தமிழக செய்திகள்

சமுதாய நலனுக்காகத் தன்னார்வத்துடன் தொண்டாற்றும் இளையோரை ஊக்குவிக்கும் வகையில் ஒவ்வோர் ஆண்டும் சுதந்திர தினத்தன்று 15 முதல் 35 வயதிற்குட்பட்ட தலா 3 ஆண், 3 மகளிருக்கு ‘முதலமைச்சர் மாநில இளைஞர் விருது’ வழங்கப்பட்டு வருகிறது. இவ்விருதுடன் ரூ.1 இலட்சம் ரொக்கமும், பாராட்டுப் பத்திரமும் பதக்கமும் வழங்கப்படும். அந்த வகையில், 2026-ஆம் ஆண்டுக்கான விருதுகள் வரும் ஆகஸ்டு 15-ஆம் தேதி நடைபெறும் சுதந்திர தின விழாவில் வழங்கப்பட உள்ளன.

விண்ணப்பதாரர்கள் 15 முதல் 35 வயதிற்குட்பட்டவராகவும், தமிழ்நாட்டில் ஐந்து ஆண்டுகள் குடியிருந்தவராகவும், சமுதாய நலனுக்காகத் தன்னார்வத்துடன் தொண்டாற்றியவராகவும் இருக்கவேண்டும். கடந்த நிதியாண்டில் மேற்கொள்ளப்பட்ட சமூகச் சேவைகள் மட்டுமே விருதிற்குக் கருத்தில் கொள்ளப்படும். மத்திய - மாநில அரசுகள், பொதுத்துறை நிறுவனங்கள், பள்ளி, கல்லூரிகளில் பணியாற்றுபவர்கள் விண்ணப்பிக்க இயலாது.

கூடுதல் விவரங்களுக்கு...

தகுதியுள்ள நபர்கள் பிறப்புச் சான்று, அடையாள அட்டை நகல், இருப்பிடச் சான்று, காவல்துறையிடமிருந்து பெறப்படும் தடையின்மை சான்று மற்றும் சமூகப் பணிகள் செய்ததற்கான ஆதாரங்கள் போன்றவற்றுடன் www.sdat.tn.gov.in என்ற இணையதளத்தில் ஜூலை 6-ஆம் தேதிக்குள் விண்ணப்பிக்கவேண்டும். பின் தங்களது சாதனை பற்றிய பத்திரிகைச் செய்திகள் மற்றும் சான்றிதழ்களை மூன்று புத்தகங்களாகத் தயார்செய்து, மாவட்ட விளையாட்டு அலுவலரிடம் சமர்ப்பிக்கவேண்டும். கூடுதல் விவரங்களுக்கு 74017 03480 என்ற எண்ணைத் தொடர்புகொள்ளலாம்.

“நாட்டின் மதிப்புமிக்க அரசியல் தலைவராக வாழ்ந்து மறைந்த மேனாள் முதல்வர் கருணாநிதியின் கண்ணியத்தைச் சிதைத்து, அவமதிக்கும் முறையில் செயற்கை நுண்ணறிவு தொழில்நுட்பத்தைப் பயன்படுத்தி, அவரது உருவப்படத்தை மிக மோசமாகச் சித்தரித்து சமூக ஊடகங்களில் பதிவிடப்பட்டுள்ளது. இந்த அநாகரிகமான பதிவைக் கண்டவர்கள் எவரும் கண்டனம் தெரிவிக்காமல் இருக்கமுடியாது. அறிவியல் தொழில்நுட்பத்தின் நிகழ்கால உச்சமாக வளர்ந்திருப்பது செயற்கை நுண்ணறிவு தொழில்நுட்பமாகும். இதனால் ஏற்படும் எதிர்மறை விளைவுகளைத் தடுப்பது எப்படி? என்ற வினாவிற்கு விடைதேடி, உலக நாடுகளும் அறிஞர்களும் விவாதித்து வருகின்றனர். அநாகரிகமான குற்றங்கள் நேரும்போது, சமூகம் ஒட்டுமொத்தமாக இணைந்து கண்டிக்கவேண்டும்.”

