உலக செய்திகள்

அண்மையில் கொண்டாடப்பட்ட 6-வது உலக தாத்தா-பாட்டியர் மற்றும் முதியோர் நாளை முன்னிட்டு, வத்திக்கான் செய்தி நிறுவனத்திற்குப் பேட்டியளித்த ‘குடும்பம் மற்றும் வாழ்வுக்கான’ ஆணையத்தின் முதியோர் பணிப் பொறுப்பாளர் விட்டோரியோ ஸ்கெல்ஸோ, “முதியோர் பராமரிக்கப்படவேண்டிய சுமையல்ல; மாறாக, போற்றப்பட வேண்டிய கொடை. சேவைகளை அமைப்பது மட்டும் போதாது; உறவுகளைக் கட்டியெழுப்பவேண்டும். அப்போதுதான் இறைவனால் நாம் மறக்கப்படவில்லை என்ற உண்மை, குடும்பத்தாலும் பங்குச் சமூகத்தாலும் நாம் மறக்கப்படவில்லை என்ற தினசரி அனுபவமாக மாறும்” என்று கூறினார். “ஒதுக்கித்தள்ளும் கலாச்சாரத்தைக் கைவிட்டு, தனிமையில் வாழும் முதியோரைச் சந்திக்க அழைப்பு விடுத்தார். முதியோர் தங்களின் பலவீனத்திற்கு அஞ்சாமல், உலக அமைதிக்காகத் தொடர் செபம் செய்யும் பணியை ஏற்றுக்கொள்ளவேண்டும் என்றும், இளையோரும் முதியோரும் இணைந்து செயல்படும் தலைமுறைக்கு இடையேயான உறவே திரு அவையின் வாழ்வை வளப்படுத்தும் என்றும் கூறினார்.

இலத்தீன் வழிபாட்டுமுறை கத்தோலிக்கத் திரு அவையின் மறுசீரமைப்பின் 35-ஆம் ஆண்டு விழாவில் திருத்தந்தையின் தூதராகப் பங்கேற்க, திருப்பீடத்தின் வெளியுறவுத்துறைச் செயலர் பேராயர் பால் ரிச்சர்ட் காலகர் உக்ரைன் சென்றுள்ளார். உக்ரைன் வான்வெளி மூடப்பட்டுள்ளதால், அவர் போலந்து வழியாகச் சாலை மார்க்கமாக உக்ரைனை அடைந்தார். எல்விவ் நகரில் பேராயர், “போரின் நீதியான முடிவு என்பது ஐரோப்பாவின் இப்பகுதியில் அமைதியை மீட்டெடுப்பதாகும்” என்றார். உக்ரைனிய மக்களின் தியாகங்களையும் துயரங்களையும் திருத்தந்தை லியோ மற்றும் திரு அவை மறந்துவிடவில்லை என்றும், நீதியான அமைதிக்கான தகுந்த சூழலை நாம் உருவாக்கவேண்டும் என்ற அவர், போரில் உயிரிழந்தவர்களுக்காகத் தேசிய அளவிலான மௌன அஞ்சலியிலும் பங்கேற்றார். போரினால் பாதிக்கப்பட்ட உக்ரைனிய கத்தோலிக்கப் பல்கலைக்கழகத்திற்குச் சென்று அங்குள்ள மாணவர்களின் சமூகப் பணிகளையும், மாற்றுத்திறனாளிகளுக்கான ஆதரவுத் திட்டங்களையும் கேட்டறிந்தார்.

