன்றங்களின் மிக உயரிய பதவிகளை வகித்தபோதிலும், எளிய மக்களின் துயரங்களையும், அமைதிக்கான ஏங்கல்களையும் இவர் ஒருபோதும் மறந்ததில்லை.

‘அநீதிக்கு எதிராகக் குரல் கொடுப்பது ஆபத்தானது’ என்று கருதப்படும் உலகளாவியச் சூழலில், சட்டப்பூர்வமான வழிகளில் நீதியை வென்றெடுக்க முடியும் என்பதற்கு நவி பிள்ளை ஒரு நற்சான்றாகத் திகழ்கிறார். உலகின் முன்னணி அரசியல் தலைவர்கள் பலரும் பொறுப்புக்கூறலிலிருந்து தப்ப முயலும் வேளையில், அவர்களைச் சட்டத்தின் முன் நிறுத்தும் துணிச்சல் இவருக்கு மட்டுமே இருந்தது.

இந்த அமைதிப் பரிசு, அரசுகளின் அடக்குமுறையையும் வன்முறையையும் எதிர்கொண்டு போராடும் உலகெங்கிலும் உள்ள மில்லியன் கணக்கான மனித உரிமைப் போராளிகளுக்கு அளிக்கப்பட்ட பெரும் ஊக்கமும் கௌரவமுமாகும்.

அதிகார பலம் கொண்ட நாடுகள்  உலகச் சட்டங்களை மதிக்காமல் தன்னிச்சையாகச் செயல்படும் தற்போதைய சூழலில், நார்வே நோபல் குழு சரியான நேரத்தில், சரியான செய்தியை உலகிற்குத் தந்துள்ளது. ‘அதிகாரம் உள்ளவனின் விருப்பமே சட்டம்’ என்ற நிலையை மாற்றி, ‘சட்டத்தின் ஆட்சியே நீதியை உறுதிப்படுத்தும்’ என்பதை நவி பிள்ளையின் வாழ்வு மீண்டும் நிலை நிறுத்தியுள்ளது.

நீதியும் மனித கண்ணியமும் பேணப்படாத எந்தவோர் உலகிலும் அமைதி நிலைக்க முடியாது. ஆகவே, அமைதியின் கூறுகளை உலகெங்கிலும் விதைக்க மனத்தில் உறுதிகொண்டு, உண்மையின் வழி கண்டு, உள்ளத்தில் நீதி கொண்டு வாழ்ந்த நவி பிள்ளையின் வாழ்நாள் சேவையின் ஒளியை எவராலும் சிறிதும் குறைத்துவிட முடியவில்லை. இவரோ உலகோர் நெஞ்சங்களில் இன்று நீக்கமற நிறைந்திருக்கிறார்.

இதையே ஐயன் வள்ளுவர்,

‘உள்ளத்தாற் பொய்யா தொழுகின் உலகத்தார்

உள்ளத்து ளெல்லாம் உளன்’ (குறள் 294)

என்கிறார். ஆகவே, உலகளாவியச் சட்டத்தின் உண்மையான பாதுகாவலராகவும், ஒடுக்கப்பட்ட மக்களின் உரத்தக் குரலாகவும் திகழும் நவி பிள்ளையுடன் ஒட்டுமொத்த உலகமும் துணை நிற்கிறது என்பதன் பெரும் அடையாளமே இந்த அமைதிக்கான நோபல் பரிசு!

அன்புத் தோழமையில்,

அருள்முனைவர் செ. இராஜா @ இராஜசேகரன்

முதன்மை ஆசிரியர்

‘சனநாயகம்’ என்பது வெறும் வாக்குகளின் எண்ணிக்கை மட்டுமல்ல; மாறாக, அது அத்தொகுதியைத் தீர்மானிக்கும் குடிமக்களின் தன்னாட்சி உரிமை கொண்டது. ‘மக்களால், மக்களுக்காக, மக்களே நடத்தும் ஆட்சி முறை’ எனப் பெருமைகொள்ளும் மக்களாட்சித் தத்துவம், அதிகாரம் மக்களிடமே உள்ளது என்ற கொள்கையின் அடிப்படையில் கட்டமைக்கப்பட்ட ஓர் ஆட்சி அமைப்பு.

ஒரு மக்களாட்சியில், அரசின் முடிவுகள் மக்களின் கூட்டு விருப்பத்தைப் பிரதிபலிப்பதோடு, அவர்களின் தனிப்பட்ட உரிமைகளையும் பாதுகாக்கவேண்டும். ஓர் இறையாண்மையுள்ள சனநாயக நாட்டில், இத்தகைய உரிமையைப் பாதுகாக்கும் தலையாய பொறுப்பு அரசமைப்புச் சட்டத்தால் உருவாக்கப்பட்ட தன்னாட்சி அமைப்புகளுக்கே உரியது. இந்தியத் திருநாட்டில், மக்களாட்சியின்  தூண்களைத் தாங்கிப் பிடிக்கும் தன்னாட்சி அமைப்புகளில் முதன்மையானதாக விளங்குவது ‘இந்தியத் தேர்தல் ஆணையம்.’

அரசைத் தேர்ந்தெடுக்க உதவுவது, தேர்தல் செயல்பாடுகளை நடுநிலையோடு கண்காணிப்பது, விதிமீறல்களைத் தண்டிப்பது என மகத்தான பங்களிப்பை ஆற்றி வந்த தேர்தல் ஆணையத்தின் நேர்மையும் வெளிப்படைத்தன்மையும் இன்று கேள்விக்குறியாக்கப்பட்டு வீதிக்கு இழுக்கப்பட்டிருப்பது, இந்தியச் சனநாயகத்தின் வரலாற்றில் முன்னெப்போதும் இல்லாத பேரவலமாகும்.

இந்தியத் தேர்தல் ஆணையம் சர்ச்சைகளில் சிக்குவது இது முதன்முறையல்ல; கடந்த காலங்களில் அரசிற்கும் ஆணையத்திற்கும் இடையேயான அதிகார மோதல்களாகவோ, தனிப்பட்ட அதிகாரிகளின் அரசியல் சார்பு நிலைகளாகவோ அல்லது மின்னணு வாக்குப்பதிவு இயந்திரங்கள் (EVM) போன்ற புதிய தொழில்நுட்பங்களை அறிமுகப்படுத்துவதில் எழுந்த ஐயங்களாகவோ அவை இருந்தன. ஆனால், இன்றைய சூழல் முற்றிலும் வேறுபட்டது; முன்னெப்பொழுதும் இல்லாத வகையில் மிகவும் ஆபத்தானதும் கூட.

இன்று தேர்தல் ஆணையம், இந்தியக் குடிமக்களில் ‘யாருக்கு வாக்குரிமை உண்டு? யாருக்கு இல்லை?’ எனக் கட்டுப்படுத்தும் அதிகாரத்தைக் கையில் எடுத்துக்கொண்டு, இந்திய அரசமைப்புச் சட்டம் வழங்கியிருக்கக்கூடிய ‘வயது வந்தோர் அனைவருக்கும் வாக்குரிமை’ எனும் அடிப்படை உரிமையிலேயே நேரடியாகக் கைவைத்திருக்கிறது.

வழக்கமாக ஆண்டுக்கு ஒரு முறையோ அல்லது தேர்தலுக்கு முன்போ நடத்தப்படும் ‘சிறப்புச் சுருக்கமுறைத் திருத்தம்’ (Special Summary Revision - SSR) என்பது, இறந்தவர்களின் பெயர்களை நீக்குவது, புதிய வாக்காளர்களைச் சேர்ப்பது, முகவரி மாற்றங்களைச் செய்வது போன்ற அன்றாடப் பணிகளை உள்ளடக்கியது.

ஆனால், ‘சிறப்புத் தீவிரத் திருத்தம்’ (Special Intensive Revision - SIR) என்பது அப்படியல்ல. அது வாக்காளர் பட்டியலையே முழுமையாக மறுபரிசீலனை செய்து, அனைவரின் தகுதியையும் புதிதாக உறுதிப்படுத்தி, முற்றிலும் புதிய வாக்காளர் பட்டியலை உருவாக்கும் ஒரு தீவிரமான செயல்திட்டமாகும்.

சுதந்திர இந்தியாவின் தொடக்க ஆண்டுகளில் சீரான இடைவெளிகளில் SIR நடத்தப்பட்டு வந்திருந்தாலும், இம்முறை இந்தியத் தேர்தல் ஆணையம் வடிவமைத்த நடைமுறைகள் மிகவும் கடினமானதாகவும், நடைமுறைச் சாத்தியமற்ற சிக்கல்கள் நிறைந்ததாகவும் அமைந்தன.