திருமிகு. மு. வீரபாண்டியன், இந்தியக் கம்யூனிஸ்ட் கட்சிப் பொதுச் செயலர்

“99 ஆண்டுகளுக்கு முன்பு ஆங்கிலேயர் காலத்தில் நடைபெற்ற சாதிவாரி கணக்கெடுப்பு தரவுகளை வைத்துதான் இட ஒதுக்கீட்டை அரசு வழங்கி வருகிறது. இந்தப் பழைய தரவுகள் போதுமானதாக இல்லை. இதை உச்ச நீதிமன்றமும் உயர் நீதிமன்றங்களும் ஏற்கவில்லை. எனவே, தமிழ்நாட்டில் புதிதாகச் சாதிவாரிக் கணக்கெடுப்பை உடனடியாக நடத்தவேண்டும். சாதிவாரிக் கணக்கெடுப்பை மாநில அரசு நடத்தினால்தான் தமிழ்நாட்டில் உள்ள இரண்டே கால் கோடி குடும்பங்களின் சமூக, பொருளாதார, கல்வி குறித்த துல்லியமான நிலையைக் கண்டறியலாம்.”

திருமிகு. அன்புமணி,  பா.ம.க. தலைவர்

“தமிழ்நாட்டில் நிகழும் சாதி ஆணவப் படுகொலைகளைத் தடுக்கத் தனி சிறப்புச்சட்டம் கொண்டுவர வேண்டியது அவசியம். பழங்குடியினருக்கு மேற்கொள்ளப்பட்ட சமூக - பொருளாதாரக் கணக்கெடுப்பைப்போல, ஆதிதிராவிடர் மக்களுக்கும் கணக்கெடுப்பு நடத்தவேண்டும். சாதிவாரிக் கணக்கெடுப்பு நடத்தவேண்டும்.”

திருமிகு. வன்னியரசு, சமூக நீதித்துறை அமைச்சர்

“உயர் சிறப்பு மருத்துவ இடங்களைப் பாதுகாக்க உச்ச நீதிமன்ற அரசியல் சாசன அமர்வை அரசு அணுகவேண்டும். தமிழ்நாட்டின் இடங்கள் பறிபோனால், இங்கு நோயாளிகளுக்கு உயர் சிறப்புச் சிகிச்சையளிக்கப் போதிய மருத்துவர்கள் இருக்க மாட்டார்கள். 50% ஒதுக்கீட்டின் கீழ் இடங்கள் பெறும் மருத்துவர்கள், தங்களது பணி ஓய்வுக் காலம்வரை அரசுப் பணியில் தொடர்வோம் என ஒப்பந்தம் (பாண்ட்) மேற்கொள்கின்றனர். இது மாநிலத்தின் பொது சுகாதாரக் கட்டமைப்பை வலுப்படுத்துவதோடு, அரசு மருத்துவமனைகளில் உயர் சிறப்புச் சிகிச்சைகள் கிடைப்பதையும் உறுதிசெய்கிறது. கடந்த சில ஆண்டுகளாக அரசு மருத்துவக் கல்லூரிகளில் புதிய பணியிடங்களை உருவாக்காததால், மருத்துவர்கள் உயர் சிறப்புப் படிப்புகளில் சேர ஆர்வம் காட்டுவதில்லை. அதன் காரணமாகவே கலந்தாய்வில் இடங்கள் முழுமையாக நிரம்புவதில்லை.”

அரசு மருத்துவர் சங்கம்

“தமிழ்நாட்டின் வனப் பகுதிகளுக்குள் குறிப்பாக, மேகமலை வனவிலங்கு சரணாலயத்திற்குள்ளும், பொதுவாக அகத்தியமலை உயிர்க் கோளத்திற்குள்ளும் சட்டவிரோத உள்கட்டமைப்புப் பணிகளை அனுமதித்த அனைத்து அலுவலர்கள், அதிகாரிகள் மற்றும் துறைத் தலைவர்கள் மீது கடுமையான ஒழுங்கு நடவடிக்கை, தண்டனை மற்றும் குற்றவியல் நடவடிக்கை எடுக்கப்படவேண்டும். வனப் பகுதிகளுக்குள் அமைந்துள்ள அனைத்து அரசு நிறுவனங்கள் மற்றும் அங்கீகரிக்கப்படாத உள்கட்டமைப்புகள் ஆறு மாதங்களுக்குள் அகற்றப்படவேண்டும். நீதிமன்ற அறிவுறுத்தல்கள் பின்பற்றப்படுவதை தமிழ்நாடு அரசு உறுதி செய்யத் தவறினால், ஆக்கிரமிப்புகளை அகற்றும் பணியை மேற்கொள்வதற்கு உதவுவதற்காகத் துணை இராணுவப் படைகளை நிலைநிறுத்த சி.இ.சி. பரிந்துரைக்கலாம்.”

