உலக செய்திகள்

ஸ்பெயின் நாட்டிற்குத் திருத்தூதுப் பயணம் மேற்கொண்டுள்ள திருத்தந்தை லியோ, அந்நாட்டு நாடாளுமன்றத்தில் வரலாற்றுச் சிறப்புமிக்க உரையை நிகழ்த்தினார். நாடாளுமன்றத்தில் திருத்தந்தை ஒருவர் உரையாற்றியது இதுவே முதல்முறையாகும். திருத்தந்தை தனது உரையில், “ஓர் உண்மையான சனநாயகச் சமூகம் என்பது சிந்தனை, மனச்சான்று மற்றும் மதச் சுதந்திரத்தை மதிக்கவேண்டும். மனித மாண்பு என்பது தற்காலிக அரசியல் பெரும்பான்மைகளுக்கு உட்பட்டது அல்ல” என்று அழுத்தமாகப் பதிவு செய்தார். மேலும், கருத்தரிப்பு முதல் இயற்கை மரணம் வரை அனைத்து மனித உயிர்களும் ‘தூக்கி எறியும் கலாச்சாரத்திலிருந்து’ பாதுகாக்கப்படவேண்டும் என்றும், விளிம்புநிலை மக்களை அரவணைப்பதில்தான் ஒரு தேசத்தின் பெருமை அடங்கியுள்ளது என்றும் அவர் குறிப்பிட்டார். புலம்பெயர்வோரின் துயரங்கள் குறித்துப் பேசிய அவர், எந்தவொரு நாடும் இந்தச் சவாலைத் தனித்து எதிர்கொள்ள முடியாது என்பதால், உலகளவில் ஒருங்கிணைந்த மனிதநேய நடவடிக்கை அவசியம் என்றார். தொடர்ந்து, குடும்பங்களின் சமூகக் கட்டமைப்பை வலுப்படுத்த வேண்டியதன் அவசியத்தையும், போர் என்பது மனிதகுலத்தின் கூட்டுத் தோல்வி என்பதையும் சுட்டிக்காட்டினார்.

ஸ்பெயின் நாட்டிற்குத் திருத்தூதுப் பயணம் மேற்கொண்டுள்ள திருத்தந்தை லியோ, தனது பயணத்தின் இரண்டாம் கட்டமாகப் பார்சிலோனா நகரை வந்தடைந்தார். அங்குள்ள புகழ்பெற்ற ‘திருச்சிலுவை மற்றும் புனித யுலாலியா’ பேராலயத்தில் நடைபெற்ற நண்பகல் வழிபாட்டிற்கு அவர் தலைமை தாங்கினார். அங்குக் கூடியிருந்த ஆயர்கள், துறவியர் மற்றும் ஏராளமான இளைஞரிடையே உரையாற்றிய திருத்தந்தை திரு அவையை ‘மணமகள்’ மற்றும் ‘கிறிஸ்துவின் உடல்’ ஆகிய இரு திருவிவிலிய உருவகங்களோடு ஒப்பிட்டுப் பேசினார். மேலும், “திரு அவை என்பது இறைவனின் அன்பால் உருவானது. ஓர் உடலில் உள்ள பல்வேறு உறுப்புகளைப் போல நாம் பன்முகத்தன்மை கொண்டவர்களாக இருந்தாலும், தூய ஆவியானவரால் ஒன்றிணைக்கப்பட்டுள்ளோம். போர்களாலும் பிரிவினைகளாலும் சிதைந்து போயிருக்கும் இவ்வுலகிலும், தனி மனிதவாதம் பெருகிவரும் தற்காலச் சமூகத்திலும், கிறித்தவர்கள் அனைவரும் ஒருங்கிணைவு, வரவேற்பு, நல்லிணக்கம் மற்றும் அமைதியின் இறைவாக்கினர்களாகவும் சாட்சிகளாகவும் திகழவேண்டும். தியாகங்களைச் செய்வதன் வாயிலாக இந்த ஒன்றிப்பைக் கட்டியெழுப்பவேண்டும்” என்று வேண்டுகோள் விடுத்தார்.