ஒவ்வொரு குடிமகனும் பல ஆண்டுகளுக்கு முன்பு நடைபெற்ற SIR கணக்கெடுப்போடு தங்களுக்கு இருக்கும் தொடர்பை ஆவணங்கள் வாயிலாக நிரூபிக்கவேண்டும்; தவறினால் தங்களின் வாக்குரிமையைத் தக்கவைத்துக்கொள்ள மலைபோல் ஆவணங்களைத் தூக்கிக்கொண்டு தேர்தல் அலுவலர்களை நேரில் சென்று சந்திக்கவேண்டும் என்ற கட்டாயம் உருவாக்கப்பட்டது.

இதன் விளைவாக, நாடு முழுவதும் இதுவரை சுமார் 13 கோடி வாக்காளர்களின் பெயர்கள் வரைவு வாக்காளர் பட்டியலிலிருந்து அதிரடியாக நீக்கப்பட்டுள்ளன. இது இந்தியாவின் மொத்த வாக்காளர்களில் சுமார் 13 விழுக்காடாகும். அதிகபட்சமாக டெல்லியில் 33% வாக்காளர்களும், தெலுங்கானா, மகாராஷ்டிராவில் 21% வாக்காளர்களும் நீக்கப்பட்டுள்ளனர். இப்படி அனைத்து மாநிலங்கள், யூனியன் பிரதேசங்களிலும் அதிர்ச்சி தரவைக்கும் விழுக்காட்டில் வாக்காளர்கள் நீக்கம் நடந்திருக்கிறது. தமிழ்நாட்டில் 11.5% வாக்காளர்கள் நீக்கப்பட்டிருக்கிறார்கள். இவர்களில் பலர் மீண்டும் தேர்தல் அலுவலர்களிடம் முறையிட்டுப் பெயரை இணைத்துக்கொள்ள முடியும் என்றாலும், அது தொடர்பான முழு நிலவரம் இன்னும் வெளிவரவில்லை.

இந்தியாவின் இரண்டு பெரிய மாநிலங்களின் மொத்த மக்கள்தொகைக்குச் சமமான 13 கோடிப் பேரின் வாக்குரிமை ஒரே பேனா மை வீச்சில் பறிக்கப்பட்டிருக்கிறது. ‘புலம்பெயர்ந்த தொழிலாளர்களின் பெயர்களை நீக்குகிறோம்’ என்ற தேர்தல் ஆணையத்தின் வழக்கமான சாக்குப்போக்கை நம்பி, சனநாயகக் கடமையாற்ற முடியாமல் போனதைச் சகித்துக்கொண்ட மக்களுக்கு, இந்த SIR நடைமுறைப்படுத்தப்பட்டதில் நிகழ்ந்துள்ள முறைகேடுகளும் குளறுபடிகளும் வெளிச்சத்திற்கு வந்தபோது பேரதிர்ச்சியே காத்திருந்தது.

இந்தியத் தலைமைத் தேர்தல் ஆணையராகப் பொறுப்பேற்ற ஞானேஷ் குமார் தலைமையிலான தேர்தல் ஆணையத்தின் செயல்பாடுகள், தற்போது உச்ச நீதிமன்றத்தின் பார்வைகளுக்கும், கடும் மக்கள் எதிர்ப்பிற்கும் உள்ளாகியுள்ளன. ‘தி இந்தியன் எக்ஸ்பிரஸ்’ நாளிதழ் வெளியிட்ட புலனாய்வு அறிக்கை, தேர்தல் ஆணையத்தின் உள்ளேயே வெடித்துள்ள பெரும் பிளவை அம்பலப்படுத்தியுள்ளது.

அரசமைப்புச் சட்டத்தின்படி, தலைமைத் தேர்தல் ஆணையர் மற்றும் இரு தேர்தல் ஆணையர்கள் கொண்ட மூவர் குழுவே இணைந்து முடிவுகளை எடுக்கவேண்டும். ஆனால், தலைமைத் தேர்தல் ஆணையர் ஞானேஷ் குமார், சக தேர்தல் ஆணையர்களான சுக்பீர் சிங் சாந்து மற்றும் விவேக் ஜோஷி ஆகியோரின் ஆலோசனைகளையும் எதிர்ப்புகளையும் முற்றிலுமாகப் புறக்கணித்து, கடந்த பத்து மாதங்களில் குறைந்தது 14 முறையாவது தன்னிச்சையாக உத்தரவுகளைப் பிறப்பித்துள்ளார்.

புதிய வாக்காளர்களைச் சேர்ப்பதற்கான படிவம் 6-இல், நாடாளுமன்றத்தின் ஒப்புதலின்றி SIR தொடர்பான கூடுதல் விவரங்களை ஆணையம் கட்டாயமாக்கியுள்ளது. இதனைத் தன்னிச்சையாகச் சேர்த்தது ‘சட்டவிரோதமானது மற்றும் அதிகார வரம்பு மீறியது’ என உச்ச நீதிமன்றமே எச்சரிக்கும் நிலைக்கு நிலைமை முற்றியுள்ளது. மேலும், தேர்தல் ஆணையத்தின் உள்விவகாரங்கள் குறித்து ஒன்றிய அரசின் கேபினட் செயலாளரிடம் முறையிட்டதும், தன்னாட்சி அமைப்பின் சுயாட்சியைக் கேள்விக்குறியாக்கியுள்ளது.

மாநில மற்றும் மாவட்ட அளவிலான அதிகாரிகளுக்கு உரிய அதிகாரங்களை வழங்காமல், டெல்லியில் இருந்துகொண்டே மென்பொருள்கள் மூலமாக வாக்காளர் பட்டியலைக் கட்டுப்படுத்தியுள்ளனர். பெயர்கள் சேர்ப்பதும் நீக்கப்படுவதும் மாநில அதிகாரிகளின் கட்டுப்பாட்டைத் தாண்டி, டெல்லியிலிருந்து தீர்மானிக்கப்பட்டது இந்தியக் கூட்டாட்சித் தத்துவத்திற்கே விடப்பட்ட சவாலாகும். முறையான காரணங்களின்றி, எவ்விதத் தெளிவான தரவுகளுமின்றி ஒரே நேரத்தில் 13 கோடிப் பேர்களின் வாக்குரிமையைப் பறித்தது இந்திய அரசமைப்புச் சட்டத்தையே கேள்விக்குள்ளாக்குவதாகும்.

இச்செய்தி  பூதாகரமாக வெடித்து, எதிர்க்கட்சிகள் நாடாளுமன்றத்தில் தலைமைத் தேர்தல் ஆணையருக்கு எதிராகப் பதவி நீக்கத் தீர்மானம் கொண்டுவரத் திட்டமிட்ட நிலையிலும் ‘காக்ரோச் ஜனதா கட்சி’ (CJP) போன்ற இளைஞர் அமைப்புகள் நாடு தழுவிய போராட்டங்களை அறிவித்த நிலையிலும், தேர்தல் ஆணையம் அவசர அவசரமாகச் கூடி அறிக்கை ஒன்றை வெளியிட்டது.

“ஆணையத்திற்குள் பிளவு எதுவுமில்லை; முடிவுகள் ஒருமனதாகவே எடுக்கப்பட்டன” என்றும், “இனி மக்கள் அலுவலர்களைத் தேடி ஓட வேண்டியதில்லை, அலுவலர்களே மக்களைத் தேடி வருவார்கள்” என்றும் ஆறுதல் வார்த்தைகளைக் கூறியுள்ளது. ஆனால், இவை அனைத்தும் பரிதாபகரமாகத் தரையில் வீழ்த்தப்பட்டுக் கிடக்கும் தேர்தல் ஆணையத்தின் நேர்மையைச் சிறிதும் மீட்டெடுக்கப் போவதில்லை.

இந்தியத் தேர்தல் ஆணையம் என்பது சாதாரண அமைப்பல்ல; மாறாக, அது கிராம பஞ்சாயத்து முதல் நாடாளுமன்றம் வரை நாட்டின் தலைவிதியைத் தீர்மானிக்கும் சனநாயகத்தின் இதயம். அதன் ஆணையாளர்கள் நீதிபதிகளுக்கு நிகரான நடுநிலையையும் நியாயத் தராசையும் ஏந்தியிருக்க வேண்டியவர்கள்.

