தமிழக செய்திகள்

பேரன்பு கொண்ட பெரியோர்களே, தாய்மார்களே, வாக்காளப் பெருமக்களே...

“தமிழ்நாட்டில் சட்டப்பேரவைக்குத் தேர்தல் நடத்தப்படுவதையொட்டி மாநிலம் முழுவதும் பல்வேறு தரப்பினருக்குப் பயிற்சி வகுப்புகள் நடத்தப்பட்டு வருகின்றன. 234 தொகுதிகளிலும் வாக்குச்சாவடி தலைமை அலுவலர்கள் மற்றும் வாக்குப்பதிவு அலுவலர்களுக்கான முதல்கட்டப் பயிற்சி கடந்த 28, 29-ஆம் தேதிகளில் நடைபெற்றது. அதில் 3,32,231 பேருக்குப் பயிற்சி அளிக்கப்பட்டது. தேர்தல் நேரத்தில் பணம், மது, போதைப்பொருள் மற்றும் இதர இலவசப் பொருள்கள் சட்டவிரோதமாகக் கொண்டு செல்வதைத் தடுக்கும் பணிகளைத் தேர்தல் கண்காணிப்புக் குழுவினர் மேற்கொண்டு வருகின்றனர். அவர்கள் இதுவரை ரூ.296.40 கோடி மதிப்பிலான ரொக்கம் மற்றும் பொருள்களைப் பறிமுதல் செய்துள்ளனர்.

திருமிகு. அர்ச்சனா பட்நாயக், தமிழ்நாடு தலைமைத் தேர்தல் அதிகாரி

“த.வெ.க. தலைவர் விஜய்யின் பிரச்சாரக் கூட்டத்திற்குச் சரியான பாதுகாப்பு வழங்காதது காவல்துறையின் பிரச்சினை. ஆனால், தி.மு.க. ஆட்சியில் ஆளுங்கட்சி மற்றும் எதிர்க்கட்சிகளுக்கு இடையே பாரபட்சத்துடன் காவல்துறை செயல்படுகிறது. எதிர்க்கட்சிகளின் பொதுக்கூட்டம், பிரச்சாரம் போன்றவற்றிக்கு நீதிமன்றத்தை அணுகி அனுமதி பெற வேண்டிய நிலை உள்ளது.”

திருமிகு. நயினார் நாகேந்திரன் தமிழ்நாடு பா.ச.க. தலைவர்

“தேர்தல் நேரத்தில் வாக்காளர்களுக்குப் பணம் கொடுப்பதும் வாங்குவதும் கடுமையான விதிமீறலாகும். ஆனால், த.வெ.க. தலைவர் விஜய் தனது கட்சியின் நிர்வாகிகள் கூட்டத்தில் பேசும்போது, ‘ரூ. 1000, ரூ. 2000, ரூ. 5000 என்று கொடுப்பார்கள்; அது உங்கள் பணம், பணத்தை வாங்கிக்கொண்டு, அவர்கள் காதில் விசிலை ஊதி அனுப்புங்கள்’ என்று பேசியுள்ளார். இது ஊடகங்களில் வெளியாகியுள்ளது. விஜய்யின் பேச்சு, தேர்தல் நடத்தை விதிகளை அப்பட்டமாக மீறியுள்ளது. இந்த விதிமீறல் தேர்தல் ஆணையத்தின் கவனத்திற்குச் செல்லாதது வியப்பளிக்கிறது. ஆணையம் அமைத்துள்ள கண்காணிப்புக் குழுக்களின் செயல்பாடுகள்மீது ஆழ்ந்த சந்தேகம் எழுகிறது. தேர்தல் நடத்தை விதிகளை மீறியுள்ள விஜய் மீது, தேர்தல் ஆணையம் தாமே முன்வந்து நடவடிக்கை எடுக்க வேண்டும்.”

திருமிகு. மு. வீரபாண்டியன், இந்தியக் கம்யூனிஸ்ட் மாநிலச் செயலர்

“தமிழ்நாட்டில் ஆட்சி அமைக்கப் பெரும்பான்மை கிடைக்கவில்லையென்றால், தேர்தலுக்குப் பிறகு த.வெ.க. தலைவர் விஜய்யுடன் பேசி தேசிய சனநாயகக் கூட்டணி ஆட்சி அமைக்கும்.”