‘உலகில் வீசும் போர்க்காற்று அமைதிக்கான நம்பிக்கையை அணைத்துவிடக்கூடாது. நாடுகள் மீண்டும் தூதரகப் பேச்சுவார்த்தைக்குத் திரும்பவேண்டும்’ என்று திருத்தந்தை லியோ வேண்டுகோள் விடுத்துள்ளார். மத்திய கிழக்கு நாடுகள் மற்றும் உக்ரைனில் நிலவி வரும் தீவிரப் போர்ச்சூழல் குறித்துத் தனது கவலையைப் பகிர்ந்துகொண்ட திருத்தந்தை, “போர் வன்முறையையும் மரணத்தையும் விதைத்து, அப்பாவி மக்களைப் பாதிக்கிறது. இந்தச் சூழலிலும் நாம் நம்பிக்கையை இழக்கக்கூடாது. நாடுகள் தங்களுக்குள் இருக்கும் மோதல்களைப் பேச்சுவார்த்தை மற்றும் நிர்வாக வழிகள் மூலமே தீர்க்க வேண்டும்; அதுவே நிலையான அமைதிக்கு வழிவகுக்கும்” என்றார். ‘கடல் ஞாயிறு’ தினத்தை முன்னிட்டு இராணுவப் பதற்றங்களால் வாழ்வாதாரம் பாதிக்கப்பட்டுள்ள மாலுமிகள், மீனவர்கள் மற்றும் துறைமுகத் தொழிலாளர்களுக்குத் தனது ஆதரவையும் செபங்களையும் தெரிவித்தார். நிறைவாக, போலந்து நாட்டின் ஜாஸ்னா கோரா அன்னை மரியா திருத்தலத்திற்குப் புனிதப் பயணம் மேற்கொண்டுள்ள பல்லாயிரக்கணக்கான இறைமக்களுக்குத் தனது ஆசிரையும் வாழ்த்துகளையும் திருத்தந்தை வழங்கினார்.

உலகளவில் மதச் சுதந்திரம், மனச்சாட்சி மற்றும் கருத்துச் சுதந்திரத்தை மேம்படுத்திய பங்களிப்பிற்காக, அமெரிக்காவின் தேசிய அரசமைப்பு மையம் வழங்கும் 38-வது மதிப்புமிக்க ‘லிபர்ட்டி மெடல்’ (Liberty Medal) விருது திருத்தந்தை லியோவுக்கு வழங்கப்பட்டுள்ளது. அமெரிக்கா உருவானதன் 250-வது ஆண்டு விழாவின் முன்னிரவில், உரோம் நகரிலிருந்து பிலடெல்பியாவில் கூடியிருந்தவர்களிடம் திருத்தந்தை காணொளி வாயிலாக உரையாற்றினார்.

அமெரிக்காவில் பிறந்த முதல் திருத்தந்தையான 14-ஆம் லியோ, நாட்டின் சுதந்திர முழக்கத்தின் உன்னத விழுமியங்களான சமத்துவம் மற்றும் மனித மாண்பை நினைவுகூர்ந்தார். “ஒரு நாட்டின் தார்மீக மேன்மை என்பது, கரு உருவானது முதல் இயற்கை மரணம் வரை, விளிம்புநிலை மக்கள் உள்பட அனைத்து மனித உயிர்களையும் பாதுகாக்கும் சட்டங்களில்தான் அடங்கியுள்ளது. உயிர் வாழும் உரிமை மறுக்கப்பட்டால், எவராலும் சுதந்திரத்தை அனுபவிக்க முடியாது” என்று அவர் வலியுறுத்தினார். அமெரிக்க அரசமைப்பின் முதல் திருத்தம் வழங்கும் மதச் சுதந்திரத்தின் முக்கியத்துவத்தைச் சுட்டிக்காட்டிய திருத்தந்தை, பன்முகத்தன்மை கொண்ட அமெரிக்கா, என்றும் நீதியுடனும் அமைதியுடனும் திகழவேண்டும் என வாழ்த்தி, ‘காட் பிளஸ் அமெரிக்கா’ (God bless America) என்று தனது உரையை நிறைவு செய்தார்.

ஜெருசலேமின் இலத்தீன் மறைமுதுவர் கர்தினால் பியர்பாட்டிஸ்டா பிட்சாபாலா, இத்தாலியின் புகழ்பெற்ற ‘லைம்ஸ்’ இதழின் அமைதிக்கான விருதைப் பெற்றுக்கொண்ட பின் காசாவின் கொடூரமான உண்மைகளை விவரித்தார். அண்மையில் காசாவிற்கு சென்ற கர்தினால், “காசா முற்றிலும் பேரழிவைச் சந்தித்துள்ளது; மக்கள் சாக்கடைகளுக்கும் கழிவுகளுக்கும் நடுவே கூடாரங்களில் வாழ்கின்றனர். ஊடகங்கள் காட்டாத ஆகப்பெரும் கொடூரம் அங்கு வீசும் துர்நாற்றமும், பசியால் குழந்தைகளைக் கடித்துக் குதறும் எலிகளின் தொல்லையும்தான்” என்று கண்ணீருடன் தெரிவித்தார்.