எனவே, தேர்தல் ஆணையம் தன் மீதான கறையைப் போக்க வெளிப்படையான நடவடிக்கைகளை எடுத்தாகவேண்டும். SIR கணக்கெடுப்பில் நடந்த தவறுகள் மற்றும் தன்னிச்சையான முடிவுகள் குறித்து நடுநிலையான உயர்மட்ட விசாரணைக்கு ஆணையம் உள்படவேண்டும். நீக்கப்பட்ட 13 கோடி வாக்காளர்களின் விவரங்களையும், நீக்கத்திற்கான சரியான காரணங்களையும் மாநில வாரியாக வெளிப்படையாகத் தரவுகளோடு வெளியிடவேண்டும். தலைமைத் தேர்தல் ஆணையரின் தன்னிச்சையான போக்கிற்கு முற்றுப்புள்ளி வைத்து, மூவர் குழுவின் சனநாயகப்பூர்வமான முடிவெடுக்கும் முறையை மீட்டெடுக்கவேண்டும்.

இறுதியாக, மக்களைத் தங்களின் மனச்சான்றின்படி வாக்களிக்கச் சொல்லும் தேர்தல் ஆணையம், முதற்கண் தன் மனச்சான்றின்படி மதிப்பளித்து நேர்மையோடு நடந்துகொள்வதே இந்தியச் சனநாயகத்தைக் காப்பாற்றும் ஒரே வழியாகும்!

அன்புத் தோழமையில்,

அருள்முனைவர் செ. இராஜா @ இராஜசேகரன்

முதன்மை ஆசிரியர்

இளையோரின் திறமைகளுக்கும் படைப்பாற்றலுக்கும் புதிய கதவுகளைத் திறந்து, உலகளவில் பல தொழில்களையும் வேலைவாய்ப்புகளையும் உருவாக்கி, மனித வாழ்க்கையை அடுத்த கட்டத்திற்கு எடுத்துச் செல்லும் ஓர் அற்புதப் புரட்சி, எண்மத் தொழில்நுட்ப உலகின் இணையவழிப் புரட்சியென்றால் அது மிகையல்ல.

நெடுந்தூரங்களை அழித்து, உலகளவில் வாழும் மனிதர்களை நொடிப்பொழுதில் ஒன்று சேர்க்கும் பாலமாக அமைந்து, ‘யாதும் டிஜிட்டல் மயம்’ என்று டிஜிட்டல் உலகம் இன்று யாவற்றையும் மாற்றி அமைத்திருக்கின்றது.

மனிதகுலத்தின் அன்றாட வாழ்வியலை எளிமையாக்கி, உலகை விரல் நுனியில் கொண்டுவந்து சேர்த்துள்ள இந்த இணையம் என்னும் அறிவியல் தொழில்நுட்ப வளர்ச்சி, அதே வேகத்தில் மனிதகுலத்திற்குப் பெரும் அச்சுறுத்தலாகவும் உருவெடுத்து நிற்கிறது. அறிவியல் நமக்கு அளித்த கருவிகளை நல்வழிப் பாதையில் பயன்படுத்துவோருக்கு இணையம் ஒரு பெருங்கொடை; ஆனால், அதையே குறுக்கு வழியிலும் தவறான பாதையிலும் பயன்படுத்தத் துடிக்கும் சமூக விரோதிகளுக்கு அதுவொரு பேராபத்து.

அண்மைக்காலமாக, செய்தித்தாள்களையும் காட்சி ஊடகங்களையும் திறந்தாலே இணையவழி ஏமாற்று வேலைகளும், கணினிவழி நிதிச் சூறையாடல்களும்தான் தலைப்புச் செய்திகளாக ஆக்கிரமிக்கின்றன. ஏதோ ஒரு மூலையில் உட்கார்ந்துகொண்டு, முகமே தெரியாத நபர்களின் வாழ்நாள் சேமிப்பை நொடிப்பொழுதில் சுருட்டிச் செல்லும் ‘இணையவழிக் குற்றங்கள்’(Cybercrimes), நவீன சமூகத்தின் மிகப்பெரிய சாபக்கேடாகவே மாறியுள்ளன.  தொழில்நுட்பத்தின் நுணுக்கங்களை அறியாத மக்களின் ‘டிஜிட்டல் அறியாமையை’ தங்களுக்குச் சாதகமாக அறுவடை செய்யும் இந்த அநீதிக்கு எதிராக, மக்கள் விவேகமும் விழிப்புணர்வும் கொண்டிருக்கவேண்டியது காலத்தின் கட்டாயமாகிறது.

கணினி வலைப்பின்னலையும், கைப்பேசி போன்ற டிஜிட்டல் சாதனங்களையும் ஆயுதமாகப் பயன்படுத்திச் செய்யப்படும் சட்டவிரோதச் செயல்கள் இரு வகைகளாகப் பிரிக்கப்பட்டிருப்பதாகத் தொழில்நுட்ப வல்லுநர்கள் குறிப்பிடுகின்றனர். ஒன்று, தொழில்நுட்பச் சாதனங்களை இலக்காகக் கொண்டு ‘கணினி நச்சுயிரிகளை’ (Viruses) அனுப்பி, அமைப்புகளை முடக்குவது அல்லது தரவுகளை அழிப்பது; மற்றொன்று, தொழில்நுட்பச் சாதனங்களைக் கொண்டு குற்றங்களை நடத்துவது. அதாவது, இணையத்தைப் பயன்படுத்தி நிதி மோசடி செய்வது, போலியான தகவல்களைப் பரப்புவது மற்றும் பிறரின் அடையாளங்களைத் திருடுவது.

தொடக்கக் காலத்தில் ‘ஹாக்கர்ஸ்’ எனப்படும் தனிப்பட்ட சில கணினி வல்லுநர்களால் விளையாட்டாகத் தொடங்கப்பட்ட இச்செயல்கள், இன்று பன்னாட்டு அளவில் பில்லியன் கணக்கில் பணத்தைச் சூறையாடும் மிகப்பெரிய நிழல் உலகக் கூட்டமைப்பாக, ஒரு ‘மாஃபியா’ வாக உருவெடுத்து நிற்பது அதிர்ச்சியளிக்கின்றது.

இன்றைய நவீன டிஜிட்டல் யுகத்தில் இணையவழிக் குற்றவாளிகள் கையாளும் உத்திகள் எல்லைகளைக் கடந்து, நாளுக்கு நாள் அதிநவீன நுட்பங்களைக் கொண்டிருக்கின்றன. குறிப்பாக, கணினிகளுக்குள்  ‘மால்வேர்’ எனப்படும் தீம்பொருள்களைப் புகுத்தி, தரவுகளைப் பிணைக்கைதிகளாகப் பூட்டிவைத்துவிட்டு, அவற்றைத் திறக்க பெருந்தொகையைப் பிணையப் பணமாகக் கேட்பது. இதற்குச் சான்றாக 2017-ஆம் ஆண்டில் உலகளவில் 150 நாடுகளைச் சேர்ந்த 23,00,000 கணினிகளை முடக்கி, 4 பில்லியன் டாலர் இழப்பை ஏற்படுத்திய ‘வான்னாக்ரை’ (Wannacry) தாக்குதலே நம் நினைவிற்கு வருகின்றது.

மேலும், மின்னஞ்சல்கள் அல்லது குறுஞ்செய்தி மூலம் பிரபல வங்கிகள் அல்லது அரசு அமைப்புகள் பேசுவது போலப் போலியான தொடர்புகளை ஏற்படுத்தி, கடவுச்சொற்கள் (உள்ளீட்டு குறியீடு), வங்கிக்கணக்கு எண்களைத் திருடுவதும், அதுபோலவே, குறுஞ்செய்திகள் மற்றும் போலித் தொலைப்பேசி அழைப்புகள் மூலம் மக்களை அச்சுறுத்தி, ஆசை வார்த்தைகள் காட்டி பணத்தைப் பறிப்பதும் சமூகத்தில் இன்று பெருகி வருகின்றன.

அண்மைக்காலமாக, செயற்கை நுண்ணறிவுத் தொழில்நுட்பத்தைப் பயன்படுத்தி, நமக்கு நெருக்கமானவர்களின் குரலை அல்லது உருவத்தை அப்படியே போலி செய்து, ஆபத்தில் இருப்பது போலக் காட்டிப் பணம் பறிக்கும் அதிர்ச்சி தரும் குற்றங்களும் நாளுக்குநாள் அரங்கேறி வருகின்றன.