திருமிகு. ராம்தாஸ் அதுவாலே, இந்தியக் குடியரசு கட்சியின் தேசியத் தலைவர் மற்றும் மத்திய சமூக நீதித்துறை இணை அமைச்சர்

“எதிர்க்கட்சித் தலைவர் எடப்பாடி பழனிசாமி, மீண்டும் பா.ச.க.வின் அடிமையாகி, தமிழ்நாட்டுக்குள் பிரதமர் மோடியையும் அமித்ஷாவையும் எப்படியாவது அழைத்து வரவேண்டும் என்று வேலை பார்த்துக்கொண்டிருக்கிறார். தி.மு.க. தலைவர் கூறியது போன்று இந்தத் தேர்தல் தமிழ்நாட்டிற்கும் டெல்லிக்கும் இடையே நடைபெறும் தேர்தல். நம் உரிமைகளை மீண்டும் மீட்டெடுத்துக் கொடுக்கவேண்டும். தமிழ்நாடு என்றைக்கும் டெல்லிக்கு அவுட் ஆஃப் கண்ட்ரோல் என்பதை இந்தத் தேர்தல் மூலம் மக்கள் நிரூபித்துக் காட்டவேண்டும்.”

திருமிகு. உதயநிதி ஸ்டாலின், துணை முதல்வர், தமிழ்நாடு அரசு

“நீதித்துறையில் நீதிபதிகள் அதிகம் தேவை. குறைவானவர்களே நீதிமன்றத்தை அணுகும் நிலையிலும் கூட, ஐந்து கோடிக்கும் அதிகமான வழக்குகள் தேங்கிக் கிடக்கின்றன. சாமானிய மக்களுக்கு நீதி மிகவும் அவசியம்; சாமானியர்களுக்கு நீதி கிடைக்கவில்லை என்றால், நமது அமைப்பு தோல்வி அடைந்துவிடும்.”

திருமிகு. ஆர்.வி. ஆர்லேகர், தமிழ்நாடு ஆளுநர்

“தமிழ்நாட்டைப் பொறுத்தவரை தேசியக் கட்சிகள் எந்தக் காலத்திலும் தேர்தலைத் தனித்துச் சந்திக்க வாய்ப்பு இல்லை. தேசியக் கட்சிகளுக்கு இங்கே இடமில்லை. மாநிலக் கட்சிகளின் மீது அதிகாரம் செலுத்தும் வழக்கம் காங்கிரஸ் கட்சிக்குக் கிடையாது; ஆனால், பா.ச.க.வின் நிலைப்பாடு முற்றிலும் வேறுபட்டது. மாநிலக் கட்சிகளின் அதிகாரத்தைப் பறித்து, அந்தக் கட்சிகளை அழிப்பதற்கான முயற்சிகளை மேற்கொள்வதே பா.ச.க.வின் முக்கியப் பணி.”

மாண்புமிகு இ. பெரியசாமி, தமிழ்நாடு அரசு, ஊரக வளர்ச்சித் துறை அமைச்சர்

“நினைத்த காரியம் நிறைவேற இலட்சியம்வேண்டும்; வாழ்க்கையில் பெரிய நோக்கம் இருக்கவேண்டும்; இலஞ்சத்தை ஒழிக்கவும் ஏற்றத்தாழ்வுகளைச் சரிசெய்யவும் ஐ.ஏ.எஸ். ஆகவேண்டும் என்ற இலட்சியம் இருக்கவேண்டும். குறைந்த வயதில் உயர்ந்த பதவியில் அமர குடிமைப் பணித் தேர்வு வாய்ப்பு அளிக்கிறது. ஐ.ஏ.எஸ். என்பது பதவி அல்ல; பொறுப்பு. பொறுப்பை உணர்ந்து கடமையைச் செய்யவேண்டும். இத்தகைய பொறுப்பான பணியில், பல்வேறு அனுபவங்கள் கிடைக்கும். சவால்கள், சட்டப் பிரச்சினைகளைச் சமாளிக்கும் திறமை கிடைக்கும். நான்கு பேருக்கு உதவி செய்தோம் என்ற மகிழ்ச்சி கிடைக்கும். மக்களுக்கு உதவி செய்ய அரசு ஊதியம் தருகிறது.”

திருமிகு செ. சைலேந்திரபாபு ஐ.பி.எஸ்., தமிழ்நாடு மேனாள் டி.ஜி.பி.

பேரன்பு கொண்ட பெரியோர்களே, தாய்மார்களே, வாக்காளப் பெருமக்களே...

“தமிழ்நாட்டில் உள்ள 234 சட்டப்பேரவைத் தொகுதிகளுக்கும் 136 பொதுப் பார்வையாளர்கள், 40 காவல் பார்வையாளர்கள், 151 செலவினப் பார்வையாளர்களை இந்தியத் தேர்தல் ஆணையம் நியமித்துள்ளது. பொதுமக்கள், அரசியல் கட்சியினர், வேட்பாளர்கள் தேர்தல் தொடர்பான புகார்களைப் பதிவு செய்யவும் அல்லது விதிமீறல்கள் தொடர்பாகப் புகார் அளிக்கவும் ஏதுவாக மத்திய பார்வையாளர்களின் தொடர்பு எண் உள்ளிட்ட விவரங்கள் அந்தந்த மாவட்டத் தேர்தல் அலுவலர்கள் மூலம் பொதுமக்கள் அறிந்துகொள்ளும் வகையில் பகிரப்பட்டுள்ளது. தேர்தல் செலவினக் கண்காணிப்பை உறுதி செய்யும் வகையில் மாநிலம் முழுவதும் கண்காணிப்பு மற்றும் அமலாக்கக் குழுக்கள் தீவிரப் பணியில் ஈடுபடுத்தப்பட்டுள்ளன.\"