உச்ச நீதிமன்ற நீதிபதிகள் விக்ரம் நாத், சந்தீப் மேத்தா ஆகியோர் அடங்கிய அமர்வு

“தேர்தலில் 60 ஆண்டுகளாக இருந்த சாதி, மதம், காசு கொடுத்து வாக்கு வாங்குவதை உடைத்துள்ளோம். த.வெ.க. ஆட்சி பாகுபாடின்றி அனைவருக்குமான ஆட்சியாக இருக்கும். மதச்சார்பற்ற கொள்கையில் எந்தவித சமரசமும் கிடையாது. மாநிலத்தின் உரிமைகளை விட்டுத் தரமாட்டோம். நதிநீர் உரிமைகளை, சமூக நீதி, சமத்துவ நீதியை விட்டுக்கொடுக்க மாட்டோம். ஊழலற்ற, இலஞ்சமற்ற ஆட்சியைக் கொடுப்பேன். ஒரே நாளில் நடக்காதுதான். ஒரு நாள் அதை நடக்க வைப்பேன்.”

திருமிகு. ஜோசப் விஜய், முதல்வர், தமிழ்நாடு அரசு

தமிழ்நாடு செய்தி மக்கள் தொடர்புத் துறையில் 23 இளநிலை புகைப்படக் கலைஞர்கள் உள்பட பல்வேறு துறைகளில் காலியாக உள்ள 461 பணியிடங்களுக்கு மே 27 முதல் விண்ணப்பிக்கலாம் என்று தமிழ்நாடு அரசுப் பணியாளர் தேர்வாணையம் (டி.என்.பி.எஸ்.சி.) தெரிவித்துள்ளது.

தமிழ்நாடு அரசுப் பணியாளர் தேர்வாணையம் சார்பில், ஒருங்கிணைந்த தொழில்நுட்பப் பணிகள் தேர்வுக்கான (நேர்முகத் தேர்வு அல்லாத பதவிகள்) அறிவிப்பு வெளியிடப்பட்டு உள்ளது. இதன்படி, வேளாண் பொறியியல் துறை, நெடுஞ்சாலைத் துறை, பொதுப்பணித் துறை, ஊரக வளர்ச்சி மற்றும் பஞ்சாயத்துராஜ் துறை, தொல்லியல்துறை, சுற்றுலாத்துறை, குடும்ப நலத்துறை உள்பட பல்வேறு துறைகளில் 45 பதவிகள் காலியாக உள்ளன. மொத்தம் 461 பணியிடங்களை நிரப்புவதற்கான தேர்வு நடைபெறுவதாகத் தெரிவிக்கப்பட்டுள்ளது. இந்தப் பணியிடங்களுக்கு மே 27 முதல் ஜூன் 25 வரை இணையதளம் மூலம் விண்ணப்பிக்கலாம். ஆன்லைன் விண்ணப்பங்களை ஜூன் 29 முதல் ஜூலை 1 வரை திருத்திக்கொள்ள அவகாசம் அளிக்கப்பட்டுள்ளது. தேர்வு தேதி பின்னர் அறிவிக்கப்படும்.

25 இளநிலை புகைப்படக் கலைஞர் பணி

தமிழ்நாடு அரசின் தமிழ் வளர்ச்சி மற்றும் செய்தி மக்கள் தொடர்புத் துறையில் காலியாக உள்ள 23 இளநிலை புகைப்படக் கலைஞர் பணிக்கான ஆள்களைத் தேர்வு செய்வதற்கான அறிவிப்பும் வெளியிடப்பட்டுள்ளது. இந்தப் பணிக்கு எழுத்துத் தேர்வு மட்டுமே நடைபெறும்; நேர்காணல் கிடையாது. எழுத்துத் தேர்வில் தமிழ் தகுதித் தேர்வு மற்றும் துறை சார்ந்த பாடங்கள் இடம்பெறும். அங்கீகரிக்கப்பட்ட நிறுவனத்தில் விஷூவல் கம்யூனிகேஷன் இளநிலைப் பட்டம் பெற்றவர்கள் இந்தப் பணிக்கு விண்ணப்பிக்கலாம் என்று தமிழ்நாடு அரசுப் பணியாளர் தேர்வாணையம் தெரிவித்துள்ளது.