மக்களின் ‘டிஜிட்டல் அறியாமை’ மற்றும் ‘உளவியல் பலவீனங்களை’ இணையக் குற்றவாளிகள் மிகத் துல்லியமாகப் பயன்படுத்துவதுதான் மிகவும் கவலைக்குரிய செய்தி. இவ்வகையில், சாதாரண மக்கள் மட்டுமன்றி, கணினி வல்லுநர்கள், வங்கி அதிகாரிகள், மருத்துவர்கள், உயர்கல்வி கற்ற அறிஞர்கள் கூட இந்த இணைய மோசடிகளில் சிக்கித் தவிக்கின்றனர் என்பதுதான் ஐ.ஐ.டி. மெட்ராஸ் நடத்திய அண்மைக்கால ஆய்வு தரும் அதிர்ச்சி நிறைந்த செய்தி. இதற்கு முக்கியக் காரணம், குற்றவாளிகள் மக்களின் மனத்தில் உருவாக்கும் செயற்கையான மூளை முடக்கமே!

அச்சம், பதற்றம், அவசரம், பேராசை போன்ற மனித உணர்ச்சிகளை இக்குற்றவாளிகள் தங்களுக்குச் சாதகமாகப் பயன்படுத்தி, ‘உங்கள் வங்கிக் கணக்கு முடக்கப்பட்டுவிட்டது’, ‘மின்சாரக் கட்டணம் செலுத்தாவிட்டால் மின்சாரம் துண்டிக்கப்படும்’, ‘உங்கள் மீது டிஜிட்டல் கைது நடவடிக்கை எடுக்கப்படுகிறது’ என்று அச்சுறுத்தும்போது, மக்களின் பகுத்தறியும் திறன் தற்காலிகமாக முடங்கி விடுகிறது. இந்தச் சூழலைப் பயன்படுத்தி அவர்களின் பணத்தை இவர்கள் சூறையாடி விடுகின்றனர்.

இது ஏதோ ஒரு தனிப்பட்ட நபர் செய்யும் சிறு திருட்டு அல்ல; மாறாக,  உலகளாவிய அளவில் செயல்படும் மாஃபியாக் கும்பல்களின் செயல்பாடே! இவர்கள் போலி அழைப்பு மையங்கள், போலி வங்கிக் கணக்குகள் மற்றும் இணையவழிச் சூதாட்டக் கணக்குகள் மூலம் பணத்தை நொடிப்பொழுதில் பல்வேறு நாடுகளுக்குக் கடத்தி விடுகின்றனர். பதியப்படும் ஒரு சிறு புகாரின் பின்னணியில், பல கோடிக்கணக்கான ரூபாய் மோசடியும், நூற்றுக்கணக்கான போலிக் கணக்குகளும் இணைக்கப்பட்டிருப்பது காவல்துறை விசாரணைகளில் இன்று தெரியவருகின்றன.

ஆயினும், தொழில்நுட்ப அச்சுறுத்தல்கள் எவ்வளவு தீவிரமாக இருந்தாலும், மனித மனத்தின் விவேகமும் விழிப்புணர்வுமே இதற்கான முதன்மைத் தடுப்பு அரணாகச் செயல்பட முடியும். குறிப்பாக, முன்பின் தெரியாத நபர்களிடமிருந்து வரும் எந்த ஓர் இணையத் தொடுப்பிலும் உடனடியாக இணையக்கூடாது என்றும், அவசரப்படுத்தும் எந்த ஓர் அழைப்பையும் உடனே நம்பிவிடாமல், நிதானமாகச் செயல்படவேண்டும்; வங்கிச் சான்றுகள், கடவுச் சொற்கள், ஒருமுறை பயன்படுத்தும் கடவுச்சொல் (OTP), ஆதார் விவரங்கள் போன்றவற்றைத் தொலைப்பேசியிலோ அல்லது இணையத்திலோ யாருடனும் பகிரக் கூடாது என்றும் அறிவுறுத்தப்படுகிறோம். எந்தவோர் அதிகாரப்பூர்வ வங்கியோ அல்லது அரசு அமைப்போ தொலைப்பேசியில் OTP கேட்காது என்பதை நாம் நினைவில் கொள்ளவேண்டும்.

மேலும், நமது டிஜிட்டல் கணக்குகளுக்குச் சிக்கலான கடவுச்சொற்களைப் (Complex Passwords) பயன்படுத்துவதோடு, இருமுறை சரிபார்ப்பு முறையைக் கட்டாயமாக நடைமுறைப்படுத்தவேண்டும் என்றும், அவ்வாறே அதிகாரப்பூர்வமற்ற இடங்களிலிருந்து எவ்விதக் கோப்புகளையும் பதிவிறக்கம் செய்யக்கூடாது என்றும் எச்சரிக்கப்படுகிறோம்.

இத்தகைய சூழலில், இணையவழிக் குற்றத் தடுப்பு என்பது தனிநபர் விழிப்புணர்வோடு முடிந்து விடுவதன்று; மாறாக, அரசு, சமூக அமைப்புகள் மற்றும் கல்வி நிறுவனங்கள் ஒருங்கிணைந்து செயல்பட வேண்டியதொரு கூட்டுப்பொறுப்பாகும்.

குறிப்பாக, பள்ளிப் பாடத்திட்டங்களில் ‘டிஜிட்டல் பாதுகாப்பு’ குறித்த பாடங்களைக் கட்டாயமாக்குவதோடு, பள்ளிகளில் ‘இணையப் பாதுகாப்பு மன்றங்களை’ உருவாக்கி, மாணவர்களுக்கு விழிப்புணர்வுப் பயிற்சிகளை வழங்கவேண்டும். மேலும், வானொலி, தொலைக்காட்சி, நாளிதழ்கள் மற்றும் சமூக வலைதளங்கள் வாயிலாகத் தொடர்ச்சியான விழிப்புணர்வுப் பரப்புரைகளை மேற்கொள்ள வேண்டும்.

‘அவசரப்படாதே, யோசி, சரிபார்!’ என்ற விழிப்புணர்வுத் தாரக மந்திரத்தை மக்களிடம் தொடர்ந்து கொண்டு சேர்க்கவேண்டும். அவ்வாறே, கிராமப்புறங்கள் மற்றும் நகர்ப்புறங்களில் விழிப்புணர்வுப் பட்டறைகளை அமைத்து, முதியோர் மற்றும் இல்லத்தரசிகளுக்கு இணையத்தின் ஆபத்துகள் குறித்துக் கற்பிப்பதுடன், 1930 என்ற அவசர உதவி எண்ணை உடனே அழைத்தால், திருடப்பட்ட பணத்தை முடக்கி மீட்டெடுக்க அதிக வாய்ப்புள்ளது என்பதையும் தெரியப்படுத்திடவேண்டும்.

இறுதியாக, ‘சிறு துளி பெரு வெள்ளம்’ என்பதைப்போல, நாம் ஒவ்வொருவரும் வளர்த்தெடுக்கும் சிறு விழிப்புணர்வுதான், மிகப்பெரிய டிஜிட்டல் குற்ற அலைகளில் இருந்து நம்மைப் பாதுகாக்கும் கேடயமாகும். அறிவியல் வளர்ச்சி மனிதகுலத்தின் மேம்பாட்டிற்கே தவிர, நம்மை அழிப்பதற்கல்ல என்பதை நாம் புரிந்திடவேண்டும். தொழில்நுட்பத்தைப் பயன்படுத்துவதில் அச்சம் தேவையில்லை; மாறாக, அளப்பரிய விவேகமும் விழிப்புணர்வும் மிக மிக அவசியம் என்பதை நாம் உணர்ந்திடவேண்டும்; பிறருக்கு உணர்த்திடவேண்டும்.

ஆகவே, டிஜிட்டல் அறியாமையை அகற்றி, நாம் விழிப்புணர்வுச் சுடரை ஏந்திச் செயல்பட்டால், இணையவழிக் குற்றவாளிகளின் கரங்களில் இருந்து நம்மையும், நம் எதிர்காலத் தலைமுறையையும் உறுதியாக நாம் பாதுகாத்துக்கொள்ள முடியும். விழித்திருப்போம்! விவேகம் கொண்டிருப்போம்!