ஐரோப்பியக் கத்தோலிக்க ஸ்கவுட் மற்றும் கைட்ஸ் (Scouts and Guides) இயக்கத்தின் 50-ஆம் ஆண்டு பொன்விழாவை முன்னிட்டு, அதன் உறுப்பினர்களை வத்திக்கானில் சந்தித்த திருத்தந்தை 14-ஆம் லியோ, நற்செய்தியைத் தங்களின் வாழ்வின் வழிகாட்டியாகக் (Navigator) கொள்ள இளையோருக்கு அழைப்பு விடுத்துள்ளார். “இயற்கை எனும் புத்தகத்தை இறைவார்த்தையோடு இணைத்துப் படியுங்கள்” என்று குறிப்பிட்ட திருத்தந்தை, “நற்செய்தி என்பது வெறும் புத்தகம் அல்ல; மாறாக, அது சவால்களால் சோர்ந்து போயிருக்கும் மனிதகுலத்திற்கு, நீதி மற்றும் உண்மையைத் தரும் கிறிஸ்துவோடு ஏற்படும் நேரடிச் சந்திப்பாகும்” என்றார். இவ்வியக்கத்தின் கல்விப்பணி மற்றும் சேவை மனப்பான்மையைப் பாராட்டிய அவர், பிரதிபலன் பாராத சேவையே சுயநலத்திலிருந்து மனிதனை விடுவித்துச் சமூகப் பொறுப்பை வளர்க்கும் என்றார். தலைவர்களின் முன்மாதிரியான வாழ்வும், ஆன்மிக உதவியாளர்களாகச் செயல்படும் அருள்பணியாளர்களின் பணியும் இளையோரின் நம்பிக்கை வளர்ச்சிக்கு முக்கியம் என்று குறிப்பிட்ட திருத்தந்தை, வணிக நோக்கிலான ஐரோப்பாவாக இல்லாமல், கத்தோலிக்க விழுமியங்களை உள்ளடக்கிய மக்களுக்கான ஐரோப்பாவைக் கட்டமைக்க உழைக்குமாறு கேட்டுக்கொண்டார்.

உலகத் தலைவர்கள் நீதியான மற்றும் நிலையான அமைதியை நோக்கிச் செல்லத் தேவையான ஞானத்தை இறைவன் வழங்கவேண்டும் என்று திருத்தந்தை 14-ஆம் லியோ வேண்டினார். வத்திக்கான் புனித பேதுரு சதுக்கத்தில் நடைபெற்ற ‘ஆஞ்சலூஸ்’ (Angelus) செபத்தின்போது, போரினால் பாதிக்கப்பட்டுள்ள மக்களுக்காகத் திருத்தந்தை உருக்கமாக வேண்டினார். “மே மாதம் முழுவதும் திரு அவை அமைதிக்காக ஒன்றிணைந்து செபித்துள்ளது. அதிகாரத்தில் உள்ளவர்களின் மனச்சாட் சியை இறைஞானம் ஒளிர்விக்கட்டும்; அவர்கள் நேர்மையான முறையில் அமைதியைத் தேடும் முடிவுகளை எடுக்க மரியாவின் பரிந்துரை உதவட்டும்” என்று குறிப்பிட்டார். இத்தாலியில் கடைப்பிடிக்கப்படும் ‘நிவாரண தினத்தை’ முன்னிட்டு நோயாளிகளுக்கும், அவர்களைப் பராமரிப்பவர்களுக்கும் தனது ஆதரவைத் தெரிவித்தார். உடல் மற்றும் மனரீதியான வலிகளைக் குறைக்கும் ‘பராமரிப்புக் கலாச்சாரத்தை’ (Culture of Care) வளர்க்க வேண்டியதன் அவசியத்தை அவர் வலியுறுத்தினார்.