மேலும், “போர் நிறுத்தத்திற்குப் பின்னும் நிலைமை சீரடையவில்லை” எனக் குறிப்பிட்ட அவர், பள்ளி மேசைகள், பேனாக்கள், நோட்டுப் புத்தகங்கள் மற்றும் ஜன்னல் கண்ணாடிகள் கூட ‘இராணுவப் பயன்பாட்டுப் பொருள்கள்’ எனக் கூறி இஸ்ரேலால் தடை செய்யப்படுவதாகச் சாடினார். மேற்குக்கரையில் பாலஸ்தீனியர்களுக்கு எவ்வித சட்டப் பாதுகாப்பும் இல்லை. இஸ்ரேலிய குடியேறிகளின் வன்முறைகள் அநாகரிகமாக அதிகரித்துள்ளன. இரண்டு ஆண்டுகளுக்கு முன் அக்டோபர் 7 அன்று நடந்தேறிய தாக்குதல் யூதர்களின் மனத்தில் ஆழமாகப் பதிந்துள்ளதால் தற்போதைய சூழல் சிக்கலாக இருக்கிறது. ஆனாலும், அமைதிக்கான உரையாடல்களும் பரஸ்பர புரிதலும் அவசியம். புனித பூமியைத் தனித்துவிடாமல், விளிம்புநிலை மக்களின் வாழ்வுரிமையைக் காக்க உலக நாடுகளும் ஊடகங்களும் தொடர்ந்து குரல் கொடுக்கவேண்டும்” என்று கர்தினால் பிட்சாபாலா உலக மக்களுக்கு வேண்டுகோள் விடுத்துள்ளார்.

அமெரிக்கா - ஈரான் இடையே கையெழுத்தான வரலாற்று முக்கியத்துவம் வாய்ந்த அமைதி ஒப்பந்தத்திற்குத் திருத்தந்தை 14-ஆம் லியோ தனது மனமார்ந்த வரவேற்பைத் தெரிவித்துள்ளார். மேலும், இரு நாடுகளும் தொடர்ந்து பேச்சுவார்த்தை மற்றும் ஒத்துழைப்புப் பாதையில் பயணிக்கவேண்டும். சுமார் நான்கு மாத காலப் போருக்குப் பிறகு இரு நாடுகளும் இந்த உடன்படிக்கையை எட்டியுள்ளன. கடந்த பிப்ரவரி 28 அன்று ஈரானின் அணு ஆயுத மையங்களை இலக்கு வைத்து அமெரிக்காவும் இஸ்ரேலும் வான்வழித் தாக்குதல்களை நடத்தின. இதற்குப் பதிலடியாக ஈரானும் ஏவுகணைத் தாக்குதல்களை நடத்தியதுடன், ஹார்முஸ் நீரிணையில் கப்பல் போக்குவரத்தையும் முடக்கியது. தற்போது ஏற்பட்டுள்ள இந்த அமைதி ஒப்பந்தம், மத்திய கிழக்கில் பரஸ்பர நம்பிக்கை, பாதுகாப்பு மற்றும் உறுதிப்பாட்டை வலுப்படுத்த உதவும். உக்ரைன் மீதான இரஷ்யாவின் தீவிரத் தாக்குதல்களால் அதிகரித்து வரும் அப்பாவி மக்களின் மரணங்கள் குறித்து நான் மிகுந்த வேதனைப்படுகிறேன். போரினால் ஏற்பட்டுள்ள இந்த வன்முறைகளைத் துறந்து நீதியான மற்றும் நிலையான அமைதி ஏற்பட அனைவரும் செபிப்போம் என்று திருத்தந்தை அழைப்பு விடுத்துள்ளார்.