அன்புத் தோழமையில்,

அருள்முனைவர் செ. இராஜா @ இராஜசேகரன்

முதன்மை ஆசிரியர்

இயற்கை மனிதகுலத்திற்கு அளித்த மிக உன்னதமான கொடை நீர். ‘நீரின்றி அமையாது உலகு’ என்ற ஐயன் திருவள்ளுவரின் கூற்று, வெறும் அறநெறி உரை அன்று; அது மனிதச் சமூகத்தின் அடித்தளத்தைக் குறிப்பிடும் புவிசார் வாழ்வியல் உண்மை. அதுவே,  நம்மைப் பல்வேறு வழிகளில் இணைக்கிறது. 

நிலத்தடி நீர் நிலைகள் பல்வேறு தரப்பினருக்கும் வாழ்வாதாரமாக அமைந்துள்ளது. தற்போது பெய்யும் மழை நீரே, நாளை குடிநீராகவும் பாசன ஆதாரமாகவும் நிலத்தடி நீராகவும் மாறுகிறது. நீர் ஒரு பகிரப்பட வேண்டிய வளமாகும்; அத்துடன் நமது எதிர்காலச் சந்ததியினருக்கு அதை பாதுகாப்பாக வழங்கிடவேண்டிய கடமையும் பெரும் பொறுப்பும் நமக்குண்டு.

21-ஆம் நூற்றாண்டின் மிகக் கடுமையான சவாலாக உருவெடுத்துள்ள காலநிலை மாற்றம், உலகளாவிய சூழலியல் அமைப்பைத் தலைகீழாகப் புரட்டிப் போட்டுள்ளது. புவி வெப்பமயமாதலின் நேரடி விளைவாக மழைப்பொழிவுச் சுழற்சி சீர்குலைந்து, ஒருபுறம் கடுமையான வறட்சியும், மறுபுறம் பேரழிவை ஏற்படுத்தும் வெள்ளப்பெருக்கும் மாறி மாறித் தாக்குகின்றன.

இத்தகைய உறைபனி உருகுதல், கடல்மட்ட உயர்வு மற்றும் தீவிரக் காலநிலை மாறுபாடுகளுக்கு இடையே, நன்னீர் மூலங்கள் மிக வேகமாகக் குறைந்து வருகின்றன. உலகெங்கிலும் பெருகிவரும் மக்கள்தொகை, அதிவேக நகரமயமாக்கல் மற்றும் தொழில்மயமாக்கல் ஆகியவற்றுடன் காலநிலை மாற்றமும் கைகோர்த்துக்கொண்டதால், உலகளவில் ‘நீர் நெருக்கடி’ ஒரு சமூக-அரசியல் அவசர நிலையாக உருவெடுத்துள்ளது.

இந்நீர் பற்றாக்குறை வெறும் இயற்கை சார்ந்த பிரச்சினை மட்டுமல்ல; மாறாக, அது மனித உரிமைகள், சமூகநீதி மற்றும் நாடுகளின் இறையாண்மை சார்ந்த அரசியல் களம் என்பதை நாம் புரிந்துகொள்ளவேண்டும்.

நன்னீர் என்பது பூமியின் பல்வேறு உயிர்க்கோளங்களின் உயிரோட்டத்தைத் தீர்மானிக்கும் முதன்மைக் காரணி. வெப்ப மண்டல மழைக்காடுகள் முதல் ஈரநிலங்கள் வரை அனைத்துச் சூழலியல் மண்டலங்களும் மழைப்பொழிவு மற்றும் நீரின் இருப்பையே பெரிதும் நம்பியுள்ளன.

இத்தகைய சூழலில், அண்மையில் (செப்டம்பர் 22 முதல் 26 வரை) புதுடில்லியில் நடைபெற்ற ‘ஒன்பதாவது - உலக நீர் வார’ நிகழ்வுகள் பல வழிகாட்டுதல்களையும் விழிப்புணர்வையும் எச்சரிக்கையையும் விடுத்துள்ளன. மத்திய ஜல் சக்தி (நீர்வளம்) அமைச்சகத்தால் ஏற்பாடு செய்யப்பட்ட இந்நிகழ்வில் அரசுகள், நிபுணர்கள், தொழில்துறையினர், உலக நட்புறவு நாடுகள் எனப் பல்வேறு தளங்களில் இருந்து அனுபவம் நிறைந்த வல்லுநர்கள் தங்களுடைய அனுபவம், தொழில்நுட்பம், நீர் மேலாண்மை பற்றிய கருத்துகளைப் பரிமாறிக் கொண்டது, எதிர்காலத்திற்கான கூட்டுறவை உருவாக்கும் ஒரு தளமாக அமைந்திருந்தது.

மத்திய நீர் வளத்துறை அமைச்சர் சி.ஆர். பாட்டில் குறிப்பிட்டுள்ளதுபோல, “வருங்காலத் தலைமுறையினருக்காக ஒவ்வொரு துளி நீரையும் நாம் ஒருங்கிணைந்து பாதுகாக்கவேண்டும்.” ஆயினும், கடந்த 20-ஆம் நூற்றாண்டில் மட்டும் மனிதனின் பேராசையினாலும், முறையற்ற நீர் மேலாண்மையினாலும் உலகின் 50 விழுக்காட்டிற்கும் அதிகமான ஈரநிலங்கள் அழிக்கப்பட்டுவிட்டன. நிலத்தடி நீர் மற்றும் மேற்பரப்பு நீர்நிலைகள் அதிகளவில் உறிஞ்சப்பட்டு, தொழிற்சாலைக் கழிவுகளால் நச்சுமயமாக்கப்படுகின்றன. இதன் காரணமாக, உலகளவில் பாலைவனமாக்கல் அதிகரித்து, சுற்றுச்சூழல் சேவைகள் பெருமளவில் பாதிக்கப் பட்டுள்ளன.

மனித சமுதாயத்தில் நீரின் பயன்பாடு பல்வேறு துறைகளாகப் பிரிக்கப்பட்டுள்ளன. உலக வங்கித் தரவுகளின்படி, உலகளாவிய நன்னீர் பயன்பாட்டில் 72% பங்கைக் கொண்டு முதலிடத்தில் இருப்பது வேளாண்மைத் துறையாகும். ஆனால், இதில் பெரும்பகுதி திறனற்ற பாசன முறைகளால் வீணடிக்கப்படுகிறது. இதற்குத் தீர்வாகத் துல்லியப் பாசனம், தொலைவு உணர்தல், மண் ஈரப்பதக் கண்காணிப்பு போன்ற தொழில்நுட்பங்கள் ஊக்குவிக்கப்படவேண்டும்.

ஐக்கிய நாடுகளின் உணவு மற்றும் வேளாண் அமைப்பு (FAO) தரவுகளின்படி, உலக நன்னீரில் 19% தொழில்துறையால் பயன்படுத்தப்படுகிறது. நீர்மின் திட்டங்கள், அனல்மின் நிலையங்கள், சுத்திகரிப்பு ஆலைகள் மற்றும் உற்பத்திப் பிரிவுகள் நீரைப் பயன்படுத்துகின்றன. தொழில்துறை நீரை நுகர்வதைவிட, இராசயனக் கழிவுகளையும் வெப்பமடைந்த நீரையும் சுத்திகரிக்காமல் நீர்நிலைகளில் கலந்து சூழலியல் அமைப்பைக் கடுமையாகச் சீரழிக்கிறது.

மேலும், உலகளாவிய நன்னீரில் 12% வீட்டு உபயோகத்திற்காகப் பயன்படுகிறது. குடித்தல், சமையல், சுகாதாரம் மற்றும் குளியலுக்கு ஒரு மனிதனுக்கு நாளொன்றுக்கு குறைந்தபட்சம் 50 லிட்டர் நீர் தேவைப்படுகிறது. வளர்ந்த நாடுகளில் வீடுகளுக்கு விநியோகிக்கப்படும் அனைத்து நீரும் குடிநீர் தரத்திலேயே உள்ளது; ஆனால், அதில் மிகச் சிறிய விழுக்காடே குடிப்பதற்குப் பயன்படுகிறது.

இன்றைய சூழலில் சுமார் 1.2 பில்லியன் மக்கள் ‘புவியியல் அடிப்படையில் நீர் பற்றாக்குறை’ நிலவும் பகுதிகளிலும், 1.6 பில்லியன் மக்கள்  உள்கட்டமைப்பு மற்றும் நிதி பற்றாக்குறை காரணமாக  நிலவும் ‘பொருளாதார நீர் பற்றாக்குறை’  பகுதிகளிலும் வாழ்கின்றனர்.