காசா பகுதியில் நிலவும் கடும் துயரங்களைக் களைய உலகளாவிய சமூகம் முன்வரவேண்டும் என்றும், போர்க் களங்களில் மனித உயிர்களைப் பொருட்படுத்தாத செயற்கை நுண்ணறிவு (AI) தொழில்நுட்பத்தைப் பயன்படுத்துவதைத் தவிர்க்கவேண்டும் என்றும் திருத்தந்தை 14-ஆம் லியோ வலியுறுத்தியுள்ளார்.

செய்தியாளர்களைச் சந்தித்த திருத்தந்தை, “காசா மக்கள் மனிதாபிமான உதவிகள் கிடைக்காமல் பெரும் அவதிக்குள்ளாகி வருகின்றனர். அங்கே மீண்டும் மறுகட்டமைப்புப் பணிகளைத் தொடங்க அனைத்து அதிகாரிகளும் உதவ வேண்டும்” என உருக்கமான வேண்டுகோள் விடுத்தார். காசா நோக்கிச் சென்ற அமைதி ஆர்வலர்கள் மீதான வன்முறையைக் கண்டித்த திருத்தந்தை, வன்முறை வெறுப்பையே வளர்க்கும் என்றும், பேச்சுவார்த்தை மூலம் மட்டுமே தீர்வுகளைக் காண முடியும் என்றும் குறிப்பிட்டார்.

நவீன போர்களில் ஏ.ஐ. தொழில்நுட்பம் பயன்படுத்தப்படுவதைச் சுட்டிக்காட்டிய அவர், மனித மதிப்பற்ற ‘தொழில்நுட்ப ஆதிக்கத்திற்கு’ எதிராக ‘ஆயுதமற்ற செயற்கை நுண்ணறிவு’ எனும் கருத்தாக்கத்தை முன்வைத்தார். இது தொடர்பாக ‘ஆந்த்ரோபிக்’ போன்ற முன்னணி ஏ.ஐ. நிறுவனங்களுடன் வத்திக்கான் ஆலோசனைகளைத் தொடங்கி இருப்பதாகவும், தொழில்நுட்பம் மனித மாண்பைச் சிதைக்காத வகையில் இருப்பதை உறுதிசெய்ய உரையாடல் தொடரும் என்றும் அவர் உறுதியளித்தார்.

உக்ரைன் மற்றும் லெபனான் மீது நடத்தப்படும் தொடர் தாக்குதல்கள் குறித்துத் தனது ஆழ்ந்த கவலையைத் தெரிவித்துள்ள திருத்தந்தை 14-ஆம் லியோ, போரினால் பிரச்சினைகளுக்குத் தீர்வு காண முடியாது என்று வலியுறுத்தியுள்ளார். மேலும், “உக்ரைனில் போர் தீவிரமடைந்துள்ளதை நான் கவலையுடன் கவனித்து வருகிறேன். ஏவுகணைகளும் ட்ரோன்களும் விழும் இடங்களில் நம்பிக்கைகள் சிதைகின்றன; வழிபாட்டுத் தலங்களும் வீடுகளும் அழிக்கப்பட்டு, அப்பாவி உயிர்கள் பலியாகின்றன. போர் பாதுகாப்பைத் தராது; மாறாக, வெறுப்பையும் துயரத்தையும் மட்டுமே விளைவிக்கும்” என்றும் எச்சரித்துள்ளார்.

மேலும், லெபனான் மீது நடத்தப்படும் தாக்குதல்களால் பாதிக்கப்பட்டுள்ள மக்களுக்காகவும் அவர் செபித்தார். அன்னை மரியா தாய்மைப் பாசத்துடன் நம்மைப் பாதுகாப்பார் என்று லெபனான் திருப்பயணிகளுக்கு அவர் ஆறுதல் கூறினார். குழந்தைகளுக்கு இறையன்பையும் பிறரன்பையும் கற்றுத் தரும் அனைத்துத் தாய்மார்களுக்கும் திருத்தந்தை தனது நன்றியையும் ஆசிரையும் வழங்கினார். கருவுற்றது முதல் இயற்கை மரணம் வரை ஒவ்வொரு மனித உயிரையும் பாதுகாக்க வேண்டுகோள் விடுத்தார்.