“பெரும்பான்மை இல்லாத நிலையில் தி.மு.க. கூட்டணிக் கட்சித் தலைவர்களிடம் ஆதரவு கேட்பது, நம்பிக்கை வாக்கெடுப்பில் அ.தி.மு.க.வின் ஓர் அணியிடம் ஆதரவாக வாக்களிக்க விலைபேசுவது, அ.ம.மு.க. உறுப்பினரையும் கொசுறு வாங்குவது, அ.தி.மு.க. உறுப்பினர்கள் சிலரைப் பதவி விலகச் செய்து தலைமைச் செயலகத்தில் வைத்தே தன் கட்சியில் இணைப்பது. இதைப் பார்க்கத்தான் மக்கள் உங்களுக்கு (த.வெ.க.) வாக்களித்தார்களா? தேசிய சனநாயகக் கூட்டணியின் ஆதரவைக் கோராமல் இருந்தால் மட்டுமே ஆதரவு எனச் சொல்லிக் கடிதம் அளித்துவிட்டு, இப்போது நடக்கும் காட்சிகளை அமைச்சரவையில் இருந்து இரசித்து விசிலடிக்கும் காங்கிரசின் போலி பா.ச.க. எதிர்ப்பும் பல்லிளிக்கிறது.”

திருமிகு. மு.க.ஸ்டாலின், தி.மு.க. தலைவர்

“தூய சக்தி’ என்று அறிவித்துக் கொண்டவர்களுக்கு மக்களின் முழு ஆதரவு கிடைக்காததால், ஆட்சியைக் காப்பாற்ற பல்வேறு வேலைகளில் ஈடுபட்டு வருவது மிக மோசமான செயலாகும். தமிழ்நாட்டு அரசியல் வரலாற்றிலேயே இல்லாத வகையில் மோசமான ஒரு குதிரைப்பேர அரசியலை நடத்தி, சிறுபான்மை ஆட்சியைக் காப்பாற்றிக்கொள்ள முயற்சிக்கின்றனர். அ.தி.மு.க. எம்.எல்.ஏ.க்கள் சிலரைத் திரைப்படப் பாணியில், ‘கவனித்து’ ஆதரவு பெற்றது ஒரு நேர்மையான அரசியல்வாதியின் செயலா? அ.தி.மு.க. உண்மைத் தொண்டர்களின் உழைப்பால் வெற்றி பெற்றவர்கள் தலைமைச் செயலகத்தின் கீழ்த்தளத்தில் சட்டப்பேரவைத் தலைவரிடம் இராஜினாமா கடிதம் கொடுத்துவிட்டு, அடுத்த பத்து நிமிடத்தில் முதல் மாடியில் உள்ள த.வெ.க. அமைச்சரின் அறையில் அவர்களுடைய கைகளில் கட்சி உறுப்பினர் அட்டை வழங்குவது குதிரைப்பேரத்தை அம்பலப்படுத்தி உள்ளது.”

திருமிகு. எடப்பாடி பழனிசாமி, அ.தி.மு.க. பொதுச்செயலர்

“அடுத்தவர்களின் முதுகில் ஏறிப் பயணம் செய்துதான் வாழமுடியும் என்று செயல்படும் த.வெ.க.வுக்குத் தமிழ்நாட்டு மக்கள் விரைவில் பாடம் புகட்டுவார்கள். த.வெ.க.வில் இணைந்த மூவரும் எதையும் எதிர்பார்க்காமல் இணைந்திருக்க வாய்ப்பில்லை. அந்தத் தொகுதிகளில் நடைபெறவுள்ள இடைத்தேர்தல்களில் போட்டியிட வாய்ப்பு, அதில் வெற்றிபெற்ற பின் ஆளுங்கட்சி உறுப்பினராக இருப்பதால் கிடைக்கும் பயன்கள் ஆகியவற்றைக் கருத்தில் கொண்டுதான் சேர்ந்துள்ளனர். இதை அனுமதிப்பது எந்த வகையில் தூய அரசியல்? வாக்களித்த மக்களின் தீர்ப்பை அவமதித்து விட்டுப் பதவி சுகத்திற்காக மற்றொரு கட்சியில் சேர்வது மக்கள் தீர்ப்பிற்கும், சனநாயகத்திற்கும் எதிரானது. நேர்மையான அரசியலில் முதல்வர் ஜோசப் விஜய்க்கு நம்பிக்கையிருந்தால் அவர்களைக் கட்சியிலிருந்து நீக்கவேண்டும் அல்லது இடைத்தேர்தலில் போட்டியிட வாய்ப்பு வழங்கக்கூடாது.”