வளரும் நாடுகளில் போதுமான நீர் சுத்திகரிப்பு வசதிகள் இல்லாததால், கடுமையான சுகாதாரக் கேடுகள் விளைகின்றன. 2024-ஆம் ஆண்டின் தரவுகளின்படி, 2.2 பில்லியன் மக்களுக்குப் பாதுகாக்கப்பட்ட குடிநீர் வசதி இல்லை; 3.4 பில்லியன் மக்களுக்குச் சுத்திகரிக்கப்பட்ட சுகாதார வசதிகள் இல்லை; 1.7 பில்லியன் மக்களுக்கு அடிப்படைக் கைகழுவும் சுகாதார வசதிகள் கூட இல்லை.

யுனிசெஃப் அறிக்கையின்படி, கழிவுநீரில் உள்ள Vibrio cholerae மற்றும் Salmonella போன்ற பாக்டீரியாக்களினாலும் நுண்ணுயிரிகளினாலும் பரவும் வயிற்றுப்போக்கு நோயால், உலகளவில் 5 வயதிற்குட்பட்ட 4,43,000 குழந்தைகள் ஆண்டுதோறும் உயிரிழக்கின்றனர். ஐந்து வயதிற்குட்பட்ட குழந்தைகளின் மரணத்திற்கு இது மூன்றாவது முக்கியக் காரணம் எனக் குறிப்பிடப்படுகிறது.

காலநிலை மாற்றத்தின் அதிர்வுகளையும், நீர் மேலாண்மைப் போதாமையையும் புரிந்துகொள்ள சென்னை மாநகரம் ஒரு சிறந்த எடுத்துக்காட்டாகும். ஆண்டிற்கு 700 மி.மீ. முதல் 1,100 மி.மீ. வரை கணிசமான மழைப்பொழிவைப் பெற்றபோதிலும், சென்னை நகரம் தொடர்ந்து தீவிர நீர்ப் பாதுகாப்பினைக் கடைப்பிடிக்கவில்லை.

தென்னிந்தியாவில் குறிப்பாக, தமிழ்நாட்டில் மழைநீரைச் சேமிக்கப் பழங்காலத்திலிருந்தே ‘சங்கிலித் தொடர் ஏரிகள்’ பயன்படுத்தப்பட்டன. வற்றாத ஜீவநதிகள் இல்லாத தமிழ்நாட்டில், பருவமழைக் காலங்களில் ஆறுகளில் பெருகிவரும் உபரிநீரை மண் கால்வாய்கள் மூலம் ஏரிகளுக்குத் திருப்பிவிடும் உன்னதமான பொறியியல் முறை நடைமுறையில் இருந்தது. ஓர் ஏரி நிறைந்தவுடன், அதன் உபரிநீர் அடுத்த ஏரிக்குச் செல்லும் வண்ணம் வடிவமைக்கப்பட்ட இத்தொழில்நுட்பம், சிமெண்ட் அல்லது இயந்திரங்கள் இன்றி முழுமையாக மனித உழைப்பால் உருவாக்கப்பட்டது.

1970-களில் தென்னிந்தியாவின் பாசனத்தில் 92 விழுக்காட்டைப் பகிர்ந்த ஏரிப் பாசனம், தற்காலப் பேராசையினாலும், ஆழ்துளைக் கிணறுகளின் கட்டுப்பாடற்றப் பெருக்கத்தினாலும், பராமரிப்பின்மையினாலும் இன்று வெறும் 5.18 விழுக்காடாகச் சுருங்கிப்போனது வரலாற்றுச் சோகம்.

காலநிலை மாற்றத்தின் விளைவுகளை எதிர்கொள்ளவும், நீர் பற்றாக்குறையைப் போக்கவும் நவீன நீர் மேலாண்மை நுட்பங்கள் அவசியமாகின்றன.

ஆகவே, நீர் மேலாண்மை என்பது வெறும் தொழில்நுட்பம் சார்ந்த பொறியியல் பணி அல்ல; மாறாக, அது தீவிரமான சமூக-அரசியல்-வாழ்வியல் சார்ந்ததாகும். நீர்வளப் பகிர்வில் ஏழை மக்களும், பெண்களும், விளிம்புநிலைச் சமூகத்தினரும் தொடர்ந்து புறக்கணிக்கப்படுகின்றனர். காலநிலை மாற்றத்தின் கொடூரமான விளைவுகளை முதன் முதலில் சந்திப்பவர்கள் இந்த விளிம்புநிலை மக்களே!

காலநிலை மாற்றத்தின் அச்சுறுத்தலிருந்து தப்பிக்கவும், நீர் பாதுகாப்பை உறுதி செய்யவும் அரசுகள், குடிநீர் உரிமையை அடிப்படை மனித உரிமையாகச் சட்டப்பூர்வமாக்கவேண்டும். பண்டைய தமிழ்நாட்டின் ‘குடிமராமத்து’ பாணியில், உள்ளூர் சமூகங்கள், இளைஞர்கள், பெண்கள் மற்றும் பூர்வீகக் குடியினரை நீர் மேலாண்மை முடிவுகளில் தீவிரமாகச் சேர்க்கவேண்டும். வேளாண்மை, தொழில்துறை மற்றும் நகர்ப்புற வளர்ச்சித் துறைகள் தனித்தனியாக இயங்காமல், ஒருங்கிணைந்த நீர்வள மேலாண்மையை நடைமுறைப்படுத்த வேண்டும்.

மேலும், ‘நீரின்றி அமையாது உலகு’ என்ற நிலையைத் தாண்டி, ‘நீரின்றி அமையாது நீதி’ என்ற சூழலை நோக்கி உலகம் இன்று நகர்ந்து கொண்டிருக்கிறது. காலநிலை மாற்றம் விடுத்துள்ள எச்சரிக்கையை உணர்ந்து, இயற்கை வளங்களைச் சுரண்டுவதை நிறுத்தி, மரபுசார் அறிவையும் நவீன தொழில்நுட்பத்தையும் இணைத்து நீர் மேலாண்மையை ஒரு மக்கள் இயக்கமாக மாற்றத் தவறினால், மனித சமுதாயம் வரலாற்றின் பேரழிவைச் சந்திக்க நேரிடும்.

சாமானியனின் தாகம் தீர்ப்பதே 21-ஆம் நூற்றாண்டின் தலைசிறந்த அரசியலாக இருக்க முடியும்!

அன்புத் தோழமையில்,

அருள்முனைவர் செ. இராஜா @ இராஜசேகரன்

முதன்மை ஆசிரியர்

‘அரவின் உருவொடு கடிவிடு விடம்அற,

அரிதில் உயிர்தரும் இனிது அமுது இவள் என,

இரவின் இருளினும் வடுதரும் இருள்அற,

இரவி ஒளியினும் ஒளிர்சுடர் இவள்என,

உரம் இழிவுஅற, உயிர்அடும் இகல்அற,

உறுதி இவள்என, உயிர் இவள்என, விரி

புரவில் நிகர்இல தயவினில் நிகர்இல

புணரி இவள்என அறைகுவர் சிலருமே!’

(தேம்பாவணி, படலம் 8: 66)

என்கிறது வீரமாமுனிவர் இயற்றிய தேம்பாவணி.  அன்னை மரியாயின் தூய்மையையும் தாய்மையையும், இறைவன் அவருக்கு அருளிய ஒப்பற்ற மேன்மையையும் போற்றும் இப்பாடல் வரிகளில், பாம்பின் வடிவில் வந்த தீயோன் (அலகை) மனிதகுலத்தின்மீது உமிழ்ந்த பாவம் என்னும் கொடிய நச்சு அகன்று, ஆன்மாவிற்கு மறுவாழ்வு அளிக்கும் இனிய அமிழ்தமாக அன்னை மரியா திகழ்கிறார் என்றும், இரவின் இருளைக்காட்டிலும் கொடிய அறியாமை என்னும் இருளைப் போக்கும் சூரியனைவிட, பேரொளி வீசும் சுடராக அவர் விளங்குகிறார் என்றும் குறிப்பிடுகிறார். மேலும், மனத்தின் பலவீனங்களையும், ஆன்மாவைக் கொல்லும் பாவப் பகையையும் அழித்து நல்வாழ்விற்கு உறுதியளிக்கும் உயிராக அவர் இருக்கிறார் என்றும், அளவற்ற உலக உயிர்களைக் காப்பதிலும், இரக்கம் காட்டுவதிலும் தனக்கு நிகரில்லாத கருணைக் கடலாக அன்னை மரியா விளங்குகிறார் என்று சான்றோர் அவரைப் போற்றுகின்றனர் என்றும் வானவர் புகழ்வதாக வடித்துள்ளார்.