திருமிகு. அர்ச்சனா பட்நாயக், தமிழ்நாடு தலைமைத் தேர்தல் அதிகாரி

தமிழ்நாடு பொதுநிலையினர் பணிக்குழு சார்பில், இரண்டாம் வத்திக்கான் சங்கத்தின் வைர விழா, புனித தேவசகாயம் பொதுநிலையினரின் பாதுகாவலராக அறிவிக்கப்பட்ட நிகழ்வு மற்றும் மாநில அளவிலான கருத்தரங்கு ஆகிய முப்பெரும் விழாக்கள் மார்ச் 20, 21 ஆகிய தேதிகளில் வேளாங்கண்ணி தியான மையத்தில் சிறப்பாக நடைபெற்றன. தமிழ்நாட்டின் 18 மறைமாவட்டங்களிலிருந்தும் சுமார் 400 பேர் கலந்துகொண்டனர். பணிக்குழுவின் தலைவர் ஆயர் மேதகு சகாயராஜ் தலைமையில் தொடங்கிய இவ்விழாவில், பல்வேறு துறைகளில் சாதனை படைத்த 18 சிறந்த பொதுநிலையினருக்கு விருதுகள் வழங்கிச் சிறப்பிக்கப்பட்டன. புனித தேவசகாயத்தின் ஆன்மிகம், பொதுநிலையினரின் அதிகாரம் மற்றும் இந்திய அரசமைப்புச் சட்டம் குறித்த விழிப்புணர்வு அமர்வுகள் நடத்தப்பட்டன. ஆயர் மேதகு நீதிநாதன் தலைமையில் நடைபெற்ற திருப்பலியில் புனித தேவசகாயத்தின் தமிழ் மன்றாட்டு அட்டை வெளியிடப்பட்டது. பொதுநிலையினர் திரு அவையிலும் சமூகத்திலும் சாட்சிகளாக வாழவேண்டும் என வலியுறுத்தப்பட்டது. பங்கேற்பாளர் அனைவருக்கும் வத்திக்கான் சங்க ஆவணங்களின் தொகுப்பு வழங்கப்பட்டது. பணிக்குழுச் செயலர் அருள்தந்தை மரிய மைக்கேல் இதற்கான ஏற்பாடுகளைச் செய்திருந்தார்.

தமிழ்நாடு திருவிவிலிய அருள்பணிக்குழு சார்பில், ஆண்டுதோறும் நடத்தப்படும் கோடைக்கால விவிலியப் பட்டயப் படிப்பு வரும் மே மாதம் நடைபெற உள்ளது. திண்டிவனம் தமிழக முப்பணி மையத்தில் (TNBCLC) மே 6 முதல் மே 10 வரை இந்தப் பயிற்சி வகுப்புகள் நடைபெறும். “அவர் பெருக வேண்டும்” (யோவான் 3:30) என்ற இறைவார்த்தையைத் தாரக மந்திரமாகக் கொண்டு நடைபெறும் இக்கல்வியாண்டில் (Cycle-A), பழைய ஏற்பாட்டின் ஐந்நூல்கள் மற்றும் வரலாற்று நூல்கள் குறித்த ஆழமான பாடங்கள் கற்பிக்கப்பட உள்ளன. தூத்துக்குடி ஆயர் மேதகு ஸ்டீபன், அருள்முனைவர் ரெய்மண்ட் ஜோசப் மற்றும் முப்பணி மையப் பேராசிரியர்கள் இப்பயிற்சியை வழங்குகின்றனர். மூன்று ஆண்டுகள் தொடர்ந்து பங்கேற்பவர்களுக்கு விவிலியப் பட்டயச் சான்றிதழ் வழங்கப்படும். இப்பயிற்சியில் தங்குமிடம், உணவு மற்றும் பாடக்குறிப்புகள் உள்ளிட்டவற்றிற்கான கட்டணமாக ரூபாய் 3000/- நிர்ணயிக்கப்பட்டுள்ளது. பொதுநிலையினர், துறவியர் மற்றும் அருள்பணியாளர்கள் ஏப்ரல் 30-ஆம் தேதிக்குள் விண்ணப்பிக்கக் கேட்டுக்கொள்ளப்படுகிறார்கள்.

தொடர்புக்கு: 9751891725 /  tnbcbc1974@gmail.com