திருமிகு. அன்புமணி, பா.ம.க. தலைவர்

“முதல்வர் பதவியேற்பு விழாவில் தமிழ்த்தாய் வாழ்த்து மூன்றாம் இடத்திற்குத் தள்ளப்பட்டிருப்பதைப் பார்த்து, தமிழ் உணர்வாளர்களின் நெஞ்சு கொதிக்கிறது. இதுபோன்ற அவலங்கள் மீண்டும் தொடராது இருக்க, முதல்வர் வழிவகை காணவேண்டும்.”

திரு. கி. வீரமணி, தி.க.தலைவர்

“மாற்றம் என்று கூறிக்கொண்டு தமிழுக்கு முக்கியத்துவம் தராமல் இருப்பது அழிவுப் பாதைக்குக் கொண்டு செல்லும். மேனாள் முதல்வர்கள் எம்.ஜி.ஆர், செயலலிதா, கருணாநிதி காலத்திலும்கூட இவ்வாறான செயல் நடைபெறவில்லை. தற்போதைய ஆட்சியின் மூலம் தமிழ்மொழி பின்னுக்குத் தள்ளப்பட்டு, தமிழ்த்தாய் வாழ்த்து போன்று தமிழ்நாடும் மூன்றாம் இடத்திற்குத் தள்ளப்படும்.”

திரு. R.S. பாரதி, தி.மு.க. அமைப்புச் செயலாளர்

“பதவியேற்பு விழாவில் நீண்டகால மரபு மீறப்பட்டுள்ளது அதிர்ச்சி அளிக்கிறது. ‘வந்தே மாதரம்’ பாடலை முதலாவதாகவும், தேசிய கீதத்தை இரண்டாவதாகவும் இசைத்த பின்னரே தமிழ்த்தாய் வாழ்த்துப் பாடப்பட்டுள்ளது. இது அதிகாரிகளின் கவனக் குறைவா அல்லது ஆளுநரை மகிழ்விக்கச் செய்யப்பட்டதா என்பதற்கு முதல்வர் விளக்கமளிக்கவேண்டும்.”

திரு.  தொல். திருமாவளவன் வி.சி.க. தலைவர்

“முதல்வர் பதவியேற்பு நிகழ்வில் ‘வந்தே மாதரம்’ பாடலுக்கு முதலிடம் வழங்கி, தமிழ்த்தாய் வாழ்த்துப் பாடலை மூன்றாம் நிலையில் வைத்தது மரபு மீறிய செயலாகும். இந்தத் தவறு மீண்டும் தொடரக்கூடாது.”

திரு. இராமதாஸ், பா.ம.க. நிறுவனர்

“முதல்வர் பதவியேற்பு விழாவில் தமிழ்த்தாய் வாழ்த்துப் பாடல் மூன்றாவதாக இசைக்கப்பட்டதில் த.வெ.க. தலைமையில் அமைந்துள்ள தமிழ்நாடு அரசிற்கும் உடன்பாடு இல்லை. தாய்த் தமிழ்நாட்டில் அரசு விழாக்களில் தமிழ்த்தாய் வாழ்த்தை முதலாவதாகப் பாடுவது என்பது நீண்டகால மரபு. நாங்கள் இது தொடர்பாக ஆளுநர் தரப்பிடம் வலியுறுத்தியபோது ஒன்றிய அரசின் புதிய சுற்றறிக்கைப்படி செயல்பட வேண்டிய பொறுப்பு ஆளுநருக்கு இருப்பதாகத் தெரிவிக்கப்பட்டது. தவிர்க்க முடியாத சூழலில், தமிழ்த்தாய் வாழ்த்துப்பாடல் மூன்றாவதாக ஒலிக்கப்பட்டது. இனிவரும் காலங்களில் இந்தப் புதிய நடைமுறை பின்பற்றப்படாது.”

திரு. ஆதவ் அர்ஜூனா, அமைச்சர்