அன்னை மரியாவின் கைகளில் தவழும் செபமாலை வெறும் செபங்களின் தொகுப்பு மட்டுமல்ல; மாறாக, அது ஆன்ம மீட்பிற்கும், தீமைகளை வெல்வதற்கும், இறையருளைப் பெறுவதற்கும் நமக்கு அன்னையால் வழங்கப்பட்ட ஆற்றல்மிக்க ஆன்மிகக் கருவி. செபமாலையின் ஒவ்வொரு மணி வழியாகவும் நாம் அன்னையை நோக்கி ‘அருள் நிறைந்த மரியே வாழ்க’ என்று போற்றும்போது, அன்னை நமக்குத் தேவையான அருள் நிறைந்த நம்பிக்கையைக் கற்றுத் தருகிறார்; தனது மகனிடமிருந்து மன அமைதியையும், ஆன்மிகப் பலத்தையும் பெற்றுத் தருகிறார்.

கிறித்தவ வாழ்வியலில் செபமாலை இறைவேண்டல் என்பது, இயேசுவின் மீட்பு மறைபொருள்களை அன்னை மரியாவோடு இணைந்து தியானிக்கும் ஒரு புனிதப் பயணமாகும். இப்பயணத்தில், நமக்கு நன்மை செய்வதற்கு அன்னை மரியா ஒருபோதும் தயங்குவதில்லை என்பதை உணர்த்துவதே கானாவூரில் நிகழ்ந்த முதல் அருளடையாளம்.  அதேபோன்று, இன்றும் தன் பிள்ளைகள் நம்பிக்கையோடு செபமாலையைக் கையிலெடுத்து மன்றாடும்போது, தன் அன்பு மகன் இயேசுவிடம் நமது தேவைகளுக்காக இடைவிடாது பரிந்துபேசி அளவற்ற அருள்கொடைகளை அருள்கின்றார்.

கொங்கு மண்டலத்தின் வரலாற்றுச் சிறப்புமிக்க ஆன்மிகத் தலமாகத் திகழ்வது கோவை - கருமத்தம்பட்டி புனித செபமாலை அன்னை பேராலயத் திருத்தலமாகும் (Holy Rosary Basilica). 1640-ஆம் ஆண்டிற்கும் முன்பிருந்தே வரலாற்றுப் பின்னணி கொண்ட இத்திருத்தலம், கோவை மறைமாவட்டத்தின் முதல் பேராலயமாகவும், அருள்நிறை புனிதத் தலமாகவும் திகழ்கிறது. தங்கள் துயரங்கள் மற்றும் தேவைகளுக்காக அன்னையை நாடிவரும் பிள்ளைகளை, அன்னை மரியா ஒருபோதும் இங்கு வெறுங்கையோடு திருப்பி அனுப்புவதில்லை என்பது கண்கூடு.

இப்பெருவிழா வேளையில், கருமத்தம்பட்டி செபமாலை அன்னையின் பாதம் நாடுவோம்; அன்னையின் புகழ்பாடக் கூடுவோம். இச்சிறப்பிதழ் வெளிவர பேருதவியாக இருந்த திருத்தல அதிபர் மற்றும் விழா குழுவினர் அனைவரையும் மனதார வாழ்த்துகிறேன்.

அன்புத் தோழமையில்,

அருள்முனைவர் செ. இராஜா @ இராஜசேகரன்

முதன்மை ஆசிரியர்

உலகளாவிய வர்த்தகப் பாதைகளிலும், திட்டமிட்ட புவிசார் அரசியலிலும் கடுமையான கொந்தளிப்புகள் நிலவிவரும் இன்றைய சூழலில், இந்தியாவின் தலைநகர் புதுடெல்லியிலுள்ள பாரத் மண்டபத்தில் 18-வது ‘பிரிக்ஸ் உச்சி மாநாடு’ செப்டம்பர் 12, 13 ஆகிய நாள்களில் நடைபெற்றது; இது பன்னாட்டு அரசியல் அரங்கில் மிக முக்கியமானதொரு நகர்வாகக் கணிக்கப்படுகிறது.

2006-இல் பிரேசில், இரஷ்யா, இந்தியா, சீனா (BRIC) ஆகிய நாடுகளின் வெளியுறவு அமைச்சர்களின் சந்திப்போடு தொடங்கி, 2010-இல் தென் ஆப்பிரிக்காவையும் இணைத்துக்கொண்டு ‘பிரிக்ஸ்’ என உருவெடுத்த இக்கூட்டமைப்பு, இன்று தன் 20 ஆண்டுகால வரலாற்றுப் பயணத்தை நிறைவுசெய்து, முதிர்ச்சியடைந்த அமைப்பாக நிமிர்ந்து நிற்கிறது.

குறிப்பாக, 2024-இல் எகிப்து, எத்தியோப்பியா, ஈரான், சவுதி அரேபியா, ஐக்கிய அரபு அமீரகம் மற்றும் இந்தோனேசியா ஆகிய நாடுகளின் இணைப்பிற்குப் பிறகு, உலக அரங்கில் மேலைநாடுகளின் ஆதிக்கத்திற்கு மாற்றாக விளங்கும் ஆற்றல்மிக்கக் கூட்டமைப்பாக விரிவடைந்துள்ளது. உலக மக்கள்தொகையில் பாதியையும், உலகளாவிய மொத்த உள்நாட்டு உற்பத்தியில் (GDP) சுமார் 13.6 ட்ரில்லியன் டாலருக்கும் அதிகமான பங்கையும், 4 ட்ரில்லியன் டாலர் அந்நியச் செலாவணி கையிருப்பையும் கொண்டுள்ள அமைப்பாக இக்கூட்டமைப்பு திகழ்கிறது.

‘உறுதித்தன்மை, புதுமை, ஒத்துழைப்பு மற்றும் நிலையான வளர்ச்சியை உருவாக்குதல்’ (Building for Resilience, Innovation, Cooperation and Sustainability) என்ற தொலைநோக்கு மையக்கருத்துடன், 2026-ஆம் ஆண்டிற்கான தலைமைப் பொறுப்பை இந்தியா ஏற்று இம்மாநாட்டை வெற்றிகரமாக நடத்தி முடித்திருக்கிறது.

இந்தியப் பிரதமர் நரேந்திர மோடி தலைமையேற்றுத் தொடங்கிவைத்த இம்மாநாட்டில், இரஷ்ய அதிபர் விளாடிமிர் புதின், சீன அதிபர் ஜி ஜின்பிங், ஈரான் அதிபர் மசூத் பெசெஷ்கியன், தென் ஆப்பிரிக்க அதிபர் சிரில் ராமபோசா உள்ளிட்ட உறுப்பு நாடுகளின் தலைவர்களும், ஐக்கிய நாடுகள் சபையின் பொதுச்செயலாளர் அந்தோ னியோ குத்தேரஸ், உலக வர்த்தக அமைப்பு (WTO), உலக சுகாதார அமைப்பு (WHO) ஆகியவற்றின் தலைவர்களும் பங்கேற்றது இதன் முக்கியத்துவத்தை உலகிற்கு உணர்த்தியுள்ளது.

மாநாட்டில் ஒருமனதாக ஏற்றுக்கொள்ளப்பட்ட ‘புது டெல்லி பிரகடனம்’, வளரும் நாடுகளான ‘குளோபல் சவுத்’ (Global South) அமைப்புகளின் நீண்டகாலக் கோரிக்கைகளுக்குப் புத்துயிர் அளித்துள்ளது. ‘பிரிக்ஸ்’ அமைப்பை வெறும் நாடுகளின் கூட்டமைப்பாக மட்டும் சுருக்கிவிடாமல், உலகளாவியச் சிக்கல்களுக்குத் தீர்வுகளை வழங்கும் ‘தீர்வுகளின் சுற்றுச்சூழல் அமைப்பு’ (Solutions Ecosystem) என்று வர்ணித்த இந்தியப் பிரதமரின் உரை, இக்கூட்டமைப்பின் புதிய பரிமாணத்தைக் காட்டுகிறது.

கடந்த காலங்களில் நிலவிய நிதிசார்ந்த சார்ந்திருப்பைக் குறைத்து, உறுப்பு நாடுகளிடையே எல்லை கடந்த வர்த்தகம், டிஜிட்டல் பொருளாதாரம், உற்பத்தி மற்றும் உள்கட்டமைப்பு மேம்பாடு ஆகியவற்றில் தற்சார்பை எட்டுவதற்கான தெளிவான வழிகாட்டலை இம்மாநாடு முன்வைத்துள்ளது.

மேலைநாடுகளின் ஆதிக்கத்தில் உள்ள உலக வங்கி மற்றும் பன்னாட்டு நிதி அமைப்புகளுக்கு (IMF) மாற்றாக, புதிய முதலீட்டுத் தளத்தை (New Investment Platform-NIP) உருவாக்குவதற்கான முதற்கட்ட ஆய்வுகள் முன்னெடுக்கப்பட்டுள்ளன. மேலும், குஜராத்திலுள்ள ‘கிஃப்ட் சிட்டி’ (GIFT City) உலக நிதி மையத்தில் ‘பிரிக்ஸ் அபாயக் கூடம்’ (BRICS Risk Lab) மற்றும் காப்பீட்டு மையத்தை அமைப்பதற்கான இந்தியாவின் முன்மொழிவு, நிதிசார் பாதுகாப்பில் ஒரு புதிய மைல்கல்லாகும்.

உலகளாவிய வர்த்தகச் சங்கிலியில் வளரும் நாடுகளின் சிறு, குறு மற்றும் நடுத்தர தொழில் நிறுவனங்களின் (MSME) நிதி நெருக்கடிகளைப் போக்க ‘ஜெய்ப்பூர் ஒருமித்த கருத்து’ (Jaipur Consensus) மூலம், கடன் மதிப்பீட்டு நடைமுறைகள் மற்றும் விலைப்பட்டியல் கண்காணிப்பு அமைப்புகளை உருவாக்க முடிவெடுக்கப்பட்டுள்ளது.

மேலும், பாலஸ்தீன மக்களின் கட்டாய இடப் பெயர்விற்குக் கடும் எதிர்ப்புத் தெரிவித்த இம்மாநாடு, காசாவில் உடனடிப் போர்நிறுத்தம், பாலஸ்தீனத்திற்கு முழுமையான ஐ.நா. உறுப்பினர் அங்கீகாரம் மற்றும் செங்கடல் மற்றும் ஹார்முஸ் நீரிணைப் பகுதிகளில் தடையற்ற உலக வர்த்தகப் போக்குவரத்து ஆகியவற்றை வலியுறுத்தி, தனது அமைதி அர்ப்பணிப்பை உலகிற்குப் பிரகடனப்படுத்தியுள்ளது.

இருப்பினும், ‘பிரிக்ஸ்’ அமைப்பு உலக அரங்கில் மிகப்பெரிய பொருளாதார ஆற்றலாக உருவெடுத்திருந்தாலும், அதன் அகக் கட்டமைப்பில் நிலவும் முரண்பாடுகளும் சவால்களும் தவிர்க்க முடியாதவை.

‘பிரிக்ஸ்’ அமைப்பின் இரு முக்கியத் தூண்களான இந்தியாவிற்கும் சீனாவிற்கும் இடையே நிலவும் எல்லைச் சிக்கல்கள் மற்றும் புவிசார் போட்டி முழுமையான நம்பிக்கையைக் கட்டியெழுப்புவதில் தாமதத்தை ஏற்படுத்துகின்றன. ஏழு ஆண்டுகளுக்குப் பிறகு சீன அதிபர் ஜி ஜின்பிங் இந்தியாவிற்கு வருகை தந்துள்ள போதிலும், இரு நாடுகளுக்கும் இடையே வெளிப்படையான முழுமையான சீரமைப்பை எட்ட இன்னும் பல படிகள் கடக்கப்பட வேண்டியுள்ளது.

புதிதாக இணைக்கப்பட்டுள்ள உறுப்பு நாடுகளிடையே நிலவும் உள்நாட்டுப் பூசல்கள், இவ்வமைப்புக்கு மற்றொரு சவாலாகும். ஈரானுக்கும் ஐக்கிய அரபு அமீரகத்திற்கும் இடையே நிலவும் அரசியல் சார்ந்த முரண்பாடுகள் தீவிரமாக இருக்கும் சூழலில், மத்திய கிழக்குப் பகுதியில் நிலவும் மோதல்கள் குறித்து ஒருமித்த வலுவான நிலைப்பாட்டை எடுப்பதில் கருத்து வேறுபாடுகள் நீடிக்கின்றன.

மேலும், அமெரிக்கா மற்றும் மேற்கத்திய நாடுகள், ‘பிரிக்ஸ்’ அமைப்பை ‘மேற்கத்திய எதிர்ப்பு அணியாகவே’ (Anti-Western Block) கருதுகின்றன. ‘பிரிக்ஸ்’ நாடுகள் தங்களுக்குள் மாற்றுப் பணப் பரிவர்த்தனை முறையை உருவாக்குவதையும், டாலருக்கு இணையான மாற்றுச் செலாவணியைக் கொண்டுவர முயல்வதையும் அமெரிக்கா உன்னிப்பாகக் கவனித்து வருகிறது. உறுப்பு நாடுகள்மீது விதிக்கப்படும் ஒருதலைப்பட்சமான பொருளாதாரத் தடைகள், உலக வர்த்தகச் சங்கிலியைப் பெரிதும் பாதிக்கின்றன.

ஐக்கிய நாடுகள் சபையின் பாதுகாப்பு கவுன்சில் (UNSC) மற்றும் உலக வர்த்தக அமைப்பு (WTO) போன்றவை காலாவதியான கட்டமைப்புடன், மேலைநாடுகளின் நலன்களை மட்டுமே பிரதிபலிப்பதாக அமைந்துள்ளன என்ற விமர்சனம் வலுத்து வருகிறது. இந்த இரட்டை நிலையைச் சுட்டிக்காட்டும் பிரிக்ஸ், ‘குளோபல் சவுத்’ எனப்படும் வளரும் மற்றும் ஏழை நாடுகளின் உண்மையான குரலாக மாறியுள்ளது.

நாணயப் பரிவர்த்தனையில் டாலரின் தனியுரிமை கொண்ட முழுமையான கட்டுப்பாட்டைக் குறைத்தல், செயற்கை நுண்ணறிவு, குவாண்டம் தொழில்நுட்பப் பகிர்வு, கடலடிக் கேபிள் டிஜிட்டல் உள்கட்டமைப்பு மற்றும் முக்கியமான கனிம வளங்களைப் பாதுகாத்தல் ஆகியவற்றில் ‘பிரிக்ஸ்’ இன்று எடுக்கும் முடிவுகள், உலகப் பொருளாதாரத்தின் திசையைத் தீர்மானிக்கும் வல்லமை பெற்றவை.

2026 ‘பிரிக்ஸ்’ உச்சி மாநாட்டின் நிறைவில் வெளியிடப்பட்ட ‘புதுடெல்லி பிரகடனம்’, உலக அரங்கில் ஒரு புதிய பன்முனை உலக ஒழுங்கமைவை (Multipolar World Order) உருவாக்க அடிக்கல் நாட்டியுள்ளது. “வெறும் விதிகளையும் நிபந்தனைகளையும் பின்பற்றும் நாடுகளாக மட்டுமே வளரும் நாடுகள் தொடர முடியாது; மாறாக, உலகளாவிய விதிகளையும் கொள்கைகளையும் வகுக்கும் முதன்மைச் சக்தியாக அவை உருவெடுக்க வேண்டும்” என்ற இந்தியப் பிரதமரின் முழக்கம் தகுந்த காலத்தில் வெளிப்பட்ட ஒன்று.

இருப்பினும், ‘பிரிக்ஸ்’ அமைப்பின் எதிர்கால வெற்றியானது, அதன் உறுப்பு நாடுகள் தங்களுக்குள் இருக்கும் இருதரப்பு முரண்பாடுகளைக் களைந்து, எட்டப்பட்ட தீர்மானங்களை எத்துணை வேகத்தில் நடைமுறைப்படுத்துகின்றன என்பதிலேயே இருக்கின்றது. ‘அதிகாரக் குவியலுக்கு மாற்றாக, சமத்துவமான உலகளாவிய சனநாயக நிர்வாகம்’ என்ற பிரிக்ஸின் இலக்கு வெல்லுமானால், அது 21-ஆம் நூற்றாண்டின் புவிசார் அரசியலில் ஒரு புதிய விடியலாக அமையும் என்பதே நம் நம்பிக்கை!

அன்புத் தோழமையில்,

அருள்முனைவர் செ. இராஜா @ இராஜசேகரன்

முதன்மை ஆசிரியர்